Ramil Məmmədli: “Hazırda Rusiya atəşkəsdə maraqlı görünmür”
Ukrayna 30 günlük atəşkəs barədə ABŞ-nin təklifini qəbul edib. Zelenski bildirib ki, Rusiya tərəfi də müvafiq addımı atsa, Ukrayna cəbhə xətti boyunca 30 gün ərzində atəşi dayandıracaq.
ABŞ ilə Ukrayna arasında əldə edilmiş razılığa əsasən, ABŞ kəşfiyyat məlumatlarının ötürülməsini və Ukraynaya hərbi yardımı bərpa edir. Həmçinin, tərəflər kritik minerallar sazişini mümkün qədər tez yekunlaşdırmaq barədə razılığa gəliblər.
Bu arada Rusiya prezidentinin mətbuat katibi Dmitri Peskov Ukrayna ilə 30 günlük atəşkəs məsələsinə münasibət bildirərkən deyib ki, Moskva ABŞ və Ukrayna arasında danışıqlardan sonra verilən bəyanatları diqqətlə araşdırır. Peskov Kiyevin razılaşdığı 30 günlük atəşkəs məsələsində tələsməməyə, hadisələri qabaqlamamağa çağırıb: “Baxın, siz bir az irəli gedirsiniz, biz bunu etmək istəmirik. Ötən gün mətbuata açıqlama verən Rubio da, Uolts da bəyan etdilər ki, müxtəlif diplomatik kanallar vasitəsilə Ciddədə baş tutan danışıqların mahiyyəti barədə bizə ətraflı məlumat verəcəklər. Bax, əvvəlcə bizə bu məlumatlar daxil olmalıdır. Həmçinin bu günlərdə bizim amerikalılarla da təmaslarımız planlaşdırılıb ki, bu təmaslar zamanı artıq tam şəkildə məlumat alacağımıza ümid edirik”.
Maraqlıdır, əldə edilən razılaşmadan nə gözlənilir? 30 günlük atəşkəs kimə faydalıdır? Bundan sonra nə olacaq?
“İndiki dövrdə atəşkəsə ən çox Ukraynanın ehtiyacı var”
Sözügedən məsələni “Bakı-Xəbər”ə şərh edən hərbi ekspert Ramil Məmmədli hesab edir ki, hazırda Rusiya atəşkəsdə maraqlı görünmür: “Ona görə yox ki, Rusiyanın imkanları sonsuzdur və müharibəni davam etdirməkdə qərarlıdır. Sadəcə, Rusiya bir sıra məqsədlərinə tam çatmadığı üçün tələsmir. Bu məqsədlə vaxtı bir qədər uzatmaq istəyir. Rusiya istəyir ki, Kurskı tam azad etsin, ondan sonra atəşkəsə getsin. Rusiya Luqanskla Donetskin tam işğalına nail ola bilməyib. Məqsəd odur ki, danışıqlarda Ukraynanın əli güclü olmasın. Danışıqlar stolunda Ukraynanın bazarlıq imkanı olmasın. Ona görə Peskov deyir ki, tələsmək lazım deyil. Bunu deməklə Rusiya vaxt udmağa çalışır və böyük itkilər hesabına olsa da Kursk istiqamətində hücumları intensivləşdirir. Rusiya 30 günlük atəşkəsə razılaşarsa, müharibə dayanacaq. Amma bu o demək deyil ki, müharibə tamamilə dayanacaq. Atəşkəsə Rusiya razılaşacaq, razılaşdıqdan sonra Ukraynaya zərbə endirməyə davam edəcək və bunu Ukraynanın etdiyini söyləyəcək. Məsələnin bu tərəfi də var. İndiki dövrdə atəşkəsə ən çox Ukraynanın ehtiyacı var. Çünki vəziyyəti çox ağırdır. Ciddi canlı qüvvə sıxıntısı var, cəbhədə əsgər çatışmır. Atəşkəs hesabına Ukrayna nəfəs almağa çalışır”.
Vidadi ORDAHALLI
