“Mərkəzi iflic vəziyyətə salıblar”
Müsahibimiz Milli Kulinariya Mərkəzinin sabiq baş direktoru, Milli Kulinariya Assosiasiyasının rəhbəri Tahir Əmiraslanovdur.
- Tahir müəllim, Milli Kulinariya Mərkəzinin rəhbəri vəzifəsindən azad ediləndən sonra sərt bəyanatlarınız olmadı, bunu normal qarşıladınız, hətta “yəqin islahatlar həyata keçirirlər” dediniz. Doğrudanmı, islahatlar keçirildi?
- “İslahat” adı altında oyun çıxardılar. O vaxt Dövlət Turizm Agentliyinin rəhbəri Fuad Nağıyev, müavini Azadə Hüseynova mətbuata tez-tez intervü verirdilər. Milli Kulinariya Mərkəzinin rəhbəri vəzifəsinə Orxan Fikrətoğlunu qoymuşdular, o da bir neçə müsahibə verdi. “İslahat” barədə onlar danışırdılar, özlərindən soruşun.
- Sizin gördüyünüz işlər məlumdur. Sizdən sonra orda nə işlər görülüb?
- Turizm Agentliyinin qastronomiya və qastronomiya turizmi ilə məşğul olan şöbəsi var, burda böyük bir heyət çalışır. Mətbəx qanunla Agentliyə verilib, amma içində qastronomiya bölməsi də fəaliyyət göstərir. Ona Səkinə Əsgərova rəhbərlik edir. Orda Turizm bürosu var, mətbəxlə bir az da onlar məşğul olur. Milli Kulinariya Mərkəzinin 17 nəfər əməkdaşı ordadır, eyni zamanda şöbənin əməkdaşları da var. Mən işdən çıxandan sonra son üç ildə bu qədər insan, maliyyə, təşkilatı resurslar əllərində olduğu halda heç bir iş görməyiblər. Mən Milli Kulinariya Mərkəzi Assosiasiyasında, ictimai təşkilatda tək işləyən adam görün son üç ildə hansı işləri görmüşəm. Müqayisə etsəniz, kimin nə iş gördüyünü müəyyən edərsiniz.
- Milli Kulinariya Mərkəzi kənardan necə görünür?
- Mərkəzi iflic vəziyyətə salıblar. Baxın, Dövlət Turizm Agentliyi yaranandan və mənə təzyiqlər başlayandan sonra kulinariya sahəsində qonşu ölkələrdə necə irəliləyişlər oldu.
- Sizə nəyə görə təzyiq göstərilirdi? Agentliyin rəhbərliyi sizə qarşı niyə belə mövqe tururdu?
- Çünki mən orda olanda pul sildirmək mümkün deyildi. Səbəb bu idi. Təsəvvür edin ki, biz Dünya Kulinariya Təşkilatının rəhbərliyində idik. Dünya bizim 2024-cü ildə dünya təşkilatına vitse-prezident seçiləcəyimizi gözləyirdi. Bizim çox böyük nüfuzumuz vardı, sözümüzü keçirirdik, kiməsə yalvarmırdıq, diqtə edirdik. Agentlik bütün bunların qarşısını aldı, bizə qarşı oyuncaq, başında Fərhad Aşurbəyli olan bir ictimai təşkilat yaratdılar. Bu təşkilatı zorla 2022-ci ildə dünya təşkilatına assosiotiv üzv etdilər.
- Zorla niyə?
- Çünki o təşkilatı ora üzv etmək qanunu yolla olmadı. İndi mətbuat yazır ki, bizim əvəzimizə gətirilən təşkilatla birlikdə 2.9 milyon manat pul silinib. Guya Azərbaycan mətbəxi dünyada tanıdılıb. Halbuki, 2.9 milyon manat mən işlədiyim dövrdə Milli Kulinariya Mərkəzinin 15 illik büdcəsi idi. Bizim nə qədər iş gördüyümüz də ortadadır. Mətbəxin təbliğatında görürsüz nələr ediblər və etməyiblər?
