Akif Nağı: "...Regionda gürcülərin əsas məsələləri Azərbaycanın köməyi, müttəfiqliyi ilə həll oluna bilər"
"Azərbaycan üçün qarşıdan gələn prezident seçkiləri vacibdir. Çünki seçkilər müstəqillik əldə etdikdən sonra ilk dəfə bütün ölkə ərazisində baş tutacaq". Bu fikirləri secki-2024.az saytına gürcü ekspert, siyasi elmlər doktoru Soso Mancavidze bildirib.
Onun sözlərinə görə, Azərbaycanda keçiriləcək prezident seçkilərinin təkcə Azərbaycan üçün deyil, həm də Gürcüstan və ümumilikdə region üçün əhəmiyyəti həddindən artıq böyükdür.
"Gürcüstan üçün bu nümunə onun ərazi bütövlüyünün bərpasına olan ümidləri gücləndirir. Region üçün isə bu, sülh və firavanlıq perspektividir. Azərbaycan xalqına uğurlu prezident seçkiləri arzu edirəm. Bu seçkiləri həqiqətən də tarixi adlandırmaq olar", - Soso Mancavidze deyə fikrini yekunlaşdırıb.
Gürcü ekspert nəyi nəzərdə tutur? Gürcüstan eksperti 7 fevral seçkisini öz ölkəsilə niyə əlaqələndirdi?
"Güclü Azərbaycan həm ölkənin daxili stabilliyi, həm də bütün Cənubi Qafqazda inkişaf, stabillik üçün bir təminatdır"
Azad Vətən Partiyasının sədri Akif Nağı "Bakı-Xəbər"ə şərhində bildirdi ki, Azərbaycanda gedən proseslər bütövlükdə Cənubi Qafqaz və Mərkəzi Asiya üçün təsir imkanlarına malikdir. "Bunu artıq hər kəs etiraf edir, Qərb də, Avropa da, Rusiya da bilir, öz hərəkətlərini də buna uyğunlaşdırırlar. Kimlərin xoşuna gəlmirsə təzyiq göstərməyə çalışırlar, kimlər öz maraqlarına uyğunlaşdıra bilirlərsə Azərbaycanla yanaşı addımlamağa çalışırlar. Belə bir vəziyyətdir. Bunlar Azərbaycanın regionda lider dövlətə çevrilməsinin göstəriciləridir. Gürcü ekspert də Azərbaycanda keçirləcək prezident seçkilərinin həm Gürcüstan, həm region üçün əhəmiyyətini qeyd edir. Bu bizim üçün də çox vacib məqamdır. Gürcü eksperti də adi ekspert deyil, görünür, bu işlə ciddi məşğul olan şəxsdir, elmi dərəcəsi və təcrübəsi olduğu özünü büruzə verir. Ona görə də belə bir adam təsadüfi söz demir. Gürcüstanda ölkənin ərazi bütövlüyü ilə bağlı bir bədbinlik var, bu onun işarəsidir. Demək olar ki, onlar bundan ümidlərini tamam üzüblər. Biz on il bundan əvvəl Gürcüstana gedib-gələndə orada ekspertlərlə, siyasilərlə görüşürdük. Orada sürgündə olan Suxumi hökuməti, parlamenti var. Onlar Suxumidən çıxarılan gürcülərdir və Tiflisdə özlərinə mühacir hökumət, parlament qurublar, ictimai rəyə təsir göstərməyə çalışırlar. Biz onların rəhbərləri ilə görüşürdük, çox ümidsiz idilər. Xüsusən də 2018-ci il Rusiya-Gürcüstan qarşıdurmasından sonra onlar ümidlərini tamam itirmişdilər. Ona görə də Azərbaycanın İkinci Qarabağ müharibəsindəki qələbəsi gürcüləri də ruhlandırdı. Nəzərdə tutulur ki, Azərbaycan hərbi yolla torpaqlarını azad etdi və ondan sonra həm Rusiya, həm Qərb tərəfindən edilən təzyiqlərə davam gətirə bildi, bu gün də davam gətirir, getdikcə təzyiqlərin artmasına baxmayaraq onların qarşısında dayanır. Azərbaycan bu təzyiqləri neytrallaşdırmaq yolunu tapıb, bu baxımdan da Gürcüstan üçün bu təcrübə maraqlıdır"-deyə A.Nağı vurğuladı.
