Ləğvetmə prosesində olan hər bir şirkət bununla bağlı media vasitəsilə də kreditorlarını xəbərdar etməlidir
Ləğv prosesində olan “Turan İnformasiya Agentliyi” MMC kreditorlarına müraciət edib. Bu barədə İqtisadiyyat Nazirliyi yanında Dövlət Vergi Xidmətinin "Vergilər" qəzetində xəbər dərc edilib.
Məlumata görə, kreditorlar iki ay ərzində tələblərini Bakı şəhəri, Nəsimi rayonu, Süleyman Rəhimov küçəsi, ev 186, mənzil 24 ünvanına bildirə bilərlər.
Cəmiyyətdə bu məsələ maraq doğurur ki, “Turan İnformasiya Agentliyi” MMC informasiya və analitika portalı olub, onun hansı kreditorları ola bilər?
Kreditor təşkilata, müəssisəyə və ya şəxsə borc verən tərəfdir. Kreditorlar şirkətlərə və ya fərdlərə müəyyən şərtlərlə maliyyə vəsaiti və ya mal təklif edərək, borc götürənlərin öhdəlik götürmələrini tələb edir. Bu, adətən faiz və ya müəyyən ödənişlər əsasında qaytarılmalı olan borc şəklində olur.
Kreditorların növləri aşağıdakılardır:
Ticarət kreditorları - malları və ya xidmətləri borc əsasında təmin edənlərdir. Məsələn, bir tədarükçü məhsulu əvvəlcə verib, ödənişi isə daha sonra qəbul edir.
Maliyyə kreditorları - şirkətə və ya fərdlərə birbaşa pul borcu verənlərdir, məsələn, banklar, kredit birlikləri və ya digər maliyyə institutlarıdır.
Kreditorların əsas marağı borc verdikləri vəsaitin vaxtında və şərtlərə uyğun qaytarılmasıdır. Maliyyə hesabatlarında kreditorların öhdəlikləri adətən qısamüddətli və uzunmüddətli borclar şəklində əks olunur.
Yəni kreditor kredit verən tərəf sayılır. Debitor isə krediti götürən tərəf hesab edilir. Qaydalara görə, fəaliyyətinə xitam verilən hər bir şirkət həm fərdi qaydada, həm də publik şəkildə kreditorlarına müraciət edib, onlarla hesablaşmalıdır. Bu qaydaya əsasən də “Turan İnformasiya Agentliyi” MMC-nin fəaliyyətinə xitam verildiyinə görə hüquqi baxımdan mediada - özü də Vergi Xidmətinin mətbu orqanı vasitəsilə öz kreditorlarına müraciət ünvanlaması onun qanuni vəzifələrindən biridir.
O ki qaldı “Turan İnformasiya Agentliyi” MMC-nin kreditorlarının kimliyinə, şirkətin fəaliyyət göstərdiyi dövrdə hər hansı bir təşkilatla və ya vətəndaşlarla maliyyə münasibətlərinə girməməsi mümkün deyil. Ən azı şirkətin işçiləri var, onların əmək haqqı ödənilməlidir, Agentliyə abunə olan vətəndaşlar və şirkətlər var, onlarla hesablaşılmalıdır. Bununla yanaşı, şirkət hər hansı bir bankdan və digər maliyyə qurumlarından kredit götürmüş ola bilər və kreditin qaytarılmayan hissəsinin taleyi həll edilməlidir.
Yəni “Turan İnformasiya Agentliyi” MMC-nin belə bir elan verməsi ilk növbədə maliyyə intizamının göstəricisidir.
Digər tərəfdən, bağlanan şirkət borclarının taleyini də həll etməlidir. Bunun üçun şirkətin tərəfdaşlarına rəsmi müraciəti mütləq olmalıdır. Onlar bu işdən media vasitəsi ilə də xəbərdar olunur ki, bəlkə kreditor şirkətə hər hansi fiziki və ya elektron məktub çatmayıb, heç olmasa mətbuatdan xəbər tutsun.
Akif NƏSİRLİ
