Azərbaycanda qarşıdan gələn Parlament seçkiləri öncəsi bəzi seçki dairələrinin hüdudlarında və adında dəyişikliklər olunub. Əldə etdiyimiz məlumata görə, yeni parlamentdə Naxçıvandan 6 namizəd mandat qazana biləcək. Əvvəllər Naxçıvanı 7 deputat təmsil edirdi.
7 saylı seçki dairəsi Ordubad – Culfanı əhatə edirdisə, hazırda həmin dairə Səbail ilə əvəzlənib.
Bundan başqa, Sumqayıt və Abşerondan da deputat sayında artım olacaq.
Bundan əlavə, 97 saylı Tərtər-Naftalan-Goranboy, 118 saylı Ağdam şəhər, 119 saylı Ağdam kənd və 124 saylı Şuşa-Ağdam-Xocalı-Xocavənd seçki dairələri müvafiq olaraq 96 saylı Goranboy-Naftalan seçki dairəsi, 97 saylı Tərtər-Ağdərə-Goranboy seçki dairəsi, 118 saylı Ağdam-Xocalı seçki dairəsi, 119 saylı Ağdam seçki dairəsi, 124 saylı Şuşa-Ağdam-Xocavənd seçki dairəsi adlandırılıb və hüdudlarında qismən dəyişikliklər edilib.
Xatırladaq ki, "Azərbaycan Respublikasının Ağdərə rayonunun yaradılması haqqında" Azərbaycan Respublikasının 2023-cü il 5 dekabr tarixli Qanununa əsasən, seçki dairələrinin sərhədlərinin müəyyən edilməsi üzrə Mərkəzi Seçki Komissiyasında fəaliyyət göstərən komissiya bəzi seçki dairələrinin hüdudlarına dair təkliflərini Mərkəzi Seçki Komissiyasına təqdim edib.
Diqqət çəkən məqam budur ki, əvvəl Naxçıvan MR-i ölkə parlamentində 7 deputat təmsil edirdisə, budəfəki seçkidə deputatların sayı 6 olacaq. Artıq bu məlumat Mərkəzi Seçki Komissiyasının rəsmi səhifəsinə də yerləşdirilib.
Naxçıvandan seçkiyə məsul olan, lakin adının çəkilməsini istəməyən şəxslərdən biri bizimlə söhbətində deputat sayının azaldığı ilə bağlı məlumatı təsdiqlədi:"Bəli, dairənin biri rəsmən ləğv edilib. Bunu Mərkəzi Seçki Komissiyası müəyyənləşdirib. Qərarı belə əsaslandırdılar ki, başqa ərazilərdə əhalinin sayında artım olub, ancaq Naxçıvanda azalma müşahidə edilir. Bu səbəbdən də dairənin birinin dislokasiyasını dəyişdilər. Artıq həmin saylı dairə Naxçıvan hüdudlarından kənarı əhatə edir. Bu, mərkəzdən verilən qərardır. Çünki Naxçıvan MSK-sının bu dəyişikliyi etməyə səlahiyyəti çatmır. Naxçıvan MSK-sı Ali Məclisə olan yerli seçkiləri təşkil edir".
Xatırladaq ki, hakim Yeni Azərbaycan Partiyasının İdarə Heyəti iyulun 17-də keçirilmiş iclasında 2024-cü il sentyabrın 1-də Milli Məclisə keçiriləcək növbədənkənar seçkilərdə namizədlərini müəyyənləşdirib. Həmin siyahıdan da görünür ki, 7 saylı dairə Səbail rayonunun əhatə dairəsi kimi müəyyən edilib. Hakim partiyanın həmin dairədən namizədi Qarayev Əhliman Paşa oğlu olub.
Hakim partiyanın siyahısında Naxçıvandan namizəd kimi irəli sürülən 6 deputat bunlardır:
1 saylı Şərur – Sədərək Əsgərov Ziyafət Abbas oğlu
2 saylı Şərur-Kəngərli Novruzov Siyavuş Dünyamalı oğlu
3 saylı Babək - Şahbuz - Kəngərli Babayev Asiman Əli oğlu
4 saylı Naxçıvan şəhər İbrahimov Eldar Rza oğlu
5 saylı Babək - Naxçıvan - Culfa Həmzəyeva Ülviyyə Tapdıq qızı
6 saylı Ordubad - Culfa Rəhimzadə Vüqar Gəncəli oğlu
Məhəmmədəli QƏRİBLİ
