Hüseyn İbrahimov: “Bu və digərlərinin həbs edilərək Bakıya təhvil verilməsi ədalətin təntənəsi olacaq”
Birinci Qarabağ müharibəsi zamanı separatçı silahlı dəstələrə başçılıq etmiş və müharibə cinayətləri törədən, Azərbaycan ərazilərinin işğalına bilavasitə rəhbərlik edən əsas fiqurlardan biri sabiq prezidentlər Robert Köçəryan və Serj Sarkisyandır.
O da məlumdur ki, neçə müddətdir Bakıda erməni separatçılarının məhkəməsi gedir. Bu arada təstiqlənməmiş qeyri-rəsmi məlumata görə, Azərbaycan Ermənistanın qarşısında bir tələb qoyub. Bu da sülh sazişinin imzalanması üçün çox vacib tələblərdən biridir. Rəsmən sülh sazişində olmasa da, vacib tələblərdən biri olan bu məsələnin mahiyyəti ondan ibarətdir ki, Ermənistanda olan və Qarabağda cinayət törətmiş şəxslərin Azərbaycan məhkəməsinə təhvil verilməsi təmin edilsin. Bakıda separatçıların gedən məhkəməsində bir çoxlarının adı çəkilir. Onların içində 2008-2016-cı illərdə Ermənistanın müdafiə naziri olmuş Seyran Ohanyanın, sabiq prezidentlər Röbert Köçəryan və Serj Sarkisyanın adı çəkilir. Qeyri-rəsmi məlumata görə, Azərbaycan onların təhvil verilməsini tələb edir. O baxımdan bu nə dərəcədə realdır və doğrudan da sülh sazişinin belə bir şərtlə bağlanması nə qədər lazımlı və vacibdir?
“...sülh sazişinin imzalanmasına, onun dayanıqlı olmasına təkan verəcək”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, Bakının belə bir tələblə çıxış etməsi ilə bağlı deyilənlərin reallıq dərəcəsi böyükdür: “Çünki Qarabağın işğalı və orada azərbaycanlılara qarşı etnik təmizləmənin aparılmasına bilavasitə bu şəxslər rəhbərlik edib. Sabiq müdafiə naziri S.Ohanyan o vaxt 366-cı motoatıcı alayda zabit olub. Xocalı soyqırımının törədilməsində bu alay erməni silahlı birləşmələri ilə birlikdə hərəkət edib. Qarabağda bir sıra digər yaşayış məntəqələri işğal edilərkən orada mülki əhaliyə qarşı qırğın törədilib. Bunların təşkil olunmasına da Köçəryanla Sarkisyan rəhbərlik edib. Sarkisyan müsahibələrin birində bunu etiraf da edib. Deyib ki, Xocalı hadisəsinə qədər azərbaycanlılar belə bir şeyin baş verə biləcəyinə inanmayıb. Əlbəttə ki, bu və digərlərinin həbs edilərək Bakıya təhvil verilməsi ədalətin təntənəsi olacaq. Sülh sazişinin imzalanmasına, onun dayanıqlı olmasına təkan verəcək. Çünki onlar həm işğala, həm etnik təmizləməyə, həm də digər cinayətlərə rəhbərlik ediblər. Bütün bunları qabaqcadan planlaşdırıblar. Fikrimcə, Paşinyan maraqlı olar ki, həmin cəlladları Azərbaycana təhvil versin. Ona görə yox ki, Nikol sözügedən şəxslərin azərbaycanlılara qarşı törətdikləri genosidə görə cəzalandırılmasını istəyir. Əsasən ona görə ki, bu yolla Paşinyan əsas siyasi rəqiblərini neytrallaşdırmaq, revanşist qanadı zəflətmək istəyir. Sadəcə problem ondadır ki, Ermənistanda revanşist qüvvələrin arxasında Rusiya kimi dövlət dayanır. Ermənistan rəhbərliyi buna getsə, Rusiya müxtəlif vasitələrlə buna mane olmağa çalışacaq. Ancaq hesab edirəm ki, Azərbaycan dövləti əli azərbaycanlıların qanına batmış ermənilərin cəzalandırılmasında hər zaman qərarlı olacaq”.
Vidadi ORDAHALLI