Partiya sədrinin sözlərinə görə, Gürcüstan bu gün Qərbə, Avropaya inteqrasiya yolunu tutub, Avropa İttifaqına üzvlüklə bağlı namizədliyi də gündəmdədir: "Çox ehtimal ki, gürcü ekspertin fikirləri təkcə Azərbaycana yox, Gürcüstan hakimiyyətinə də yönəlib. Biz Gürcüstan hökumətindən də istədiyimiz dəstəyi görmədik. Xüsusən də AŞPA Azərbaycana qarşı məlum addımı atanda, sanki Gürcüstan Azərbaycana olan bu təzyiqləri nəzərə almadan elə düşünür ki, qapılar açılır, sürətlə Qərbə, Avropaya doğru gedir. Oradan nə qazanacaqlar bilinmir. Fikrimcə, gürcü ekspertin fikirləri Gürcüstan hakimiyyətinə yönəlib ki, Azərbaycanla münasibətləri normal saxlamaq lazımdır, regionda gürcülərin əsas məsələləri Azərbaycanın köməyi, müttəfiqliyi ilə həll oluna bilər. Eyni zamanda da Türkiyənin. Qənaətimə görə, o həm də buna işarə edib. Hər bir dövlət üçün əsas məsələ onun ərazi bütövlüyüdür. Gürcüstan bu gün ərazi bütövlüyünü ön plana çəkir, yoxsa Avropaya inteqrasiyanı? Ortada bu məsələ var. Azərbaycan özü üçün ən önəmli məsələ olan ərazi bütövlüyü məsələsini önə çəkdi və ərazi bütövlüyünün bərpa olunmasına nail oldu. Təzyiqlər də var. Azərbaycan Qərbə inteqrasiyanın əleyhinə deyil, amma sadəcə olaraq Qərbə inteqrasiya Azərbaycanın milli maraqlarının tapdanması, arxa plana keçirilməsi hesabına olmamalıdır. Azərbaycan düzgün siyasət yeridir. Hesab edirəm, gürcü mütəxəssis bu məsələyə də öz hökumətlərinin diqqətini cəlb edir ki, bu Azərbaycan nümunəsindən yararlanmaq lazımdır.
7 fevral prezident seçkilərinə gəlincə, hesab edirəm ki, Azərbaycan region üçün də prezident seçkilərini keçirir, cəmiyyətin əhval-ruhiyyəsini, ümimi mövqeyini ortaya qoyur. Bu seçkilərdə Azərbaycan xalqı 44 günlük müharibədəki qələbəyə münasibətini bildirəcək".
A.Nağı qeyd etdi ki, xalqımız ərazi bütövlüyü və suverenliyi təmin olunmuş Azərbaycanın gələcəyinə, irəliyə getməsinə səs verəcək. "Bu seçki Azərbaycanın daxilindəki monolit birliyi göstərəcək. müharibədə o birlik göstərildi, indi də qalib gəlmiş ölkədə yenidən monolit birlik ortada olmalıdır. Azərbaycanın daxili nə qədər möhkəm olarsa, o həm öz maraqları naminə uğurlu siyasət yürüdə, eyni zamanda region üçün də stabillik məkanına çevrilə bilər. Güclü Azərbaycan həm ölkənin daxili stabilliyi, həm də bütün Cənubi Qafqazda inkişaf, stabillik üçün bir təminatdır. Gürcülər də bunu öz maraqları üçün dəyərləndirir. Böyük ehtimalla, bu və digər məqamlar nəzərdə tutulur"-deyə A.Nağı əlavə etdi.
İradə SARIYEVA
