Məhkəmədə Vardanyanın yeni cinayətləri açılır - “şəxsi ordular”...
Elşad Həsənov: “Erməni əsilli şahidlər Vardanyanın Qarabağa gələrək orda silahlı dəstələr yaratdığını, insanları pul gücünə bu qanunsuz dəstələrə cəlb etdiyini təsdiqləyir”
Müxtəlif ağır cinayətlərdə təqsirləndirilən erməni əsilli şəxslərin məhkəmə prosesində şahidlərin verdiyi ifadələrdə çox ilginc və diqqət çəkən məqamlar ortaya çıxır.
Azərbaycan Respublikasının Cinayət Məcəlləsinin sülh və insanlıq əleyhinə cinayətlər, müharibə cinayətləri, həmçinin terrorçuluq, terrorçuluğu maliyyələşdirməyə dair maddələri ilə və digər ağır cinayətlərdə təqsirləndirilən Ermənistan vətəndaşı Ruben Vardanyanın barəsində cinayət işi üzrə məhkəmə prosesinin baxış iclasında şahid ifadə verib.
Şahid qismində ifadə verən Qarabağda yaşayan erməniəsilli şəxs 44 günlük müharibədən bir müddət sonra Ruben Vardanyanın Xankəndiyə gəldiyini bildirib və deyib: “Bilmirəm Rusiyadan gəlmişdi, ya başqa yerdən”.
O, R.Vardanyanın sponsorluq edərək Azərbaycana qarşı vuruşmaq üçün yaşı 45-50-dək olan insanlardan ibarət dəstələr yaratdığını, onları maliyyələşdirdiyini bildirib. “Çox sayda cavan insan gedib o qruplaşmalara yazılmışdı. Mənim üçün maraqlı o idi ki, dünyada tanınmış biznesmen, oliqarx Ruben Vardanyan, – mən demirəm ki, o mənim düşmənimdir, yox, – nəyə görə öz biznesini qoyub Qarabağa gəlmişdi?”
Şahid insanların 700-2000 dollar müqabilində dəstəyə qoşularaq hərbi təlimlərə cəlb olunduğunu deyib. Daha sonra şahidin DTX-də ibtidai istintaq zamanı verdiyi ifadə elan olunub. Şahid ibtidai istintaqda verdiyi ifadəsini təsdiqləyib.
Vardanyanın sponsorluq edərək Azərbaycana qarşı vuruşmaq üçün dəstələr yaratdığı faktlarla təsdiqlənib.
“Vardanyanın törətdiyi cinayətlər məlumdur və onu da ən ağır cəza gözləyir”
Siyasi ekspert Elşad Həsənov “Bakı-Xəbər”ə şərhində bildirdi ki, dövləti cinayətlər törətməkdə təqsirli bilinən R.Vardanyanın məhkəməsi gedir və məhkəmə də ona qarşı səslənən ittihamları şahid ifadələri ilə təsdiq edir. “Yəni erməni əsilli şahidlər Vardanyanın Qarabağa gələrək orda silahlı dəstələr yaratdığını, insanları pul gücünə bu qanunsuz dəstələrə cəlb etdiyini təsdiqləyir. Bu bizə mətbuatdan məlum idi. Eyni zamanda Vardanyanın Qarabağa giriş əraziləri də öz şəxsi vəsaitinə Ermənistandan gətirilən minalarla minalatdığı da öz təsdiqini tapır. Vardanyanın törətdiyi cinayətlər məlumdur və onu da ən ağır cəza gözləyir. Bu öz yerində”.
