Xəyal Bəşirov: “Avropa Parlamentinin ermənilərdən aldığı böyük vəsaitlərlə bağlı gözükölgəliliyi var, ona görə də...”
Müharibə və digər ağır cinayətlər törətməkdə təqsirləndirilən erməniəsilli şəxslərin Bakı məhkəməsi Ermənistandakı və Avropadakı məlum dairələri ciddi narahat etdiyindən, onlar müxtəlif təxribatlara əl atır, qərəzli fikirlər səsləndirirlər.
Ermənipərəst mövqeyi, daim antiazərbaycan qərarları ilə xüsusi seçilən Avropa Parlamenti müxtəlif cinayətlərdə ittiham edilən və məhkəmə qarşına çıxarılan erməni əsilli şəxslərin müdafiəsinə qalxıb. Martın 13-də Avropa Parlamenti plenar iclasında Bakıda məhkəməsi gedən erməni əsilli şəxslərlə bağlı məsələyə baxılacağı bildirilir.
Bundan əlavə, Eçmiədzin kilsəsi də erməni əsilli şəxslərin müdafiəsi ilə bağlı bəyanat qəbul edib.
Həm Avropa Parlamentinin, həm də Katolikos II Qareginin rəhbərliyi ilə Eçmiədzin kilsəsinin açıqlama və bəyanatında əks olunan məsələlər, ittihamlar tamamilə absurddur.
Burda diqqət çəkən məqam odur ki, Avropa Parlamenti ilə erməni kilsəsi paralel olaraq bu cür çirkin addım atıblar. Avropa Parlamenti Bakıda həbsdə olan separatçılarla bağlı məsələ müzakirə edəcək. Bu birbaşa erməni layihəsidir, erməni lobbisinin əməlidir. Bununla eyni ərəfədə Eçmiədzin də eyni məsələni müzakirə edib. Bu iki hadisənin eyni vaxtda, sinxron baş verməsi Avropanın bəzi strukturlarının erməni kilsəsi və erməni lobbisi ilə nə qədər yaxın əlaqələrdə olduğunun sübutudur.
“Hər iki məsələnin paralel olaraq baş verməsi onu göstərir ki, bu, erməni diaspor və lobbi təşkilatlarının göstərişi ilə hazırlanıb”
Məsələyə şərh verən Siyasi və Hüquqi Araşdırmalar Mərkəzinin rəhbəri Xəyal Bəşirov "Bakı-Xəbər"ə bildirdi ki, son zamanlar Azərbaycan tərəfin ədalətin bərqərar olunması üçün atdığı addımlara Avropa Parlamenti və digər Qərb təsisatlarını, o cümlədən də erməni kilsəsi qərəzli yanaşır, buna ayrı cür don geydirməyə cəhdlər edirlər. “Azərbaycan uzun illər boyu Azərbaycan xalqına və Azərbaycan dövlətinə qarşı çox ağır cinayətlər törətməkdə ittiham olunan erməni əsilli şəxslərin məhkəməsini həyata keçirir. Buna görə Azərbaycana qarşı əsassız ittihamlar səsləndirilir. O qüvvələr məhv olmuş “rejimin” təmsilçiləri - Araik Arutyunyan, Arkadi Qukasyan, Bako Saakyan və digərlərinə təəssübkeşlik edirlər. Qarabağda yaşamış ermənilərin “müqəddəratı” ilə bağlı “narahatlıqları” əlində bayraq edən, Rusiya vətəndaşlığından imtina edib Ermənistan vətəndaşlığını qəbul edib qansuz olaraq Qarabağa gələn Ruben Vardanyan özünə “dövlət naziri” “statusu” götürmüşdü. Bu şəxslə bağlı da ara-sıra Azərbaycana qarşı əsassız ittihamların səsləndirildiyini görürük. Ermənistanın, erməni kilsəsinin belə fikirlərini hardasa, hansısa formada əsaslandırmaq olar. Yəni ittiham olunan şəxslərlə bağlı Ermənistan hakimiyyətinin, Nikol Paşinyanın narahatçılığını anlamaq mümkündür. Niyə? Çünki onlar törədilən çoxsaylı cinayətlərdə Nikol Paşinyan və onun komandasının bu və digər formada iştirakını ifşa edirlər. Təbii ki, bu, Ermənistan hökumətini narahat edir. Ona görə də Paşinyan istitaq zamanı o şəxslərə guya psixotop maddələrin verilməsi ilə bağlı absurd iddia irəli sürdü, sonra da Ararat Mirzoyan iddia etdi ki, ittiham olunan şəxslərin ifadə verməsi üçün Azərbaycan tərəfi guya işgəncə verib, hansısa qəddar adımlar atıb və sair. Bunlar əsassız və reallığa söykənməyən ittihamlardır, bu heç kim tərəfindən də ciddiyə alınmır. Ruben Vardanyanla bağlı Ermənistan tərəfin narahatlığını da anlamaq olar. Əslində, Vardanyan Ermənistanın baş nazirinə alternativ olacaq şəxsidir, indiki hakimiyyət üçün ən ciddi təhlükə yaradan fiqurdur. Onların məntiqi ilə yanaşsaq, Ermənistanın baş naziri onun mühakimə edilməsinə sevinir və sevinməlidir. Vardanyanın xarici banklarda külli miqdarda pulu var. Uzun illər ərzində qanunsuz yollarla əldə etdiyi həmin o pulların aqibətindən narahat olduqları üçün Paşinyan hakimiyyəti ara-sıra onunla bağlı da fikirlər səsləndirir”.