- Bu qədər maliyyə yeyintisindən söhbət gedir. Bu daha hansı istiqamətlərdə müşahidə edilib?
- Məni mərkəzdə işləyəndə 600 kvadrat metrlik yer icarəyə götürmüşdüm, ayda 2000 manat icarə haqqı ödəyirdim. Bunlar isə 200 kvadratlıq yerə yoxlayın görün nə qədər icarə haqqı ödəyirlər? 200 kvadratlıq yerə 4000-6000 manat verirlər. Həmin 200 kvadrat metr yerdə 656 min manatlıq təmir işi aparıblar. Orda divarları qızıldanmı edirlər? Bu pula bir neçə illiyə icarəyə yer götürmək, yaxud 300-400 kvadratlıq ofis almaq olardı. O 200 kvadratlıq yerdə 17 adam oturduğu halda ora iki restoranın avadanlığını necə yerləşdiriblər?
- Deyirsiz ki, əməkdaşların oturduğu ofisə restoran avadanlıqları yerləşdiriblər. Bu lazım idimi?
- 2024-cü ildə ofisə guya 256 minlik iki restoran avadanlığı alıblar. Birincisi, bu avadanlıqlar ora yerləşməz. Bunlar "silinir". Bura ofisdir, niyə restoran avadanlığı oraya qoyulmalıdır? Heç kəs orada yemək bişirmir. Bu təkcə bir ildə yeyilən pullardır. Bu məsələlərdə nə dövlət, nə xalq, nə bu təşkilatlar xeyir götürdü. Faktlar göz qabağındadır, bunu mən yox, mətbuat deyir. Mənim burda bir marağım da yoxdur. Məni işdən çıxardılar, başa düşürəm. Amma işdən çıxandan sonra da məndən əl çəkmirdilər, təqib edirdilər.
- Təqiblər deyəndə nəyi nəzərdə tutursunuz? Bunu hansı şəkildə ediblər?
- Mətbuatda mənim barəmdə nələr yazmırdılar ki… Şayiələr yayırdılar ki, guya mən milyonlar xərcləyirəm. Azadə xanım gələndə mənə birinci sualı bu oldu ki, sən 2 milyon manatı hardan alıb xərcləyirsən? Dedim ki, Azadə xanım, 200 mindən 2 milyon oğurlamaq mümkündürsə, deyin mən də “oğurlayım”. Mən o pulu evimə aparmamışdım, işə qoymuşdum. 200 minin də yarıdan çoxu maaş idi, 30 min də illik icarəyə verirdim. Kitab çıxarırdıq, yarışlara adam göndərirdik və sair. Bütün gücümü ortaya qoymuşdum ki, mətbəximizi layiqincə təmsil edək. Sonra şayiələr buraxdılar ki, guya mən gənclərə kömək etməmişəm. Hətta bir dəfə bir yerdə çox hörmət bəslədiyim Azadə Hüseynova dedi ki, siz gəncləri jüriliyə qoymamısınız, ancaq özünüz getmisiniz. Həm ağır, həm də haqsız ittiham idi. Mən onlara məktubları göstərdim, orda yazırdım ki, bizdə yeni gənclər yetişib, xahiş edirəm, onları jüri kurslarına göndərək. Həmin məktubda da təxminən 20 nəfər gəncin siyahısını vermişdim. Durur o məktublar. Bəs niyə o gəncləri juri kurslarına göndərmədilər? Niyə yalan danışırlar?
Bu təqiblər davam edirdi. Axırda WACS-dan da yazdılar. WACS-ın elə tədbiri yox idi ki, rəhbərliyimiz orda olmasın. Bizə gülürdülər. Çünki ictimai təşkilatdır. Ordan adamları gətirdilər rüşvət verdilər (bilmirəm, əllərində tutmamışam-T.Ə), yaxud nə etdilər, dedirtdilər ki, Tahir Əmiraslanov WACS-dan çıxarılsın. Hətta Azadə xanım müsahibə verib dedi ki, biz WACS-dan Tahir Əmiraslanovu çıxarıb yerinə Orxan Muxtarovu gətirəcəyik. Niyə? Qarınlarının ağrısı nə idi?
