Uşaq və gənclərin fiziki və mənəvi inkişafı ölkəsinin, yaşadığı cəmiyyətin, xalqının inkişaf göstəricisidir. Çünki istənilən uşaq hansı mühitdə böyüyürsə, gələcəkdə məhz o mühitdə görüb-götürdüklərini nümayiş etdirir. Bu anda Ümummilli Lider Heydər Əliyevin yaddaşlardan çıxmayan, hər zaman dilimizdə əzbər olan "Gənclər bizim gələcəyimizdir" kəlamı yada düşür.
Azərbaycanda dövlət gənclər siyasətinin əsas istiqamətləri də məhz Ulu Öndər Heydər Əliyev tərəfindən müəyyənləşdirilib. Ümummilli Lider tərəfindən bu istiqamətdə həyata keçirilən uğurlu siyasət hazırda Prezident İlham Əliyev tərəfindən layiqincə yerinə yetirilir. Dövlət başçısının söylədiyi "Bizim siyasətimizin mərkəzində Azərbaycan vətəndaşı dayanır" fikri ölkədə həyata keçirilən yüksək siyasətin əsasını təşkil edir. Ölkə başçısı respublikamızda uşaqlara dövlət qayğısının gücləndirilməsi, uşaq problemlərinə vətəndaş cəmiyyəti qurumlarının diqqətinin artırılması və ölkənin uşaqlarla bağlı demoqrafik perspektivlərinin müəyyənləşdirilməsi məqsədilə mütəmadi olaraq dövlət proqramlarının həyata keçirilməsi istiqamətində sərəncamlar imzalayır, bu kontekstdə mühüm tədbirlər görülür. Bununla yanaşı, ölkəmizdə uşaq və gənclərin fiziki və mənəvi inkişafı üçün mühüm addımlar atılır. Görülən işlər bunu deməyə əsas verir ki, bu sahə ölkəmizin əsas prioritetlərindən biridir.
Azərbaycan gəncliyi özünü davamlı şəkildə yeniləməlidir
Azərbaycan gəncliyi sözün böyük mənasında xəlqi təmələ, bəşəri sevgiyə malik olmalıdır. 70 illik əsarət dövrünü yaşayan Azərbaycanda müstəqillikdən sonrakı dövr sözün böyük mənasında milli-mənəvi dəyərlərə qayıdış üçün geniş imkanlar açdığı dərəcədə bu, başqa, daha doğrusu yad, özgə təsəvvürlərin, baxışların yurdumuza ayaq açması, cövlan etməsi ilə müşahidə olundu. Təəssüf ki, bu gün sözün böyük mənasında dünyabaxışı, yaşam tərzi formalaşdırılması yönündə ciddi iş görə biləcək əhəmiyyətli yaradıcı sahələr bu baxımdan ziqzaqlı, gərgin dövrünü yaşamaqdadır. İstər-istəməz Qərb dəyərlərinin soydaşlarımızın ağlına, ruhuna işləməsi, gündən-günə daxilləri çulğaması, qarışdırması problemi daha da çıxılmazlığa salır. Başqa tərəfdən də Şərq aləminin qarışıqlığı, halsızlığı bu gərginliyi artırır. Bu gün çox hallarda özgələşməyə qarşı dirəniş yaranmır. Ancaq müqavimət nə qədər ki, qəti deyil, o zaman bu cür "mübarizələr" sadəcə effektiv bir görüntü təsiri bağışlayacaq. Bir sözlə, Azərbaycan gəncliyi özünü davamlı şəkildə yeniləməlidir.
Qərbin bizə qarşı artan açıq təzyiqləri fonunda (AŞPA-dakı qərəzli münasibət) onların həyata keçirmək istədikləri layiələrin əsasını gəncləri ələ alıb, bu kateqoriyanı öz maraqlarına xidmət etdirmək təşkil edir. Gənclərimizin mənəvi inkişafına yönələn bu yad təsirləri neytrallaşdırmaq üçün daha hansı addımlar atılmalıdır?
Azərbaycan gənci xarici təsirlərə heç vaxt uymayacaq
Milli Qəhrəmanları Tanıtma İctimai Birliyinin sədri Elşən Uluxanlı "Bakı-Xəbər"ə açıqlamasında bildirdi kiğ, bu gün Azərbaycan cəmiyyətində gəncləri çaşdıran, xüsusən də xarici qüvvələrin təsiri ilə Azərbaycanda qarışıqlıq yaratmaq istəyən qüvvələr var: "Yəni müharibədən sonra qələbə ruhumuzu, Qarabağdakı quruculuq işlərimizi həzm etməyən qüvvələr dövlətimizdə hökm sürən bu sabitliyi, monolit birliyimizi pozmaq istəyirlər. Həmin xarici qüvvələr ölkə daxilində özlərinin bəzi "dəstəkçi"ləri vasitəsilə Azərbaycan gənclərini bu mənfi, çirkin oyunlarına qoşmaqla ölkə daxilində xaos, ajiotaj yaratmaq, Azərbaycan gənclərini dövlətə, hakimiyyətə qarşı qaldırmaq istiqamətində fəaliyyət göstərmək istəyirlər. Amma bir şey aydındır ki, Azərbaycan gənci artıq həm o müxalif adlanan qüvvələri, eyni zamanda onların xarici havadarlarının bu təsirlərinə heç vaxt uymayacaq. Təbii ki, onların təsirləri altında heç vaxt bu dövlətə qarşı çıxmayacaqlar. Azərbaycan dövləti, əsasən də gəncliyi hər zaman dövlətin yanındadır. Gənclərimiz Azərbaycan dövlətinin, Prezidentinin, onun ölkə daxilindəki fəaliyyətini görürlər. Bu gün Azərbaycan Prezidentinin əzmlə Qarabağda apardığı quruculuq işlərini ölkə gəncləri dəstəkləyir və dəstəkləyəcək də. Heç zaman həmin o qüvvələrin təsiri altında dövlətimizə qarşı çıxmayacaqlar. Hər zaman mübarizələri Azərbaycan dövlətinin qorunması, Azərbaycan dövlətinin inkişafı və tərəqqisi olacaq".
Bu gün Azərbaycan dövləti gənclərin yüksək təhsil alması üçün bütün lazımi addımları atır. Xüsusilə təhsilimizin maddi-texniki bazasının gücləndirilməsi, dünya təhsilinə inteqrasiyası istiqamətində sistemli tədbirlər həyata keçirilir. Gənc nəslin yüksək biliklərə sahib olması, vətənpərvər ruhda yetişdirilməsi, istedadlı gənclərin üzə çıxarılması, dünyanın nüfuzlu ali məktəblərinə təhsil almağa göndərilməsi və s. addımlar bu qəbildəndir. Gəncliyin inkişafı istiqamətində müxtəlif dövlət proqramları da icra olunub. Həmin gənclərin böyük əksəriyyəti yüksək biliklərə sahib olan mütəxəssislər kimi dövlət və özəl sektorda çalışırlar. Gənclərimizin xaricdə magistratura təhsili ilə bağlı yeni dövlət proqramı da hazırlanır. Həmin proqram 2022-2026-cı illəri əhatə edəcək. Bu proqramların məqsədi Azərbaycan gəncliyinin müasir biliklərə sahib olmasıdır.
Məhəmmədəli QƏRİBLİYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
