Məlum olduğu kimi, Avropa Şurası Parlament Assambleyasının yanvarın 24-də axşam iclasında Azərbaycan nümayəndə heyətinin AŞPA-nın 2025-ci ilin yanvar sessiyasına qədər səsvermə hüququndan məhrum edilməsinə dair 15898 saylı qətnaməni təsdiqləyiblər.
Onu da bildirək ki, Azərbaycan nümayəndə heyəti hələ səsvermədən əvvəl təşkilatı tərk edib. AŞPA-da formalaşmış dözülməz irqçilik, azərbaycanofobiya və islamofobiya mühiti qarşısında azərbaycanlı nümayəndə heyəti AŞPA-da qarşılıqlı fəaliyyətini və mövcudluğunu dayandırmaq qərarına gəlib.
Əslində AŞPA Azərbaycanın milli-mənəvi dəyərlərinə kökündən zidd olan LGBT+ (lezbiyan, gey, biseksual, transseksual) hüquqlarının qorunması, eynicinsli nikahlara icazənin verilməsini istəyir. AŞPA Azərbaycan təhsil müəssisələrində LGBT-nin təbliğ olunmasını tələb edir.
LGBT isə Azərbaycanın milli-mənəvi dəyərlərinə uyğun deyil. Bu səbəbdən Azərbaycan tərəfi bu istəyə qəti şəkildə qarşı çıxıb. Əslində onlar yaxşı bilir ki, LGBT-nin təhsil müəssisələrində tədrisi cəmiyyətin məhvinə, ailələrin dağılmasına səbəb olacaq. Ona görə də ölkəmiz bu qərarının üstündə dayanır.
Ceyhun Məmmədov: "Azərbaycanda LGBT-yə yer yoxdur və heç zaman olmayacaq da, heç kim bu məsələ ilə bağlı ölkəmizə təzyiq edə bilməz"
Məlum məsələ ilə bağlı fikir bildirən Milli Məclisin Elm və təhsil komitəsinin üzvü, deputat Ceyhun Məmmədov "Bakı-Xəbər"ə şərhində bildirdi ki, bu gün bir çox Avropa dövlətləri, təsisatları, AŞPA və digər qurumlar çox ciddi cəhdlə LGBT adlı biabırçılığı dünyaya yaymaq istəyir: "Təəssüf ki, bunun qanuniləşdirilməsi üçün davamlı olaraq müxtəlif addımların atıldığının da şahidi oluruq. Azərbaycanda LGBT-yə yer yoxdur və heç zaman olmayacaq da. Heç kim bu məsələ ilə bağlı ölkəmizə təzyiq edə bilməz. Əslində bizi düşündürən məsələ odur ki, Avropa təsisatları, qurumları LGBT-nin yayılması ilə nəyə nail olmaq istəyir, nə əldə etmək istəyir? LGBT onların mənsub olduğu dinə belə ziddir. Təəssüf ki, biz bu gün film, kino, hətta cizgi filmlərində belə LGBT-nin təbliğatını görə bilirik. Bu qəbuledilməz və kökündən yanlış bir məsələdir. Onlar öz eybəcərliklərini bizim ölkəmizdə də yaymaq istəyir. Əlbəttə, Azərbaycan cəmiyyəti hər zaman buna öz etirazını bildirib".
