Ötən həftəsonu Azərbaycan Xalq Cəbhəsi Partiyası (AXCP) növbədənkənar parlament seçkilərində iştirak etməmək qərarı verib. Bu barədə qərar partiyanın Ali Məclisində elan olunub. AXCP qərarını "azad rəqabət və seçki mühitinin olmaması" ilə izah edib.
Çox maraqlıdır ki, AXCP seçkiyə qatılan digər müxalif partiyaları hakimiyyətə işləməkdə ittiham edir. Bu nə dərəcədə doğru yanaşmadır?
Akif Nağı: "Seçkilərdə iştirak etmək o demək deyil ki, sən hakimiyyətlə sövdələşmisən"
Seçkiyə qatılan müxalifyönlü Azad Vətən Partiyasının sədri Akif Nağı "Bakı-Xəbər"ə açıqlamasında bildirdi ki, AXCP artıq özünü bitirmiş bir partiya yox, qurumdur: "Partiya kimi artıq fəaliyyət göstərmirlər. Hətta deyərdim ki, təxribatçı bir qrupdur. Normal şəkildə yuxarı strukturları yoxdur, heç bir iclas da keçirə bilmirlər və üzvləri də dağılıb. Azdan - çoxdan qalanlar da öz qərarlarını verməlidirlər. Həmin rəhbərlik altında olanlar özlərini bütün proseslərdən kənarda qoyurlar və faktiki olaraq xarici sifarişləri yerinə yetirirlər. Əli Kərimlinin haqqı yoxdur ki, kimisə nədəsə ittiham etsin. Çünki Əli Kərimli özü 1995-ci ildə Zərdüşt Əlizadədən sonra ilk olaraq siyasi manipulyasiya möhtəkərliyi etməyə çalışdı. 2000-ci ildə də bu addımı təkrarladı. Ona görə də indi kimisə ittiham etməyə onun haqqı yoxdur. Azərbaycanda vəziyyət tamamilə dəyişib. Partiyalar arasında normal, sağlam münasibət var. Həm qanuna uyğun olaraq, həm də dünya praktikasına uyğun inkişaf gedir, təşkilatlanma aparılır. Seçkilərdə iştirak etmək o demək deyil ki, sən hakimiyyətlə sövdələşmisən. Bu, mənasız, cılız, primitiv bir yanaşmadır. Əli Kərimli hər zaman primitivliyi ilə seçilib. Mən onu hər zaman, əvvəllər də tanımışam. 1993-cü ildə hakimiyyət böhran ərəfəsində idi. Surət Hüseynov artıq ayağa qalxmışdı. 1993-cü ilin may ayında mətbuat konfransı keçirildi və həmin mətbuat konfransında dövlət katibi kimi ondan soruşdular ki, necə oldu Qarabağı azad edə bilmədiz, hakimiyyətə gəldiz? O isə cavabında bildirdi ki, xalq ölümə hazır deyil, ona görə də biz qalib gələ bilmədik. O vaxt mən " Doğru yol " qəzetinin redaktoru idim. Mən ona qısa bir replika ilə cavab verdim ki, 27 yaşlı bir cavan oğlan avtomat götürüb vuruşar, xalqı ittiham edə bilməz. Minlərlə insanımız şəhid olub. Ayıb olsun sənə ki, sən belə bir mövqedən çıxış edirsən. O vaxtlar aramızda çox sərt mübahisə oldu. Qəzetə qarşı hücum etdi hətta. Yəni belə cılız, düşüncəsi olmayan bir adamdır. Ona görə də, mən hesab edirəm ki, cəmiyyətdə onun dediklərinə heç kim fikir verməməlidir. Öz partiyası da qərarını verməlidir ki, belə cılız adamın adamın arxasınca getməyə son qoysunlar. Dünyada necə, bizdə də elə normal seçkilər keçirilir. Heç bir sövdələşmə də yoxdur. Mən özüm də normal namizədliyimi vermişəm. Dairə Seçki Komissiyalarında istənilən müraciətimizə normal yanaşırlar, istənilən şəkildə şərait yaradırlar. Heç bir təzyiq yoxdur və normal şəkildə proseslər gedir. Ona da yəqin ki, belə normal proses sərf etmir. Qışqırmaq, bağırmaq istəyir. Mən hesab edirəm ki, Əli Kərimlinin dişinin dibində şirə qalıb. İstəyir ki, ona yer versinlər, əvvəlcədən desinlər ki, sən filan yerə gedəcəksən, biz səni deputat edəcəyik. Budur onun istəyi. Sərbəst, azad bir mübarizə aparmaq istəmir.
