Fevralın 7-nə təyin olunan növbədənkənar prezident seçkiləri üzrə 86 min 490 müşahidəçi qeydiyyatdan keçib. Secki-2024.az saytı xəbər verir ki, bu barədə Mərkəzi Seçki Komissiyasının (MSK) sədri Məzahir Pənahov bildirib.
MSK sədri bildirib ki, onlardan 790 nəfər beynəlxalq müşahidəçilərdir.
Növbədənkənar prezident seçkilərinə xarici medianın marağının böyük olduğunu deyən MSK sədri qeyd edib ki, indiyədək Yaponiya, İtaliya, Almaniya, Türkiyə, Rusiya və digər ölkələrdən 63 media qurumunun 119 əməkdaşı seçki prosesinin işıqlandırılması üçün müraciət edib.
Jurnalistlərin seçkiyə baxmağa gəlişi yaxşı haldır. Lakin Türkiyə və Rusiya jurnalistləri ilə məsələ aydındır, onlar yəqin ki, maksimum obyektiv davranacaqlar. Çünki dost ölkələri təmsil edirlər. Bəs Almaniya, İtaliya və Japoniya jurnalistləri özlərinin seçki təəssüratlarında nə qədər obyektiv olacaqlar? Təmsil etdikləri ölkələrin siyasi hakimiyyətlərinin onlara təsiri olacaqmı?
Müşfiq Ələsgərli:"Hansısa media subyekti 86 min müşahidəçinin gördüyü həqiqətləri tərsinə çevirib yanlış formada təqdim edəcəksə, ilk növbədə özünü ifşa etmiş olacaq"
Media eksperti Müşfiq Ələsgərli "Bakı-Xəbər"ə şərhində "7 fevral seçkisinin həm ölkə daxilində, həm də ölkə xaricində ciddi maraq doğurduğunu müşahidə edirik. MSK-nın son məlumatına görə, 7 fevral seçkisi üzrə 86 min 490 nəfər müşahidəçi akkreditasiyadan keçib ki, bunlardan 790 nəfəri beynəlxalq müşahidəçilərdir. Təbii ki, media subyektlərinin seçki prosesini işıqlandırmaları üçün də yetərli şərait yaradılıb. 63 xarici media qurumundan 119 nəfər jurnalistin akkreditasiyaya alınması faktı onu göstərir ki, seçki prosesini işıqlandırmaq istəyən xarici media qurumlarının qarşısında heç bir maneə yaradılmayıb"-"deyə bildirdi. M.Ələsgərli qeyd etdi ki, Azərbaycan dövləti seçkinin demokratik, şəffaf formada keçirilməsi üçün bütün şərtləri təmin edib. "Xarici media qurumlarının necə davranacağı məsələsinə gəlincə, əlbəttə, bu onların özlərinin peşəkarlıqlarına bağlıdır. Özünü peşəkar sayan, beynəlxalq imici olan hansısa media qurumunun yalan, yanlış məlumat yaymağa meyl edəcəyini gözləmirəm. Çünki seçki prosesi hər kəsin gözü qarşısında keçirilir. Yuxarıda qeyd etdiyimiz kimi, seçkini 86 min 490 nəfər müşahidəçi izləyir. Əgər hansısa media subyekti 86 min müşahidəçinin gördüyü həqiqətləri tərsinə çevirib yanlış formada təqdim edəcəksə, ilk növbədə özünü ifşa etmiş olacaq. Hər kəs onların yalan yazdıqlarınıa şahidlik edəcək. Yox, əgər real şəkildə hansısa qüsurlu bir məqam, gerçək bir problem tapıb yazacaqlarsa, onda həmin qüsurun aradan qaldırılması üçün tədbirlər görüləcək. Azərbaycan demokratik ölkədir, burada söz və ifadə azadlığı, plüralizmə hörmət vardır. Kimsəyə belə yaz, elə yaz deyiilmir. Yetər ki, yazanlar həqiqəti yazsınlar, qanunları, kodeksləri pozmasınlar"-deyə M. Ələsgərli bildirdi.
Dəyanət Osmanlı:"... Ehtimal oluna bilər ki, Azərbaycanı istəməyən dövlətlərin mediasına təmsil etdikləri ölkələrin hökumətlərinin təsiri olsun, amma bu, seçkinin obyektivliyinə kölgə sala bilməyəcək"
"Türk Dünyası İnfo" İctimai Birliyinin sədri Dəyanət Osmanlının fikrincə isə, hansısa bir xarici media orqanı seçki prosesi ilə bağlı qərəzli fikirlər irəli sürərsə belə, seçkinin demokratikliyinə kölgə sala bilməz. "Fikrimcə, daha çox demokratiya və azad sekilərdən bəhs edən bəzi dövlətlər var ki, onların başqa ölkələrdəki vəziyyətə münasibətində demokratiya əsas təşkil eləmir. Yəni burada təsir göstərmək üçün nöqsan axtarmaq, bəzən də o nöqsanı yaratmaq amilləri vardır. Sözsüz ki, Azərbaycanın bütövlüyünü, inkişafını istəməyən qüvvələr var. Prezident seçkilərində də həmin ölkələrin müşahidəçiləri arasında həm azad, həm də əsasən sifarişə işləyən media nümayəndələri ola bilər. Amma bir həqiqət var ki, onlar Azərbaycanın bugünkü durumunda xalqın istəklərini yaxşı bilirlər və buna görə də neqativ dəyərləndirmələrin heç bir əhəmiyyəti olmayacaq. Əgər seçki komissiyalarında onların özləri olsaydılar belə, yenə də cənab İlham Əliyevin alternativsiz lider olduğunu görərdilər. Digər bir tərəfdən, Almaniya, Yaponiya və İtaliya kimi ölkərin mediasının hansısa dəyərləndirmələri dövlətimizin prioritetlərini dəyişdirə bilməz.
Düzdür, ehtimal oluna bilər ki, Azərbaycanı istəməyən dövlətlərin mediasına təmsil etdikləri ölkələrin hökumətlərinin təsiri olsun, amma bu, seçkinin obyektivliyinə kölgə sala bilməyəcək".
D.Osmanlı ümid edir ki, həm yerli, həm də xarici medianın seçkini obyektiv işıqlandırması üçün ciddi əsaslar var, jurnalistlərin fəaliyyəti üçün geniş şərait yaradılıb.
İradə SARIYEVA
