Arzuxan Əlizadə: “Bununla həmin məmurlar dövlətə və dövlətçiliyə zərbə vururlar”
Xəbər verildiyi kimi, bir həftə əvvəl rəhbərinə Prezident İlham Əliyev tərəfindən töhmət verilən Dövlət Turizm Agentliyi ətrafında qalmaqallı hadisələr davam edir. Dövlət Turizm Agentliyi Aparatının əməkdaşı Nicat Hüseynov Dövlət Təhlükəsizliyi Xidməti (DTX) əməkdaşları tərəfindən saxlanılıb.
DTX-da onunla bağlı istintaq aparılır. Nicat Hüseynov Səbail Rayon Məhkəməsinə çıxarılaraq, haqqında həbs qətimkan tədbiri seçilməsi barədə qərar qəbul edilib. Nicat Hüseynov xidməti fəaliyyətilə əlaqədar vəzifə səlahiyyətlərindən sui-istifadə etməkdə ittiham olunur.
Xatırladaq ki, martın 4-də Prezident İlham Əliyev Dövlət Turizm Agentliyinin sədri Fuad Nağıyevə işində yol verdiyi nöqsanlara görə şiddətli töhmət elan edilməsi barədə sərəncam imzalayıb. Fuad Nağıyevə töhmət verilməsindən başqa, Dövlət Turizm Agentliyinin Aparat rəhbəri Kənan Qasımov, Turizm siyasəti və strategiyası şöbəsinin müdiri Məhəmməd Muradov da tutduqları vəzifələrdən uzaqlaşdırılıb.
Göründüyü kimi, Prezident cavan kadrlara etimad göstərir, onlara çox mühüm postları həvalə edir, amma onlar etimadı doğrultmur. Vəzifələrindən sui-istifadə edirlər. Halbuki, həmin məmurların işləməsi üçün hər cür şərait yaradılıb. Belə olan halda Prezidentin etimadını doğrultmayan kadrlar haqda nə demək olar? Onlar özlərini yaxşı maskalayıb gözə girə bilirlər, ya onları prezidentə təqdim və tövsiyə edənlər bağışlanmaz səhvə yol verir? Belə kadrların dövlət elitasına yerləşdirilməsində xarici kəşfiyyatın əli ola bilərmi?
“Problem ondadır ki, həmin cavan kadrları bir sıra iri məmurlar himayə edir”
Sözügedən məsələyə aydınlıq gətirən AMİP sədri, millət vəkili Arzuxan Əlizadə “Bakı-Xəbər”ə açıqlamasında bildirdi ki, həmin məmurların etimadı doğrultmamasının bir neçə səbəbi var: “Bir səbəbi odur ki, gənc məmur müxtəlif xarici dillər bilsə də, idarəçilik təcrübəsi az olduğundan və yaxud da heç olmadığından vəzifə məsuliyyətini dərk etmir. Nəinki vəzifə məsuliyyəti, ümumiyyətlə həmin şəxslərin özünün məsuliyyəti olmur. Tutduğu vəzifəyə bir “qazanc yeri” kimi baxır. Görüm nə qədər büdcədən quruma ayrılan vəsaiti mənimsəyə bilərəm. Yəni bu təfəkkürlə yanaşırlar. Vəzifəyə gəlməzdən əvvəl elə maskalanırlar ki, ilk dövrlərdə bunu sezmək olmur və ya çətin olur. Necə ki, vəzifəyə gəlirlər, bu zaman heç kimi tanımırlar. Ondan sonra başlayırlar dövlət əmlakına, vəsaitinə qənim kəsilməyə. Nəticədə qurumun effektivliyi aşağı düşür, narazılıq artır və nəticədə belə biabırçı vəziyyət yaranır. Dövlət Turizm Agentliyində yaşananlar bu deyilənlərin bir göstəricisidir. Digər bir vacib problem onunla əlaqədardır ki, o cür məmurların təqdimatında ciddi səhvlərə yol verilir. Bu da təsadüfü deyil. Problem ondadır ki, həmin cavan kadrları bir sıra iri məmurlar himayə edir. Bunda da onların müxtəlif maraqları olur. İri məmurlar da kimisə təqdim edəndə onun peşə bacarığını, işin öhdəsindən nə dərəcədə gələ biləcəyini nəzərə almalıdılar. Ancaq fakt ondan ibarətdir ki, buna diqqət edilmir. Filan məmurun quhumu, yerlisi və s. amillərdən çıxış edirlər. Bununla həmin məmurlar dövlətə və dövlətçiliyə zərbə vururlar. Ona görə də onlar sərt cəzalandırılmalıdır. Çünki hansısa məmur dövlətçiliyə zərbə vurursa, bununla düşmən dəyirmanına su tökür. Necə deyərlər, Azərbaycana düşmən dövlətlərin edə bilmədiyini onlar edir”.
Vidadi ORDAHALLI
