Tural İsmayılov: “Paşinyan hökuməti real addımlar atmaq yerinə, erməni cəmiyyətini informasiya manipulyasiyası ilə məşğul etməyə çalışır”
Ermənistan tərəfin təşəbbüsü ilə Türkiyə jurnalistləri İrəvana səfər ediblər. Ermənistanın Baş Naziri Aparatının İctimaiyyətlə Əlaqələr və İnformasiya Mərkəzinin təşkil etdiyi Türkiyə mediasının iştirakı ilə üç günlük mediatur çərçivəsində jurnalistlər Ermənistan-Türkiyə dövlət sərhədində yerləşən Marqara keçid məntəqəsində olublar.
Erməni mediası bildirir ki, Ermənistana 10 KİV nümayəndəsi gəlib. “Armenpress” yazır ki, KİV nümayəndələri “əsaslı təmir olunan keçid məntəqəsi və onun texniki imkanları ilə tanış olublar”. Ermənistan tərəf keçid məntəqəsinin tam istismara hazır olduğunu bildirib.
Erməni mətbuatında gedən məlumata görə, Ermənistanın İctimaiyyətlə Əlaqələr və İnformasiya Mərkəzinin direktoru Qor Çarukyan “Bizim təşəbbüsümüzdə 10 media orqanı var idi, məqsəd Ermənistanın bölgədə sabit sülhün bərqərar olması və Ankara-İrəvan münasibətlərinin normallaşdırılması istiqamətindəki yanaşmalarını mümkün qədər birbaşa və ətraflı şəkildə geniş türk ictimaiyyətinə çatdırmaqdır. Səfər zamanı KİV nümayəndələri baş nazir, bir sıra digər rəsmi şəxslərlə müsahibələr və müzakirələr aparıblar” - deyə qeyd edib.
Çarukyan bildirib ki, dəvət olunanlar arasında hökumətyönlü, müstəqil və müxalif media nümayəndələri də var: “Türkiyə mediasının nümayəndələri Ermənistan dövlət büdcəsindən ayrılan vəsaitlə bura gəliblər, üç gün burada qalacaqlar, sabah qayıdacaqlar”.
Qeyd olunub ki, Nikol Paşinyan Türkiyənin media nümayəndələrinə müsahibə verib. Erməni baş nazir səhifəsində bununla bağlı qısa video da paylaşıb.
İndiki şəraitdə, yəni Azərbaycanla Ermənistan arasında problemlərin həll olunmasına xeyli məsafə qaldığı bir vəziyyətdə Ermənistanla Türkiyə arasında Marqara keçid məntəqəsinin guya tam hazır olması ilə bağlı bu mesajın Ermənistan tərəfindən verilməsi nə deməkdir?
Türkiyə jurnalistləri Ermənistana niyə gedib? Nə məqsədlə gediblər?
“İrəvana gedən jurnalistlər içərisində Türkiyənin rəsmi dövlət agentliyində işləyən, yaxud Türkiyə mediasında, ictimai-siyasi sektorunda tanınan, populyar jurnalistlər yoxdur”
Siyasi ekspert Tural İsmayılov “Bakı-Xəbər”ə şərhində “Hesab edirəm ki, Ermənistan ictimai rəyində bu ölkənin düşdüyü acınacaqlı vəziyyətlə əlaqədar hakimiyyətə çox ciddi basqılar var. Situasiyanın belə olduğunu görən yarıtmaz və bacarıqsız Paşinyan hökuməti əlindən gələn dərəcədə təxribatlara yol verir. Bu da o təxribatlardandır. Paşinyan hökuməti real addımlar atmaq yerinə erməni cəmiyyətini informasiya manipulyasiyası ilə məşğul etməyə çalışır. Fikrimcə, istənilən halda bu fonda baş verən hadisələr, yəni bu gün Ermənistan hakimiyyətinin məsələlərdə doğru-dürüst addımlar atmaması, Türkiyə ilə real normallaşmaya nail olmaq üçün imkanları tükətməsi nəticədə vəziyyətin daha da gərginləşməyinə səbəb olur. Ermənistan özü də yaxşı başa düşür ki, Türkiyənin Ermənistanla sərhədləri açmağının yeganə yolu Azərbaycanla sülh müqaviləsi imzalamaqdan keçir. Yəni Azərbaycanla sülh müqaviləsi imzalanmadan Türkiyə ilə münasibətlərin normallaşacağını düşünmək çox böyük bir absurdluq olardı” - deyə bildirdi.
T.İsmaylovun fikrincə, bunu Ermənistan hakimiyyəti də yaxşı başa düşür, lakin onların eqoları və hakimiyyətdəki yarıtmaz, bacarıqsız adamların at oynatması nəticədə uyğun addımların atılmamasına səbəb olur. T.İsmayılovun sözlərinə görə, Türkiyədən Ermənistana səfər edən jurnalistlərin tərkibi də ciddi suallar doğurur. Burda Ermənistanın məkrli məqsədlərinin və yanlış rəy yaratmaq niyyətinin olduğunu deyən ekspert bildirdi ki, İrəvana gələnlər arasında populyar jurnalistlər yoxdur. “Digər bir tərəfdən, bu məsələ sual altındadır ki, Ermənistana gedən Türkiyə jurnalistləri kimlərdir. Biz baxırıq ki, İrəvana gedən jurnalistlər içərisində Türkiyənin rəsmi dövlət agentliyində işləyən, yaxud Türkiyə mediasında, ictimai-siyasi sektorunda tanınan, populyar jurnalistlər yoxdur. O zaman sual yaranır ki, bu səfərin əsas təşkilatçısı kimlərdir və bu səfərlər kimin sifarişi ilə gerçəkləşib? Hər bir halda hansısa jurnalistlərin Ermənistana səfəri Türkiyə və Ermənistan arasında diplomatik münasibətlərin yüksək səviyyədə olması demək deyil” - deyə T.İsmayılov qeyd etdi.
İradə SARIYEVA