E.Həsənov qeyd etdi ki, Vardanyan Qarabağla bağlı adam olmayıb, o, 1968-ci ildə İrəvanda anadan olub, sonra Rusiyada ali təhsil alıb, orda bizneslə məşğul olub və Rusiyanın oliqarxlarından birinə çevrilib. “Hətta Skolkovonun yaranmasında da Vardanyanın rolu var, ona da maliyyə dəstəyi göstərib. Yəni Qarabağla, eyni zamanda Ermənistanla elə bir bağlılığı olmayan bir adam birdən-birə, necə deyərlər, Qarabağ müharibəsində “bitir”. Ermənistanda da Qərb yönümlü siyasətçilər hakimiyyətdədir, Paşinyan və onun komandası, “Sorosun uşaqları” və Ermənistanla Azərbaycan arasında müharibə artıq bitib. Belə bir zamanda Vardanyan Qarabağda, Xankəndidə peyda olur. Bu nə deməkdir? Bu adam Rusiyanın müəyyən dairələri tərəfindən hazırlanan böyük bir planın tərkib hissəsi kimi Xankəndiyə göndərilib. Vardanyan Forbesin hesablamalarına görə milyarderlər siyahısındadır. Belə bir adam ağılsız ola bilməz və o milyardlarını da küçədən yığmayıb, təbii, nələrsə edib milyardlar qazanıb. Belə bir adam milyardlarını qoydu, Rusiya vətəndaşlığından imtina etdi və bununla bağlı da Putin öz sərəncamını hazırladı ki, Ruben Vardanyan Rusiya vətəndaşlığından çıxarılsın. Yəni bunlar hamısı publik olaraq göstərildi, o, müəyyən mövqelər qazanması üçün Xankəndiyə göndərildi. Məqsəd isə sonra onu Ermənistana köçürmək idi ki, Ermənistanda hakimiyyəti ələ alsın və Rusiyayönümlü siyasət yürütsün. Ancaq bu siyasətin də qarşısı məhz Azərbaycan tərəfindən alındı. Bildirim ki, Vardanyan Qarabağa gəlmədən əvvəl Araik Arutyunyan Moskvaya getdi, Moskvada gizli görüşlər keçirdi və qayıtdı gəldi, ardınca isə R.Vardanyan Qarabağda peyda oldu. 2022-ci ilin 4 noyabrında o, “dövlət naziri” oldu. Bundan sonra öz puluna guya “xeyriyyəçilik” işləri görməyə, aztəminatlı ailələrə müəyyən yardımlar etməyə başladı. Eyni zamanda qanunsuz silahlı dəstələr yaratdı. İndi bunlar hamısı məhkəmədə sübut olunur. Həmçinin o, Ermənistandan mina alaraq Azərbaycan ərazilərini minalamaqla məşğul oldu və bu da məhkəmədə öz təsdiqini tapır. Azərbaycanın birbaşa təzyiqilə 23 fevral 2023-cü ildə o, “dövlət naziri” vəzifəsindən çıxarıldı. Bunu Azərbaycan Prezidenti Şuşada şuşalılarla görüşündə bildirdi. Hətta qeyd etdi ki, digər “nazirlər” də qondarma vəzifələrini dondurub çıxıb getsələr biz onlara heç bir şey etməyəcəyik. Ancaq onlar o vaxt Azərbaycan Prezidentinin bu çağırışından nəticə çıxarmadılar və Vardanyan öz cinayətkar əməllərini davam etdirməyə başladı. Nəticədə də Qarabağda bir günlük antiterror əməliyyatı aparıldı və ermənilərin qanunsuz silahlı dəstələri məğlub oldu, ağ bayraq qaldırdı, silahları təhvil verib özləri isə çıxıb getdilər. Ondan sonra həmin separatçı rejimin əli azərbaycanlıların qanına batmış cinayətkarların bir neçəsi, o cümlədən də Vardanyan həbs olunaraq Bakıya Dövlət Təhlükəsizlik Xidmətinin təcridxanasına gətirildi. Onlar barəsində cinayət işi qaldırıldı, indi məhkəmədə həmin cinayət işinin baxış iclasları keçirilir. Bu gün məhkəmə qarşısında cavab verənlər 23 nəfərdir. Ermənistanla Azərbaycan arasında münaqişəni qızışdıran, qırğınlar törədən, bu hadisələrə ciddi dəstək olan Ermənistandakı siyasi qüvvələrin başında isə Robert Koçaryan və Serj Sarkisyan durur. Hesab edirəm ki, biz gələcəkdə Paşinyan hakimiyyətindən Robert Koçaryanın, Serj Sarkisyanın və əli azərbaycanlıların qanına batan digər canilərin Azərbaycana verilməsini tələb etməliyik. Düşünürəm ki, Paşinyan da real bir siyasi rəhbər olaraq bunları başa düşəcək və həmin cinayətkarları cəzalandırılması üçün Azərbaycana verəcək. Çünki biz onu böyük bəlalardan xilas etmişik. Yəni Ruben Vardanyan İrəvana getsəydi orda hakimiyyəti ələ alıb Paşinyanı da, yəqin ki, türməyə salmışdı, bu gün Paşinyan dəmir barmaqlıqlar arxasından baxardı. Ancaq bütün bu planları Azərbaycan hakimiyyətinin yeritdiyi çox güclü və qabaqlayıcı siyasət iflasa uğratdı”-deyə E.Həsənov qeyd etdi.
İradə SARIYEVA
