ABŞ Gürcüstanda Rusiyaya qarşı ikinci cəbhə açmaq istəyir. Vaşinqtonun belə planlarının olduğunu amerikalı iqtisadçı və prezident Ronald Reyqan administrasiyasında Maliyyə Nazirliyi rəhbərinin keçmiş köməkçisi Pol Kreyq Roberts "Dialogue Works" adlı "YouTube" kanalına müsahibəsində açıqlayıb:
"Ukraynadakı münaqişəni tamamilə Vaşinqton təşkil edir. Bunun üçün Rusiyanı günahlandırmağa çalışsa da, bunu özü qurub. İndi də onun Gürcüstanda maliyyələşdirdiyi qeyri-hökumət təşkilatlarının orada necə rəngli inqilab təşkil etməyə çalışdıqlarını görürük". Onun sözlərinə görə, ABŞ Moskvaya qarşı aqressiv siyasətindən əl çəkmir, Ukraynaya uzaqmənzilli silahların tədarükünü artırır və Rusiya ərazisinə zərbələrə qoyulan məhdudiyyətləri aradan qaldırır. Bundan əvvəl Rusiya Federasiyasının Xarici Kəşfiyyat Xidməti bəyan etmişdi ki, ABŞ Gürcüstanda müxalifətə parlament seçkiləri ilə əlaqədar ölkədə etiraz aksiyalarına hazırlaşmaq üçün göstərişlər verib. Qeyd olunur ki, Tiflisdə xarici agentlər haqqında qanunun qəbuluna qarşı etiraz aksiyalarında iştirak edənlər hazırkı hakimiyyətə qarşı pozucu qüvvəyə çevriləcək. Burada onu da xatırladaq ki, ABŞ Müdafiə Nazirliyi yayda planlaşdırılan "Layiqli tərəfdaş" gürcü-amerikan hərbi təlimlərinin strateji münasibətlərə yenidən baxılması səbəbindən qeyri-müəyyən müddətə təxirə salındığını açıqlayıb. ABŞ Müdafiə Nazirliyi təlimlərin təxirə salınması qərarını Gürcüstan hakimiyyətinin ABŞ və Qərbin Ukraynadakı vəziyyətlə əlaqədar Rusiyaya təzyiqi artırmaq üçün "ikinci cəbhə" açmaq cəhdlərini elan etməsi ilə əsaslandırıb. Amerika tərəfi bu cür bəyanatların yalan olduğunu iddia edir. Bununla əlaqədar ABŞ hakimiyyəti qərara gəlib ki, indi Gürcüstanda tammiqyaslı hərbi təlimlər keçirmək üçün münasib vaxt deyil. BŞ dövlət katibinin mülki təhlükəsizlik, demokratiya və insan haqları üzrə müavini Uzra Zeya isə qeyd edir ki, Amerika Gürcüstan hökumətinin anti-Qərb dezinformasiyasından və antidemokratik fəaliyyətindən son dərəcə narahatdır: "Birləşmiş Ştatlar Gürcüstan hökumətinin anti-demokratik hərəkətlərindən və hakim partiyanın bəzi nümayəndələrinin yaydığı dezinformasiyadan son dərəcə narahatdır. Bu, Gürcüstanın Avro-Atlantik yoluna xələl gətirir və eyni zamanda gürcü əhalisinin hüquqlarına xələl gətirir. Hakim partiyanın liderləri ABŞ da daxil olmaqla, uzunmüddətli tərəfdaşlar haqqında dezinformasiya yayırlar və bu, yalnız düşmənlərimizin maraqlarına xidmət edir". O, ABŞ-ın Gürcüstanın suverenliyi və ərazi bütövlüyünü dəstəklədiyini bir daha təsdiqləyib: "Gürcüstan çox yaxşı bilir ki, Rusiya 16 ildir ki, ölkə ərazisinin 20%-ni qeyri-qanuni işğal altında saxlayır və 2008-ci ildə imzalanmış altı bəndlik razılaşmaya əməl etmir".
