İlyas Hüseynov: “Bu cür yalan, iftira xarakterli məlumatlar paylaşmaq, açıqlamalar vermək...”
Erməni lobbisinin uzun illərdir pul hesabına əlində saxladığı avropalı siyasilərdən birinin də ispaniyalı deputat Con İnarritu olduğu şübhəsizdir.
Yoxsa ona nə düşüb ki, durub ermənilərin haqsız mövqeyini dəstəkləsin, Qərbi Azərbaycan ideyasına uyğunsuz don geydirməyə çalışsın, bu məsələni tamamilə başqa istiqamətə yozsun?
C.İnarritu Azərbaycan dövlətinin və ictimaiyyətinin haqlı olaraq gündəmə gətirdiyi Qərbi Azərbaycan ideyasından yaman narahat olub. Bu adam bəlkə də heç Ermənistanın (Qərbi Azərbaycanın) və Qarabağın harda yerləşdiyini bilmir də, amma götürüb elə sərsəm, cəfəng iddialar irəli sürüb ki, adam məəttəl qalır. O iddia edib ki, Qərbi Azərbaycan məsələsi Azərbaycanın Qarabağda guya "etnik təmizləmə" həyata keçirməsinə haqq qazandırmaq və Ermənistana yeni "hücum" üçün əsas yaratmaq cəhdidir.
Guya Azərbaycanın belə bir niyyəti varmış.
Bu adam tarixi gerçəyi tamamilə arxa plana ataraq Qərbi Azərbaycan ideyasına kölgə salmağa, soydaşlarımızın halal haqqından istifadə edib öz ata yurdlarına qayıtmaq hüququna ləkə yaxmağa cəhd edir. Zəhmət çəkib proseslərlə dərindən tanış olmağa maraq göstərsəydi reallığın onun bildiyi kimi olmadığını dərk edərdi. Amma görünür, onu reallıq yox, erməni diasporunun pulu maraqlandırır, qazanc əldə etməyi hər şeydən üstün tutur.
Qərbi Azərbaycan mövzusunun mahiyyətini bilməyən, yaxud bilmək istəməyən, ermənilərin Qarabağdan könüllü köçüb getdiyi, onların heç bir basqıya, etnik təmizləməyə məruz qalmadığı həqiqətini qəbul etməyən deputatın bu davranışları təəccüblü gəlmir. Çünki biz son 30-35 ildə belələrini çox gördük, yenə də görəcəyik.
“İspan deputatın Qərbi Azərbaycan məsələsinə dair fikir bildirməsi tamamilə yolverilməzdir”
Politoloq İlyas Hüseynov “Bakı-Xəbər”ə şərhində bildirdi ki, İspaniya da daxil olmaqla, bəzi dövlətlərin ölkəmiz əleyhinə qərəzli münasibətinə şahidlik edirik: “Burda mühüm məsələ ondan ibarətdir ki, Azərbaycan reallıqlarını bilmədən həqiqətdən uzaq fikirlər söyləyən şəxslər tapılır. İspan deputatın Qərbi Azərbaycan məsələsinə dair fikir bildirməsi tamamilə yolverilməzdir. Çünki regionda tarixi şəraiti, hazırkı reallıqları anlamadan, dərk etmədən fikir söyləmək tamamilə qüsurludur. Digər tərəfdən, Qarabağda guya etnik təmizləmə siyasətinin həyata keçirilməsi və Ermənistana yeni hücum üçün əsaslar yaratmaq cəhdlərinin irəli sürülməsi də absurddur”.
İ.Hüseynov qeyd etdi ki, birincisi, Azərbaycan etnik təmizləmə aparmayıb, Qarabağdakı ermənilər könüllü olaraq regionu tərk ediblər, ikincisi, Azərbaycanın Ermənistana qarşı hücum planları yoxdur, belə fikirlər heç vaxt bildirilməyib. “Qərbi Azərbaycan ideyası yalnız sülh və təhlükəsizlik mühitində azərbaycanlıların öz doğma yurd-yuvalarına qayıdışını nəzərdən keçirir. Cənab Prezident İlham Əliyev dəfələrlə bu barədə fikir söyləyib. Bizim üçün sülh, təhlükəsizlik əsas prioritetdir və eyni zamanda Ermənistanla sülh müqaviləsinin imzalanmasının da təşəbbüskarı bizik. Beş maddəlik təklif Azərbaycan tərəfindən Ermənistana irəli sürülüb.
Bu cür yalan, iftira xarakterli məlumatlar paylaşmaq, açıqlamalar vermək Cənubi Qafqazda sülhə kölgə salır, təhlükəsizlik risqlərini artırır. Yaxşı olardı ki, İspaniya öz daxili məsələləri ilə məşğul olsun, Kataloniyanın ayrılması ilə bağlı həyata keçirilən referenduma nə İspaniya, nə də Avropa İttifaqı müsbət yanaşdı. Azərbaycan öz ərazi bütövlüyünü, suverenliyini təmin edib, müstəqilliyini möhkəmləndirir, beynəlxalq təşkilatlarda öz mövqeyini daha da gücləndirir, müxtəlif tədbirlər həyata keçirir. Bütün bunlar sülhə, təhlükəsizliyə xidmət edən addımlardır. Eyni zamanda bu deputat Azərbaycanla bağlı yaxın və uzaq tarixi araşdırsa, Qərbi Azərbaycan ərazilərindən qovulan, bütün hüquqları pozulan, əsl etnik təmizləmələrə məruz qalan şəxslər haqqında, onların tarixi keçmişi barədə məlumatları öyrənsə daha yaxşı olar”-deyə İ.Hüseynov vurğuladı.
İradə SARIYEVA
