NATO Rusiya əleyhinə “qoşunların çevik dislokasiyası” planını işə saldı... Üç ölkə imzaladı...
İbrahim Rüstəmli: "Hələ ki, birbaşa NATO-Rusiya qarşıdurması gözlənilmir"
Niderland, Almaniya və Polşa qoşunların və hərbi texnikanın hərəkəti üçün dəhlizin yaradılmasına dair bəyannamə imzalayıb. Bu, qoşunların çevik dislokasiyasını özündə ehtiva edir.
2022-ci ildə Rusiyanın Ukraynaya genişmiqyaslı hücumu başladıqdan sonra NATO və Aİ Moskva ilə hərbi münaqişə olacağı təqdirdə hazırlıqları sürətləndirdi. Bu halda ABŞ və digər NATO müttəfiqləri Almaniya və Polşa vasitəsilə Şərqə böyük hərbi qüvvələr göndərməli olacaqlar. Brüsseldə Avropa Müdafiə Agentliyində çıxış edən Hollandiyanın müdafiə naziri Kaysa Ollonqren hər hansı mümkün münaqişə başlamazdan əvvəl silahlı qüvvələrin sürətlə yerləşdirilməsi üçün şəraitin yaradılmasının son dərəcə vacib olduğunu bildirib. Şimali Atlantika Alyansı üzv ölkələrə xəbərdarlıq edib ki, həddən artıq bürokratik gecikmələr bütün Avropada qoşunların hərəkətinə mane olur və bu problem Rusiya ilə münaqişə vəziyyətində ciddi ləngimələrə səbəb ola bilər.
Görünən odur ki, NATO Rusiya ilə müharibəyə daha bir hazırlıq addımı atdı.
"Üç ölkənin məlum qərarı həm hərbi hazırlıqdır, həm də Rusiyaya siyasi-psixoloji təzyiq"
Sözügedən məsələni "Bakı-Xəbər"ə şərh edən hərbi ekspert İbrahim Rüstəmli hesab edir ki, NATO-Rusiya qarşıdurması artıq çoxdan başlayıb: "Niderland, Almaniya və Polşanın məlum razılaşması bunun bir tərkib hissəsidir. Mövcud geosiyasi və hərbi reallıqlar çərçivəsində Rusiya ilə Qərbin bir-birilə vuruşduğunun şahidiyik. Ukrayna müharibəsi Qərbin Rusiyaya qarşı dirənişi deməkdir. Qərb Ukrayna müharibəsinin başlanmasında maraqlı idi və bu məqsədinə də nail oldu. Hazırda əslində Ukrayna-Rusiya savaşı deyil, Qərblə Rusiya arasında savaş gedir. Düzdür, NATO bir təşkilat olaraq Rusiyaya qarşı döyüşmür. Ancaq Alyansda təmsil olunan ölkələrin mütləq əksəriyyəti artıq Rusiya ilə döyüşürlər. Yəni Ukrayna vasitəsilə Rusiyaya qarşı döyüşürlər. Son vaxtlar isə proseslər daha da genişlənir. Niderland, Almaniya və Polşa prosedurları sadələşdirmək üçün saziş imzalayırlar. Onsuz da NATO-nun müəyyən qüvvələri Polşaya, Baltik ölkələrinə gətirilib. Üç ölkənin məlum qərarı həm hərbi hazırlıqdır, həm də Rusiyaya siyasi-psixoloji təzyiq. Digər tərəfdən Avropa İttifaqı artıq Ukraynaya 50 milyard avronun ayrılmasına qərar verdi. Bütün bunlar Rusiyaya hərtərəfli təzyiq vasitəsidir. Xüsusən də Polşa Rusiyaya daha çox nifrət edir və bunun da bir sıra tarixi səbəbləri var. Təsadüfi deyil ki, Ukraynaya ən çox hərbi dəstək verən ölkələrdən biri də Polşadır. Hələ ki, birbaşa NATO-Rusiya qarşıdurması gözlənilmir. Ancaq NATO Rusiyanın resurslarını tükəndirməkdən ötrü bütün vasitələrdən istifadə edəcək. Ukraynada müharibənin uzanması həm də Rusiyanın tükəndirilməsi strategiyasının tərkib hissəsidir".
Vidadi ORDAHALLI