Bütün bunlar ABŞ və Gürcüstan arasında münasibətlərin əhəmiyyətli dərəcədə zədələndiyini göstərir. Gürcüstandan Rusiyaya qarşı yeni cəbhə kimi istifadə məsələsi isə Tiflisdə də son dövrlərdə aktiv müzakirə olunur. Hakim "Gürcü Arzusu-Demokratik Gürcüstan" partiyasının fəxri sədri Bidzina İvanişvili bunlar fonunda qeyd edir: "Hamıya aydındır ki, müharibəyə qoşulacağı təqdirdə Gürcüstan Ukraynadan da pis nəticələr əldə edəcək. Bu nəticədən qaçmaq bizim ilkin vəzifəmizdir və nəhayət, oktyabrın 26-da "Gürcü Arzusu-Demokratik Gürcüstan" partiyasının növbəti qələbəsi ilə həll olunacaq". Onun sözlərinə görə, "Qlobal Müharibə Partiyası" köhnə və yeni "Vahid Milli Hərəkat" partiyasını lobbiləşdirir, çünki onlar istənilən vəzifəni, o cümlədən ölkənin müharibəyə cəlb olunmasını yerinə yetirmək üçün imza atacaqlar: "Qlobal Müharibə Partiyasının istəyi aydındır. Müharibəyə girməyəcəyimizə və Ukraynanın taleyini bölüşmək üçün Gürcüstanı qurban verməyəcəyimizi başa düşərək onlar agentliyi, vətəndaşlığı olmayan insanların birliyini, "Milli Hərəkat" kollektivini hakimiyyətə qaytarmaq üçün son cəhdlərini edirlər. Ona görə də köhnə və yeni "Milli Hərəkat"ı – (Saakaşvili, Qvaramiya, Zurabişvili, Xazaradze, Qaxariya, Bokeriya), tapşırığa imza atacaq digər vətəndaşlığı olmayan siyasətçiləri lobbiləşdirirlər. "Ya döyüşəcəksən, ya da gedəcəksən" - bu, tamamilə qəbuledilməz bir münasibətdir və Gürcüstan əhalisi buna oktyabrın 26-da müvafiq cavab verəcək. Bizim maksimum bir il vaxtımız qalıb, bundan sonra qlobal və regional siyasi maraqlar, o cümlədən Gürcüstanla bağlı maraqlar əsaslı şəkildə dəyişəcək. Ukraynada davam edən müharibə ən geci bir ildən sonra bitəcək. ABŞ-da keçirilən prezident seçkilərində respublikaçılar qalib gəlsələr, müharibə hətta yanvarda da bitə bilər. Ona görə də ən başlıcası bu qısa zamanda qalib gəlməkdir və müharibə bitən kimi Amerika və Avropa ilə bütün anlaşılmazlıqlar dərhal keçmişə qovuşacaq, Gürcüstan qlobal siyasət oyunçuları üçün tamam başqa maraq obyektinə çevriləcək". Rusiyanın Valday Klubunun eksperti Dmitri Suslov isə bildiri rki, istənilən halda ABŞ Gürcüstanda Rusiyaya qarşı ikinci cəbhə açmaq istəyir: "ABŞ açıq şəkildə Gürcüstanın suverenliyini, sağ qalmasını Rusiyaya qarşı geosiyasi mübarizəyə qoşulmaqdan asılı olduğunu bəyan edir. Onları Gürcüstan bir dövlət olaraq maraqlandırmır, onlar Ukraynada birinci cəbhənin iflasa uğradığı və öz üzərinə düşən vəzifəni yerinə yetirmədiyi bir şəraitdə Rusiyaya qarşı ikinci cəbhənin açılmasının zəruriliyində maraqlıdırlar".
Nahid SALAYEV
