Faiq Balabəyli: "Bu həmin təşkilatın ayrıseçkilik siyasətinin təzahürlərindən biridir"
UNESCO özünün əsl missiyasını unudub bütün resurslarını ermənilərə qayğı göstərməyə yönəldib. Zamanında Azərbaycanın 1 milyon qaçqın və məcburi köçkününün taleyinə biganə qalan təşkilat Qarabağdan öz xoşu ilə getmiş erməni ailələrinin, eləcə də onların uşaqlarının qayğısına qalır. Bu məqsədlə UNESCO-nun baş direktorunun təhsil üzrə müavini Stefaniya Canni İrəvanda səfərdə olub. Hətta Ermənistanın elm, təhsil, mədəniyyət və idman naziri Janna Andreasyan S.Canninin rəhbərlik etdiyi nümayəndə heyətini də qəbul edib.
UNESCO-nun missiyasının ekspertləri iyunun 16-dan 22-ə qədər Ermənistanda olublar.
Məlumata görə, dörd ekspertdən ibarət missiya iyun ayında Ermənistanda "İnformasiya və kommunikasiya texnologiyaları sahəsində peşə təhsili və təliminin idarə edilməsi və maliyyələşdirilməsi üzrə texniki rəhbərliyin təmin edilməsi" və "Bacarıqların profilləşdirilməsi və iş axtarışı üçün texniki alətin tətbiqi" mövzularında iki seminar keçirib. Məsələ burasındadır ki, bu seminar Qarabağdan getmiş erməni ailələri ilə bağlı olub. Tamamilə əsassız olaraq onlar "məcburi köçkün və iş axtaran Dağlıq Qarabağ vətəndaşları" adlandırılıb. Qarabağdan olan "məcburi köçkünlərin" uşaqlarının təhsil almasına UNESCO-nun dəstək göstərdiyi vurğulanıb. "Respublika Pedaqoji-Psixoloji Mərkəzi UNESCO ilə birgə "Dağlıq Qarabağdan olan məcburi köçkün uşaqların psixososial sabitliyini artırmaqla onların təhsil prosesinə cəlb edilməsi" proqramını həyata keçirir"-deyə qeyd edənlər unudur ki, artıq "Dağlıq Qarabağ" deyilən bir ərazi vahidi yoxdur, ora Qarabağ İqtisadi Rayonudur. Digər tərəfdən də, o uşaqların "məcburi köçkün" adlandırılması tamamilə qanundan kənar bir məsələdir.
1 milyon azərbaycanlı qaçqın çöldə qalmışdı, amma UNESCO-nun tükü də tərpənmirdi, indi erməni uşaqlarını görüb hərəkətə gəlib.
"Çox təəssüf ki, UNESCO da digər beynəlxalq təşkilatlar kimi ermənilərin maraqlarını müdafiə etməyi özünün missiyasına çevirib"
Müstəqil.az saytının baş redaktoru, AYB üzvü, şair Faiq Balabəyli "Bakı-Xəbər"ə bildirdi ki, UNESCO-nun erməni ailələri və onların uşaqları ilə bağlı Ermənistana xüsusi missiya göndərməsi ayrıseçkilik nümunəsidir. "Azərbaycana gələndə qaçqın və məcburi köçkünləri unudurdular, onlara yönəlik heç bir iş görmürdülər, ancaq Qarabağdan könüllü köçüb gedən ermənilərə "məcburi köçkün" donu geydirib onların qayğısına qalırlar. Bəs Azərbaycanın 1 milyon qaçqını olanda, qaçqın uşaqları məşəqqət içində yaşayanda UNESCO-nun aidiyyəti nümayəndələri harada idilər? Azərbaycanlıları öz tarixi torpaqlarından Ermənistan qovub çıxarmışdı, torpaqlarımızı işğal etmişdi. Onda UNESCO-nun nümayəndələri niyə gəlib çadır şəhərciklərini gəzib insanlarımızın problemi ilə maraqlanmırdı? Məcburi köçkün düşmüş azərbaycanlıların işsizlik problemi də vardı, uşaqlarının çətinliyi də. Maraqlıdır, nə üçün UNESCO-nun aidiyyəti nümayəndələri bu qayğını, bu diqqəti, bu dəstəyi azərbaycanlı qaçqın uşaqlara göstərmədilər? Cavab aydındır. Çünki bu təşkilatdakı ermənipərəst qüvvələr, eyni zamanda xristian həmrəyliyi, təəssübkeşliyi buna imkan vermədi. Onların türk xalqlarına münasibəti yaxşı deyil, türklərin fəaliyyətini özlərinə qarşı düşmən mövqe kimi qəbul edirlər. Onların siyasətinin əsasını bu təşkil edir ki, Azərbaycanda, bütövlükdə türk dünyasında olan müsbət hadisəni mənfiyə doğru yozsunlar.
UNESCO azərbaycanlılarla ermənilər arasında fərq qoyur, ayrıseçkilik edir. Bu fərqləndirmə çox ağrılıdır. Azərbaycanlılarla ermənilər arasında ayrıseçkilik edilməsi Avropanın, kollektiv Qərbin yaddaşından, genindən irəli gəlir, bir çox beynəlxalq təşkilatların işinin əsasını bu ayrıseçkilik, ikili standart təşkil edir. Türkə qarşı bəslədikləri nifrət imkan vermir ki, əsl missiyalarını yerinə yetirsinlər".
F.Balabəyli hesab edir ki, UNESCO-nun Azərbaycanla bağlı ayrıseçkilik etməsi ilk dəfə deyil, biz bunu hər zaman görmüşük.
"UNESCO da, başqa təşkilatlar da Qarabağdan könüllü köçüb getmiş erməniləri süni şəkildə "məcburi köçkün" adlandırırlar, amma bunlar heç zaman əsl qaçqın və məcburi köçkün olan azərbaycanlıları nəzərə almadılar.
Bu həmin təşkilatın ayrıseçkilik siyasətinin təzahürlərindən biridir. UNESCO-nun da erməni lobbisinin, ermənipərəst qüvvələrin daha çox təsir dairəsində olduğu və erməni yalanları ilə "süsləndiyi" məlumdur. Bu da heç vaxt imkan verməyib ki, o özünün əsl missiyasını yerinə yetirsin. Çox təəssüf ki, UNESCO da digər beynəlxalq təşkilatlar kimi ermənilərin maraqlarını müdafiə etməyi özünün missiyasına çevirib. Bu da o təşkilatın nüfuzuna kölgə salır"-deyə F.Balabəyli qeyd etdi.
İradə SARIYEVA