X.Bəşirov hesab edir ki, ümumiyyətlə, bu məsələyə bir neçə yöndən baxmaq lazımdır. Eçmiədzin kilsəsi və Avropa Parlamentinin paralel olaraq apardıqları şər-böhtan kampaniyasının səbəbinə gəlincə, X.Bəşirli hesab edir ki, burda da əsas məsələ R.Vardanyanın milyardları və erməni diasporunun onlara təsiridir. “Möhkəmlənməsi, ayaqda durması və Nikol Paşinyan hakimiyyəti qarşısında duruş gətirməsi üçün erməni kilsəsinə də Vardanyanın xarici banklardakı pulu lazımdır. Erməni kilsəsi də, Avropa Parlamenti də, digər təsisatlar da belə pullu şəxslərlə bağlı ayrı-ayrı vaxtlarda “təəssübkeşlik” göstəriblər. Amma burda həm də bir məqam var. Hakimiyyətə gəldiyi gündən Paşinyan erməni kilsəsi ilə qarşıdurmadadır. İkinci Qarabağ müharibəsindən sonra kilsə nümayəndəsi Baqrat Qalstanyanın etiraz aksiyaları təşkil etməsi və digər qarşıdurmalar, qarşılıqlı ittihamlar göstərir ki, Paşinyanla kilsə arasında münasibət çox soyuqdur, yaxın zamanlarda bu münasibətlərin düzəlməsi də ehtimal edilmir. Paşinyan həmişə erməni kilsəsinin gücünü, nüfuzunu, təsir imkanlarını zəiflətməyə çalışıb. Ona görə də Ermənistanda hakimiyyətə gətirilməsi və Paşinyan hakimiyyətinin devrilməsi, ondan qisasın alınması üçün potensial rəqib, namizəd Vardanyandır. Əgər Azərbaycan onu tutmasaydı və məhkəmə qarşısına çıxarmasaydı, o, erməni kilsəsi üçün xüsusi bir imkan olardı ki, Ermənistanın baş nazirini hakimiyyətdən devirsin. Hesab edirəm ki, kilsənin dəstəklədiyi Köçəryan, Sarkisyan kimi hakimiyyətə can atanların hakimiyyətə gəlmə şansı sıfıra bərabərdir, nüfuzları çox aşağıdır. Bu baxımdan, Paşinyana əsas rəqib kilsənin “qəhrəmanlaşdırdığı” Vardanyan ola bilər.
Ermənistan hakimiyyəti anlamalıdır ki, bu gün Azərbaycanın əlində Vardanyan kimi Paşinyana əsas alternativ ola biləcək şəxs var.
Təbii ki, erməni kilsəsinin məqsədi həm Vardanyanın pullarını ələ keçirmək, həm də gələcəkdə onu Paşinyana qarşı hakimiyyətə gətirməkdir.
Avropa Parlamentinin erməni diaspor və lobbi təşkilatları ilə nə qədər yaxın olduğunu bilirik. Avropa Parlamentinin vitse-spikeri yunan əsilli Eva Kaili və onun ətrafında olan bir sıra deputatların rüşvət qalmaqalı ilə həbs edilmələri, onlarla bağlı istintaqın aparılması məsələsi, təbii ki, bizə məlumdur. O rüşvət qalmaqalında erməni əsilli insanlar da, erməni diaspor və lobbi təşkilatları da iştirak edib. Avropa Parlamentinin ermənilərdən, daha doğrusu, diaspor və lobbi təşkilatlarından aldığı böyük vəsaitlərlə bağlı gözükölgəliliyi var, ona görə də belə bir qondarma iclas keçirir. Bu qurumla erməni lobbi və diaspor təşkilatlarının əlaqələri bu gün də mövcuddur. Avropa Parlamentinin erməni diasporunun maliyyəsi və göstərişi ilə Azərbaycana qarşı qərəzli mövqe tutduğu gizlin deyil. Onlar, əslində haqqın, ədalətin, hüququn, azadlığın təcəssümü olmalı olan bu təşkilatdan özlərinin məkrli niyyətləri üçün istifadə edirlər. Bu da Avroparlamentin, Avropanın digər təşkilatlarının nüfuzuna xələl gətirir. Bu onların öz problemləridir, çünki özləri özlərini bu duruma salıb. Avropa Parlamenti plenar iclasında Bakıda məhkəməsi gedən erməni əsilli şəxslərlə bağlı məsələyə baxılması da, erməni kilsəsinin bəyanatı da eyni məqsədə xidmət edir. Hər iki məsələnin paralel olaraq baş verməsi onu göstərir ki, bu, erməni diaspor və lobbi təşkilatlarının göstərişi ilə hazırlanıb. Yəni Avropa Parlamenti və Eçiməidzin erməni diaspor və lobbi təşkilatlarının çirkin məqsədlərini icra edir” - deyə X.Bəşirov qeyd etdi.
X.Bəşirov onu da dedi ki, bütün bunlar hamısı Vardanyanın milyardlarına göz dikənlərin, o vəsaitləri əldə etmək istəyənlərin çirkin məqsədindən başqa bir şey deyil, onların addımları mənasızdır və erməni əsilli şəxslərlə bağlı qərarı Azərbaycan məhkəməsi verəcək.
İradə SARIYEVA
