Məhərrəm Zülfüqarlı: "Veb-kameralar səsvermənin şəffaflığını, demokratikliyini təmin edir"
Bildiyimiz kimi, 7 fevral növbədənkənar prezident seçkiləri ilə əlaqədar olaraq seçki məntəqələrində veb-kameralar quraşdırılıb. Seçki məntəqələrində veb-kameraların quraşdırılması ilə bağlı bəzi siyasi dairələr iddia edir ki, məqsəd seçiciləri güdməkdir.
Lakin MSK- dan dəfələrlə deyilib ki, bunlar əsasən səsvermə və sayma prosesinin şəffaf olmasına, xidmət edir. Yəni MSK sədri Məzahir Pənahov özü "Dünən veb-kameraları izləyəndə fərqi özüm müşahidə etdim. Əsas məsələ odur ki, səsvermə günü heç bir xoşagəlməz hal baş verməsin. Tam arxayınam ki, səsvermə şəffaf keçiriləcək"-deyə bildirib. O qeyd edib ki, səsvermə kabinasının içini çəkmək üçün ən az 10 kamera lazımdır: "Guya iddia edirlər ki, insanları güdmək üçün məntəqəyə kamera quraşdırılır. Bu iradlar absurddur, bəhanədir. Seçki məntəqəsinə veb-kamera qoymaq insanları güdmək demək deyil".
Elə isə, kameraların məntəqələrdə hansısa ziyanı varmı? Kameraların faydası nədən ibarətdir?
"Veb-kameraların olması heç də kimisə güdmək, seçiciyə nəzarət etmək üçün deyil"
AVCİYA-nın seçki qərargahının rəhbəri, professor Məhərrəm Zülfüqarlı "Bakı-Xəbər"ə şərhində "Seçki məntəqələrində veb-kameraların quraşdırılması müsbət haldır. Seçkidən seçkiyə veb-kameraların sayını artırırlar. Bu da MSK-nın büdcəsində asılıdır. Yəni bunlar müəyyən vəsait tələb edir. Bilirsiz ki, veb-kameraların olması heç də kimisə güdmək, seçiciyə nəzarət etmək üçün deyil. Yəni seçicinin gizli səsvermə hüququ daim qorunur. Bilirsiz ki, səsvermə kabinəsi pərdənin arxasındadır, seçici gəlir, vəsiqəni təqdim edir və ona bülleten verirlər, o bülletenlə gedib gizli səsvermə otağında səsini verir, bülleteni qutuya atır. Gizli səsvermə otağında kamera yoxdur, kamera məntəqədə prosesə nəzarət etmək üçündür"-deyə bildirdi.
M.Zülfüqarlının sözlərinə görə, veb-kamera seçici fəallığına, məntəqədə qanun pozuntusunun baş verib-verməməsinə nəzarət etmək üçündür. Söhbətin hansı qanun pozuntusundan getdiyinə gəlincə, M.Zülfüqarlının sözlərinə görə, tutalım, hansısa vəzifəli şəxs gəlib səs verir, o məntəqəni tərk etmir, bunu da müşahidəçilər tez qeydiyyata alır və məntəqə sədrinə deyirlər ki, o şəxs dərhal kənarlaşdırılmalıdır, o da deyir "yox, görüm mənim işçilərim necə səs verəcək" və sair. O qeyd etdi ki, vəzifəsindən asılı olmayaraq, istənilən seçici səs verdikdən sonra məntəqəni tərk etməlidir, əgər etmirsə bu qanun pozuntusudur, bunu da bilavasitə veb-kamera qeydə alır. "Digər bir məsələ də var: tutalım, bir nəfər bir neçə nəfərin əvəzinə səs verməyə cəhd edərsə, o komissiyadan səsvermə bülletenini alanda veb-kamera ilə izləmək olar ki, o vəsiqəsini verdikdə ona bir dənə, yoxsa beş dənə bülleten verdilər. Veb-kameralar səsvermənin şəffaflığını, demokratikliyini təmin edir. Amma Azərbaycanı istəməyən qüvvələr var və onlar buna qara yaxırlar. O qüvvələr iddia edirlər ki, guya bu veb-kameralar seçkiyə nəzarət üçün quraşdırılır, xeyr, elə deyil. Bu qətiyyən seçiciyə nəzarət üçün quraşdırılmır. Gizli səsvermə kabinəsində hər bir seçici istədiyi namizədə səs verib bülleteni qutuya atır"-deyə M.Zülfüqarlı qeyd etdi.
İradə SARIYEVA
