Azərbaycana qarşı hərbi cinayətlər törədən, lakin hələ də azadlıqda qalan şəxslərin məhkəməyə cəlb olunması ölkəmizin başlıca məqsədləri sırasında yer alır. Söhbət ilk növbədə Ermənistandakı bir sıra şəxslərdən, o cümlədən sabiq prezidentlər Robert Köçəryandan və Serj Sarkisyandan gedir.
Azərbaycanın bu məsələdə mövqeyi qətidir. Azərbaycan prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev özünün “X” sosial şəbəkəsindəki səhifəsində bu günlərdə sözügedən məsələyə toxunaraq bildirib ki, Ermənistan Azərbaycanda hərbi cinayətlərdə təqsirləndirilən şəxslərin məhkəmə prosesi əleyhinə təbliğat aparır: “Sülhə və Azərbaycanla yeni münasibətlərə səmimi can atma digər məsələlərlə yanaşı, Ermənistanın öz məsuliyyətini tanımağa və hərbi cinayətlərdə ittiham olunanları, xüsusilə hazırda Ermənistan ərazisində gizlənənləri təhvil verməyə hazır olması ilə nümayiş etdirilərdi”. Bunlar fonunda Ermənistan baş naziri Nikol Paşinyanın Robert Köçəryan və Serj Sarkisyana qarşı sərt ittihamlar irəli sürməsi erməni müxalifətində təşvişə səbəb olub. Paşinyan ad çəkmədən keçmiş prezidentlərin vaxtilə Rusiyanın “gizli əmr”i ilə hərəkət etdiklərinə eyham vurub: “Seçki saxtakarları və qəsbkarlar, sizi Ermənistanda hakimiyyətə gətirənlərin məqsədlərinin nə olduqlarını söyləməyi unutmayın. Siz deməyəcəksiniz, amma mən deyirəm: Ermənistanın heç vaxt müstəqil dövlət olmaması, hətta dövlət olmaması üçün! Buna görə Ermənistan sakit şəkildə öz mövcudluğunu dayandırmalı, hətta formal dövlət kimi dağılmasını gözləməli və itaətkarlıqla bu əmr yerinə yetirilməli idi”. Qeyd edək ki, Ermənistanın mövcud hakimiyyətinin nümayəndələri həmişə Köçəryan və Sarkisyanı Rusiyaya işləməkdə ittiham edirlər. Təsadüfi deyil ki, Ermənistan baş naziri aparatı rəhbərinin müavini Taron Çaxoyan açıq şəkildə Köçəryanı satqın adlandırır: “Ermənistana periferik əyalət kimi baxan Köçəryanın son məqsədi Ermənistanı Rusiyaya nimçədə təqdim etməkdir. Bunu etməyə çalışır”. İndi belə hesab olunur ki, Paşinyanın artan ittihamları fonunda Robert Köçəryan və Serj Sarkisyanın Azərbaycana təhvil verilmsi belə mümkündür. Hətta fikirlər səslənir ki, baş nazir bunun üçün əsas da yaradır. Ermənistan Respublikaçılar Partiyasının sözçüsü Eduard Şarmazanov da bu günlərdə məsələ ilə bağlı maraqlı məqamlara toxunub: “Azərbaycan Ermənistandan Qarabağ müharibəsinin liderlərini təhvil verməsini tələb edir, Ermənistanda bəziləri isə “ayırma” əməliyyatı ilə məşğuldur. Hələ 2021-ci ilin martında mən demişdim ki, nikolizm aradan qaldırılmasa, Azərbaycan Qarabağ müharibəsi liderlərinin təhvil verilməsini tələb edəcək. Nikolun hakimiyyəti dövründə bu, çox realdır, çünki biz onun Bakıdakı “girovlar” məsələsində hərəkətsizliyinin şahidi oluruq. Demişəm ki, birtərəfli güzəştlər Azərbaycanın tələblərinin artmasına gətirib çıxaracaq. Bu məsələdə İlham Əliyev-Paşinyan cütlüyünün tələsik hərəkət etdiyini istisna etmirəm.
Bu günlərdə Azərbaycanın əsas sözçüsü Hikmət Hacıyev açıq şəkildə Ermənistandan Qarabağ müharibəsinin liderlərini təhvil verməyi tələb edib. Bakıda keçirilən məhkəmədən aydın olur ki, söhbət ilk növbədə Robert Köçəryan və Serj Sarkisyandan gedir. Bunu istisna edirsiniz? Nikol Azərbaycanın tələbini yerinə yetirəcək...”. Ermənistan parlamentinin İnsan hüquqlarının müdafiəsi və ictimaiyyətlə əlaqələr daimi komissiyasının keçmiş sədri Naira Zöhrabyan da belə bir halı istisna etmir. O bildirib ki, bu gün Ermənistanda insan hüquqları heç də qorunmur: “2018-ci ildəki məxməri terrordan sonra Ermənistanda insan həyatı və hüquqları ən ucuz məhsuldur. Xüsusilə bu hakimiyyətin dövründə görürük ki, ümumiyyətlə, insan haqlarından söhbət gedə bilməz. Mən izləyirdim və İlham Əliyevin köməkçisi Hikmət Hacıyev bəyan edib ki, yekun sülhə nail olmaq üçün Ermənistan müharibə cinayətlərində ittiham olunanları Azərbaycana təhvil verməlidir. Təbii ki, söhbət ilk növbədə bütün keçmiş prezidentlərdən, müdafiə nazirlərindən gedir, həm də digərlərindən gedir. Yeri gəlmişkən, o siyahıda qadınlar da var, o cümlədən mən varam, çünki Strasburqda Mingəçevir su anbarını bombalamağa çağırmışdım. Mən şübhə etmirəm ki, öz hakimiyyətini daha bir saat saxlamaq məsələsi gündəmə gəlsə, bunun müqabilində Nikol İlham Əliyevin tələbini yerinə yetirməli olsa, gözünü qırpmadan bunu edəcək”. Qarabağ müharibəsi iştirakçısı ola Aşot Sevyan da eyni mövqedədir: “Ermənistan hökumətinin İlham Əliyevin tələblərinə qarşı çıxacağını gözləmək lazım deyil. Ermənistan hökumətinin İlham Əliyevin tələblərinə qarşı çıxacağını gözləməyin. Bunlara qalsaydı, indi hamımızı Bakıya təhvil vermiş olardılar. İnanın, hökumətlərinin ömrünü ən azı 1 il uzadacaqlarına əmin olsalar, o addımı atacaqlar”. Beləliklə, Paşinyana müxalif olanlar açıq-aşkar bildirir ki, baş nazir həm hakimiyyətini sığortalamaq, həm də Azərbaycanla münasibətlərdə dönüş nöqtəsi yaratmaq üçün Robert Köçəryan və Serj Sarkisyanı, eləcə də bəzi digər cinayətkarları Bakıya təhvil verə bilər. Öz növbəsində Azərbaycan vaxtilə ərazilərimizdə müharibə cinayətləri törətmiş şəxslərin məsuliyyətə cəlb edilməsi üçün ciddi addımlar atır. Bu fonda Robert Köçəryan və Serj Sarkisyanın, həmçinin digərlərinin ədalət məhkəməsi qarşısında cavab verəcəyi qaçılmazdır.
Nahid SALAYEV
