Mehman Muradlı: "Biz Ermənistan tərəfindən Konvensiyanın müddəalarının kobud şəkildə pozulması ilə əlaqədar beynəlxalq hüquq çərçivəsində ədaləti təmin edəcəyik"
Ermənistan rəsmi olaraq Haaqa Beynəlxalq Cinayət Məhkəməsinə qoşulub. Fevralın 1-dən Ermənistanda BCM-nin Roma Nizamnaməsi qüvvəyə minib. Bu barədə Deutsche Welle (DW) agentliyinə Ermənistanın beynəlxalq hüquq məsələləri üzrə nümayəndəsi Yeqişe Kirokosyan məlumat verib:
"ICC-yə qoşulmaq Ermənistana öz ərazisində hərbi cinayətlərin və insanlığa qarşı cinayətlərin qarşısını almaq imkanı verir".
Onun sözlərinə görə, bu, ilk növbədə Azərbaycana aiddir.
Ermənistan 2023-cü il oktyabrın 3-də Roma Statutunu ratifikasiya edib. 2023-cü ilin noyabrında BCM Nizamnamənin Ermənistanda 2024-cü il fevralın 1-dən qüvvəyə minəcəyini elan etdi.
Ermənistan bu məsələnin niyə məhz Azərbaycana aid olduğunu deyir?
Hüquqşünas Mehman Muradlı "Bakı-Xəbər"ə açıqlamasında bildirdi ki, Ermənistan Roma Statutunu əsasən Putinə görə ratifikasiya edib: "Bunu bütün dünya bilir. Ancaq diqqəti özündən yayındırmaq üçün izi dəyişir. Rusiya bu məsələyə sərt etiraz edib. Buna görə də Ermənistan onun qəzəbindən qaçır. Açıqlamada deyilir ki, Ermənistana öz ərazisində hərbi cinayətlərin və insanlığa qarşı cinayətlərin qarşısını almaq üçün bu addımları atır. Ermənistanın özü başqa ölkənin ərazisini işğal edib, oralarda vəhşiliklər törədib. Onun özünün insanlığa qarşı olan addımları araşdırılmalı və onlara düzgün hüquqi qiymət verilməlidir. Çox güman ki, Ermənistan həm də bununla Azərbaycan əleyinə aparacağı kampaniyanın əsasını qoymaq istəyir. Dəfələrlə iddia edir ki, güya biz 44 günlük müharibədən sonra onun ərazisinə daxil olmuşuq. Halbuki belə hadisələr olmayıb. Azərbaycan onların təxribatlarının qarşısını almaq üçün bəzi qabaqlayıcı addımlar həyata keçirib.
Beynəlxalq Ədalət Məhkəməsi Azərbaycanın müraciəti əsasında rəsmi Bakının İrəvana qarşı müvəqqəti tədbirlərin görülməsi ilə bağlı çağırışlarını dinləyib.
Azərbaycanlı nümayəndə Ermənistandan "Azərbaycan ərazilərini minalamağı dayandırmağı və əvvəlki illərdə basdırılan minaların yerini bildirməyi" tələb edib.
Azərbaycan Xarici işlər nazirinin müavini Elnur Məmmədov deyib ki, basdırılan minalar məcburi köçkünlərin təhlükəsiz şəkildə Qarabağa qayıtmalarına təhdid yaradır. Tərəflər arasında hüquqi çəkişmələr İkinci Qarabağ müharibəsi bitəndən sonra başlayıb. Yaxşı olardı ki, Ermənistan bu tip iddialara aydınlıq gətirsin. Ərazilərimizin bir hissəsinin Ermənistan tərəfindən qanunsuz işğalına son verildikdən sonra azərbaycanlılara qarşı insan hüquqlarının kobud şəkildə pozulmasına dair faktlar tərəfimizdən diqqətlə toplanıb və sənədləşdirilib. Buraya Ermənistanın azərbaycanlıları etnik mənşəyinə görə zor gücünə qovması, işgəncə verməsi, öldürməsi və qəddar rəftar etməsi halları daxildir. Bir milyondan çox azərbaycanlı Ermənistanın təcavüzü nəticəsində evlərindən zorla qovulub. Azərbaycanın şəhərləri tamamilə yer üzündən silinib. Üçtərəfli bəyannamənin imzalanmasından sonra Ermənistan keçmiş işğal olunmuş ərazilərdə minaların basdırılması vasitəsilə azərbaycanlı məcburi köçkünlərin evlərinə geri dönməsinin qarşısını alaraq və minalanmış ərazilərin xəritələrini Azərbaycana verməkdən imtina etməklə Beynəlxalq Konvensiyanı pozmağa davam etdi. Biz Ermənistan tərəfindən Konvensiyanın müddəalarının kobud şəkildə pozulması ilə əlaqədar beynəlxalq hüquq çərçivəsində ədaləti təmin edəcəyik. Ermənistan belə əsassız bəyanatlar verməklə izi özündən yayındırmağa çalışır".
Məhəmmədəli QƏRİBLİ