- Səbəbini öyrənə bildiniz?
- Onu gətirən kimi nə oldu? Bir ildə 2, 9 milyon manat pul silindi. Tahir Əmiraslanovun vaxtında bunu etmək mümkün deyildi.
- Sizi vəzifədən necə uzaqlaşdırdılar? Səhv etmirəmsə, bu sizə üzbəüz deyilməyib.
- Bir məqama xüsusi fikir verin, görün bu proseslərdən kimlər xeyir götürdü.
Martın 17-də zəng edib “muştuluğumu verin, sizi işdən çıxardıblar”-dedilər. Həmin vaxt Livanda Dünya Kulinariya Assosiyasiyasının və Dünya İslam Kulinariyası Assosiyasiyasının prezidenti seçilmişdim. Bunlar isə məni belə “təbrik etdilər”.
- Səhv etmirəmsə, həmin tədbirdə ermənilərə qarşı yazılmış kitabın da təqdimatı olmuşdu.
- Bəli. Ora ermənilərin, ASALA-nın oturduğu yerdi. Keçmiş səfir rəhmətlik Abbasqulu müəllim də yanımızda idi, həm də məni qoruyurdu. Hətta ona da demişdilər ki, orda Tahir Əmiraslanov haqqında məlumat vermə və sair. Təsəvvür edirsizmi, bizə sponsorluq etmək istəyən iş adamlarına deyirdilər ki, niyə Tahir Əmiraslanova kömək edirsiz, etməyin, əks halda yoxlama göndərəcəyik və sair.
Birinci məsələ kimi Lənkəranın dünya mətbəx paytaxtı olması məsələsini gündəmə gətirdik. Tədbir sanki Azərbaycanda keçirilirdi. İkinci gün ermənilərə qarşı yazılmış “Dolma məsələsi - bütün şübhələrə son” kitabını 18 ölkə qarşısında təqdim etdik. Onları ingilis, rus dilində payladıq. Burada da dünya kubokunu udduq. Martın 14-ü mənim ad günüm idi. 15,16,17-si axşamlarında bütün tədbirlər sanki Azərbaycanın idi. Martın 18-i də Novruz bayramı başlayırdı, biz geri qayıtdıq. Sizcə, erməninin biri bunu etsəydi, Ermənistanda ona münasibət necə olardı?
- Uzun müddət ermənilər o cür tədbirlərə həsrət idi. Bəs sonra necə oldu?
- Məni martın 17-si işdən çıxartdılar, yayda Əbu-Dabiyə ilk dəfə Dünya Kulinariya Konqresinə 20-yə yaxın erməni qrupu gəldi, məni görən kimi üzləri çöndü. Bizdən isə oraya 10 nəfər getdi. Çoxu da Dövlət Turizm Agentliyinin məmurları idi, yəni orada lazım olmayan adamlar.
2022-ci ildə məni işdən çıxardıqdan sonra ilk dəfə olaraq Ermənistan elm, təhsil, idman və mədəniyyət nazirliyinin xüsusi milli irs portalında 250 xörəyimiz yerləşdirildi. Cavab verən, bunun qarşısında duran olmadı. 2023-cü ildə ingilisdilli ölkələrdə ingiliscə, rusdilli ölkələrdə bunun ruscası yayımlandı. Mətbəximizi bu kitabda ortaya qoydular, guya bu, Göyçənin Kəvər kəndinin mətbəxidir. Mən işdən çıxandan sonra Tahir Əmraslanov kitabları yandırır deyə məlumatlar getdi. Bu bir protest idi. Çünki bizim 15 mətbəx nümunəmizi məhv edib ermənilərə verdilər. Bu daha dəhşətli məsələydi. 2024-cü ilin dekabrında Ermənistan Baş naziri Nikol Paşinyan milli mətbəxin inkişafı məsələsi ilə bağlı çıxış etdi. Milli irs kimi bunun ortaya qoyulmasına milyonlarla pul ayrıldı. Bütün bunlar onların qarşısını almaq üçün yaradılan mərkəzin iflic vəziyyətinə salınmasına görə baş verdi. Tahir Əmraslanov aralandı və beynəlxalq aləmdə Azərbaycan mətbəxinin təbliğ olunmasına qoymadılar. Bunlar guya ki, 2,9 milyon mətbəxin təbliğinə xərcləyirlər, amma dünyanın heç bir yerində Azərbaycan mətbəxini təbliğ etmədilər.
