Tofiq Abbasov: "Bunlar hamısı əbəsdir. Bizi öz yolumuzdan döndərə bilməyəcəklər"
Qısa müddət ərzində Azərbaycana qarşı 3 istiqamətdə hücum reallaşdı. Əvvəlcə Fransa Senatı yanvarın 17-də Azərbaycanın ötən ilin sentyabr ayında Qarabağda keçirdiyi hərbi əməliyyatı pisləyən, Ermənistana hərbi dəstəyə, Azərbaycana qarşı sanksiyalara çağıran qətnamə qəbul etdi.
Qətnamə layihəsinin müəllifi Bruno Retayo müzakirələrdə çıxışı zamanı Azərbaycanın ötən il 19-20 sentyabr tarixlərində Qarabağda həyata keçirdiyi hərbi əməliyyatın "humanitar faciə və əsl etnik təmizləmə" ilə nəticələndiyini qeyd edib.
Fransalı senatorlar Fransa hökumətini Ermənistana özünü müdafiə edə bilməsi, ərazi bütövlüyünə qarşı təhdidlərin qarşısını ala bilməsi üçün zəruri vasitələr, o cümlədən hərbi dəstək verməyə çağırıblar.
Ardınca isə Avropa İttifaqının rəhbərliyi faktları saxtalaşdırmağa, təhrif etməyə başlayıb. Bu, Avropa İttifaqının xarici əlaqələr və təhlükəsizlik siyasəti üzrə ali nümayəndəsi, Aİ Komissiyasının vitse-prezidenti Cozep Borrellin çıxışlarında özünü daha qabarıq göstərir. O iddia edir ki, guya Azərbaycan Ermənistana qarşı ərazi iddiaları ilə çıxış edib. Guya Azərbaycan Ermənistan ərazisini "işğal edib" və s. təhriflərlə Azərbaycana qarşı ittihamlar irəli sürüb.
Aİ-də Fransa hakimiyyəti hegemonluq edir. Borrellin də çıxışı daha çox rəsmi Parisin nümayəndəsinin çıxışını xatırladır.
Ən sonda isə Avropa Şurası Parlament Assambleyası (AŞPA) yanvarın 24-də Azərbaycan nümayəndə heyətinin AŞPA-nın 2025-ci ilin yanvar sessiyasına qədər səsvermə hüququndan məhrum edilməsinə dair qətnamə qəbul edib.
Sənədin 76 deputat lehinə, 10 deputat əleyhinə səs verib, 4 deputat bitərəf qalıb.
Fransa Senatının qərarı, Borrelin hücumu və AŞPA-nın qətnaməsi kimi 3 məsələnin eyni vaxtda Azərbaycana qarşı baş verməsi təsadüf sayıla bilərmi?
Politoloq Tofiq Abbasov "Bakı-Xəbər"ə açıqlamasında bildirdi ki, bu təsadüf deyil: "Qərbdə anti - Azərbaycan koalisiyası formalaşıb. Söhbət siyasi qruplardan gedir. Sirr deyil ki, bu prosesə özünün tərəfdarları və həmfikirləri ilə başçılıq edən Fransa prezidenti Makrondur. Sözün əsl mənasında Azərbaycanı ləkələmək məqsədi ilə hərəkət edirlər. Ancaq bu alınan iş deyil. Çünki Azərbaycan dünya çapında özünü təsdiqləmiş bir dövlətdir. Biz həm Qoşulmama Hərəkatında, həm Türk Dövlətləri Birliyi Təşkilatında bütün formatlarında varıqsa, uğurla fəaliyyət göstəririk, imkanlarımızı, gücümüzü nümayiş etdiririk və münasibətlərə yalnız sabitlik, inkişaf elementlərini gətiririk. Bunu da heç kim inkar edə bilməz. Ona görə də bölgədə etibarlı nizam yaradırıq. Çünki bu prosesin təməli qoyulub. Amma ən böyük görüləsi işləri qabaqdadı. Bu baxımdan da diqqəti cəlb edən 3 + 3 formatıdır və bu da rəsmi Bakının təşəbbüsüdür və Ermənistanı çıxmaq şərti ilə qonşu dövlətlərdə böyük diqqət və gözləntilərlə qarşılandı. Bu formatın qarşısında duran əsas məqsəd nədən ibarətdir? Bölgənin problemlərini bölgə qismində həll etsinlər. Bu hələ ki, əməkdaşlıq təşkilatı qismində düşünülməyib. İlk növbədə məşvərət platformasıdır. Tehranda bu yaxınlarda keçmiş xarici işlər nazirlərinin görüşü bir daha təsdiqlədi ki, Gürcüstan da bu platformaya qoşulmağa hazırlaşır. Burada çox böyük əmmalar var. Ancaq proses gedir. Həm Qərbdə bizim düşmənlərimiz Azərbaycanın böyük, möhtəşəm qələbəsini bizə bağışlamırlar, həm də bu platformanın gündəmə gəlməsini qıcıqla qarşılayırlar. Amerika, Avropa İttifaqı bu platformaya yox deyirlər. Ancaq biz artıq özümüzü təsdiqləmiş məmləkət kimi göstərdik ki, bütün yanaşmalarda sağlam ruh var. Onların bu oyunbazlıqlarına baş qoşsaq, öz əsas məsələlərimizdən uzaqlaşa bilərik. Ona görə də, biz əsas istiqamətlərdə bacarığımızı toplayaraq istədiklərimizə nail oluruq. Avropa çalışır ki, Qafqaz bölgəsinə ekspansiya etsin. Çünki burada güclü Azərbaycan var. Biz həm Şərqdə, həm Şimal - Cənub strateji dəhlizlərin ən aparıcı bəndiyik. Bəli, balaca dövlət ola bilərik. Ancaq bütün vacib kommunikasiyalar bizim iştirakımızla ərsəyə gəlir. Bunu da düşmənlər görə bilmirlər. Əvvəl - axır öz istəyimizə nail oluruq. Qərb bizim inkişafımızın qarşısını ala bilməyəcək. Makron, Avropa İttifaqının bəzi ölkələri, hamısı bu proseslərdə iştirak edir. Dərinə gedəndə görürük ki, özləri öz maraqlarını baltalayırlar. Əgər Azərbaycan Avropa İttifaqının əsas enerji təminatçılarından biridirsə, nə üçün onlar bizi sıxma-boğmaya salmaq, səsimizi kəsmək istəyirlər, AŞPA - da bizim ünvanımıza iftiralar yazdırırlar? Odur ki, bunlar hamısı əbəsdir. Bizi öz yolumuzdan döndərə bilməyəcəklər. Çünki Azərbaycanın siyasi kursu çox praqmatik və rasionaldır".
Məhəmmədəli QƏRİBLİ