Qeyd edək Azad Vətən Partiyası Akif Nağının namizədliyini 124 saylı Şuşa-Ağdam-Xocavənd seçki dairəsindən irəli sürüb. Partiyanın seçki qərargahından bildiriblər ki, bugünə qədər Akif Nağı ilə yanaşı, 54 saylı Mingəçevir seçki dairəsindən Tacəddin Əyyubov, 114 saylı Şəki şəhər seçki dairəsindən Elxan Rəhimov, 98 saylı Bərdə-Tərtər seçki dairəsindən Gəray Əsədov, 73 saylı Masallı-Cəlilabad seçki dairəsindən Zaur Ələkbərov, 112 saylı Zaqatala seçki dairəsindən Polad Soltanov, 22 saylı Nəsimi-Yasamal seçki dairəsindən Ramil Şirinov, 31 saylı Suraxanı 2-ci seçki dairəsindən Vidadi Şirəliyev, 10 saylı Binəqədi 3-cü seçki dairəsindən Tağı Kazımov, 25 saylı Nizami 2-ci seçki dairəsindən Bəhmən Ədilov, 100 saylı Göygöl-Daşkəsən-Kəlbəcər seçki dairəsindən Nadir Məmmədov, 119 saylı Ağdam seçki dairəsindən Maya Quliyeva və digərlərinin namizədliyi irəli sürülüb.
Namizədlərin irəli sürülməsi prosesi davam edir.
Elşad Musayev: "Hakimiyyətlə işləyən onlar olub"
Seçkilərdə iştirakla bağlı qərar verən digər müxalif təsisat olan Böyük Azərbaycan Partiyasının sədri Elşad Musayev "Bakı-Xəbər"ə açıqlamasında bildirdi ki, AXCP-nin seçkilərdə iştirak edib-etməməsi ilə bağlı məsələyə çox da fikir vermək lazım deyil: " Onların boykotla bağlı qərarlarına isə ümumiyyətlə münasibət bildirmək istəmirəm. Kimisə hakimiyyətə işləməkdə ittiham etməyə gəldikdə isə, gərək onlar bu mövzuda ümumiyyətlə danışmasınlar. Hamıdan əvvəl Parlamentdə onlar təmsil olunub. Vəziyyətləri də hamıdan yaxşıdır. Hətta onların sıralarında elələri var ki, hakimiyyətin şəninə tərifli kitablar yazıb. Əziyyət çəkən isə sadə və sıravi cəbhəçilərdir. Onlar bəzi adamların şəxsi kaprizinin qurbanına çevriliblər. Bu mövzunu qabartmaq lazım deyil. Gündəmdən düşən siyasi qüvvəni niyə yenidən gündəmə gətirirlər? Hakimiyyətlə işləyən onlar olub. Biz hamını çox yaxşı tanıyırıq. Siyasi partiya yaranıbsa, seçkilərdə iştirak etməlidir".
Qeyd edək ki, Böyük Azərbaycan Partiyasının sədri Elşad Musayev növbədənkənar parlament seçkilərində iştirak edəcəyi dairəni də açıqladı.
Sədr bildirib ki, namizədliyini 10 saylı Binəqədi üçüncü seçki dairəsindən irəli sürəcək.
Məhəmmədəli QƏRİBLİ