- Stalik Xankişiyev feysbuk hesabında Fuad Nağıyevə qarşı sərt ittihamlar səsləndirib və bildirib ki, Agentlik rəhbəri sizi Şuşada keçirilən festivaldan qovub. Bu nə dərəcədə doğrudur?
- Utanmalı bir məsələ yoxdur, əlbəttə belə bir hal oldu. Stalik düz yazır, amma hər şeyi demək olmur. Evin sirrini çölə tökmək olmaz. Müharibədə iştirak edən qazi aşbazlarımız vardı, ordan yanvarın axırlarında qayıtmışdılar. Onları Şuşaya dəvət etməmişdilər. Beynəlxalq Şuşa festivalını oktyabr ayından, yəni şəhər alınmamışdan əvvəl elan etmişdim. 9 ölkə məktub göndərdi ki, gəlirik. Skabayevanın verlişində göstərildi ki, ermənilər “əziyyət çəkir”, azərbaycanlılar Şuşada bayram etmək istəyirlər.
Festivala müharibədə olan aşbazları göndərmirlər, amma müharibədən qaçan, burda pul qazananları Şuşaya göndərirlər. Qazi aşbazları Şuşaya aparmırdılar deyə Stalik yuxarı instansiyalara çıxdı ki, heç olmasa uşaqlardan bir neçəsi getsin. Orda da onları pisikdirirdilər.
- Prezident Fuad Nağıyevə şiddətli töhmət verdi, yayılan məlumata görə, agentlikdə əməliyyat da keçirilib və bir nəfər saxlanılıb. Bu məsələyə necə yanaşdırsınız?
- Görünür, bunlar hədlərini aşıblar, ona görə də bu baş verib. Cənab Prezident kimisə vəzifəyə qoyursa etimadı doğrultmaq lazımdır. Amma bunlar başa düşmürlər ki, vəzifə məsuliyyətdir, Prezidentin sənə göstərdiyi etimaddır, etibardır, şərəfdir. Kiminsə tutulmağı, işdən çıxarılmağı mənim marağımda deyil. Heç istəmirəm ki, kiminsə başına nəsə gəlsin, hamısının balası var. Amma onlar niyə ölkəmizi satdılar? Üç ildə Azərbaycan milli mətbəxi sahəsində niyə bir iş görmədilər? Halbuki, biz cənab Prezidentin və Mehriban xanımın rəhbərliyi, tövsiyələri ilə dünya təşkilatının rəhbərliyində idik. Niyə üç ilə bütün bunları dağıtdılar? Bu 30 ilə düzəlməyəcək. Bunu niyə elə etdilər, başa düşmürəm. Məni Milli Kulinariya Mərkəzindən çıxardılar əlləri yağa batdı, indi də dünya təşkilatından çıxarırlar, əlləri bala batacaq. Məni bir dəfə Azadə xanım söhbət etməyə dəvət etdi, dedim ki, mən sizin aparata girməkdən iyrənirəm, görüşmək istəyirsinizsə gəlin başqa yerdə görüşək. Mərkəzdən çıxan gündən ora ayağımı da qoymamışam, getmərəm.
İradə SARIYEVA