Kamran Əsədov: "Biz heç vaxt imkan verə bilmərik ki, LGBT ölkəmizə ayaq açsın, Azərbaycanın ailə dəyərləri, milli davranışlarına zidd olan təsirlər təhsildə söz sahibi olsun"
Təhsil eksperti Kamran Əsədov "Bakı-Xəbər"ə açıqlamasında qeyd etdi ki, son illər ərzində Amerika, Avropa, xüsusən də Fransa Azərbaycanda təhsilin müxtəlif pillərinə müdaxilə etmək istəyir: "Onlar Azərbaycanın mental dəyərlərinə, tarixi keçmişinə uyğun olmayan formatda qarışmaq istəyir. Avropada bir sıra təhsilin beynəlxalq qiymətləndirmə sistemləri var. Bu qiymətləndirmə sistemləri təəssüf ki, Azərbaycan təhsil sisteminin inkişafını deyil, təhsildə dəyərlər sisteminin formalaşmasını diqtə edir. Onu da deyim ki, beynəlxalq reytinq siyahıları Avropanın nəzərdə tutduğu standartlarla ölçülür. Bu gün inkişaf etmiş ölkələrin təcrübəsindən yararlanmaq lazımdır. Ancaq bir sıra məsələlər var ki, azərbaycançılıq məfkurəsi ən vacib ideologiya kimi götürülməlidir. Avropa hesab edir ki, LBGT kimi məsələlərə ali təhsil müəssisələrində loyal yanaşılmalıdır. Ancaq bu belə olmamalıdır. Məlumdur ki, Azərbaycanın qədim dövlətçilik ənənəsi var. Azərbaycanın dövlətçilik ənənəsi, təhsili, tarixi Fransadan da qədimdir. Sadəcə olaraq, ölkəmiz uzun müddət Sovetin təsirində olduğu üçün Azərbaycan Avropa təhsilindən geri qalıb. Onu da deyim ki, vaxtilə Azərbaycanda elmi ixtiralar olarkən Avropada bu istiqamətdə irəliləyiş yox idi. Məsələn, Yusif Məmmədəliyev, Mirəli Qaşqayın kəşflərini nümunə kimi göstərə bilərik. Azərbaycanda elmi ixtiralar, kəşflər edilərkən Avropada bu istiqamətdə heç bir iş görülmürdü. Bizim dahi Nizami Gəncəvi ilə Fransanın müqayisə edə biləcəyi şəxs yoxdur. Tarixə nəzər yetirsək görərik ki, fransızlar öz krallarının başını kəsib. 1789-cu ildə Fransada keçirilən inqilab və ya 1572-ci ildə bu ölkədə Varfolomey gecəsi zamanı onların dini tolerantlığının hansı səviyyədə olduğu hər kəsə bəllidir. Xatırladım ki, Varfolomey gecəsi zamanı onlar öz insanlarını qətlə yetirib, amansız işgəncələr verib. Ümumiyyətlə, fransızların bütün fəaliyyətləri saxta olub".
Həmsöhbətimiz xüsusi olaraq vurğuladı ki, bu gün Avropanın özünün formalaşdırdığı dəyər sistemi var. Bu dəyərlər isə Azərbaycana ziddir.
K.Əsədov hesab edir ki, Azərbaycanın AŞPA-dan çıxmasının ölkə təhsilinə heç bir təsiri olmayacaq. Azərbaycan təhsili dünya tədrisinə inteqrasiya edir. Müasir innavativ yeniliklər təhsil sisteminə tətbiq olunur, texnoloji yeniliklərdən geniş şəkidə istifadə olunur: "Bunların hər biri çox yaxşı haldır. Ən vacib addım Azərbaycanın ali təhsilinin əmək bazarında keyfiyyətinin artırılmasıdır. Biz heç vaxt imkan verə bilmərik ki, LGBT ölkəmizə ayaq açsın, Azərbaycanın ailə dəyərləri, milli davranışlarına zidd olan təsirlər təhsildə söz sahibi olsun. Təbii ki, buna qarşı çıxılmalıdır. Onu da deyim ki, LGBT-nin olduğu yerdə təhsil uğurlu ola bilməz. Azərbaycan məktəblilərinin beynəlxalq olimpiadalarda əldə etdiyi uğurlar LGBT-ni dəstəkləyən Fransadan qat-qat yüksəkdir. Biz istənilən sahədə Fransa kimi ölkələrdən üstünük. O ölkələrdə dəyər anlayışı məhv olduğu üçün istəyirlər Azərbaycanda da eyni hal yaşansın".
Ekspert bildirdi ki, LGBT və digər məsələlərin Azərbaycan orta ümümtəhsil məktəblərinə ayaq açmasına şərait yaradılmamalıdır. Azərbaycanın öz milli dəyərləri var: "Məlumat üçün onu da deyim ki, Aleksandr Duma Azərbaycanda olarkən Azərbaycan dəyərləri haqqında yazı yazıb. Ona baxmaq, fikir vermək kifayətdir görəsən ki, Azərbaycan tarixən öz dəyərlərinə sadiq qalıb və qalacaq".
Günel CƏLİLOVA
