Zaur İbrahimli: “Təqsirləndirilən şəxslər hərbi cinayətləri etiraf edir, hətta Azərbaycan tərəfinə məlum olmayanları da səsləndirirlər”
Məlum olduğu kimi, Azərbaycanda hərbi cinayətlərdə ittiham olunan ermənilərin məhkəməsi başlayıb. Artıq üç aydır ki, məhkəmə prosesi davam edir.
Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və adətlərini pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan Respublikasının vətəndaşları Arayik Harutyunyan, Arkadi Qukasyan, Bako Sahakyan, Davit İşxanyan, Davit Babayan, Lyova Mnatsakanyan və digərlərinin barəsində olan cinayəti işləri üzrə məhkəmə prosesinin baxış iclası davam etdirilir.
Maraqlıdır, Azərbaycanda hərbi cinayətlərdə ittiham olunan ermənilərin məhkəməsi Azərbaycan cəmiyyətinə, dünyaya hansı mesajlar verir? Yaxın 30 illik tariximizlə bağlı nə kimi mesajlar ötürür?
“Azərbaycana qarşı hərbi cinayətlərdə, o cümlədən insanlıq əleyhinə cinayətlərdə ittiham edilən erməni əsilli şəxslərin məhkəməsi son 30 ildə törədilən bütün vəhşiliklərin mahiyyətini açır”
Azərbaycan Milli QHT Forumunun İdarə Heyətinin üzvü Zaur İbrahimli "Bakı-Xəbər"ə açıqlamasında qeyd etdi ki, ittiham edilən erməni əsilli şəxslərin məhkəməsi son 30 ildə törədilən bütün vəhşiliklərin mahiyyətini açır: “Təqsirləndirilən şəxslərin ifadəsi və təqdim edilən sübutlar, istintaqın gedişindən məlum olur ki, Azərbaycanın 20 faiz ərazisinin işğalı Ermənistanın rəhbərliyi tərəfindən planlı şəkildə həyata keçirilib. Ermənistanın keçmiş rəhbərləri terror ideologiyasının banilərindən olub. Onların Azərbaycan xalqına qarşı cinayətləri təqsirləndirilən şəxslərin ifadələri ilə təsdiq olunub. Eyni zamanda, Azərbaycan hüquq-mühafizə orqanları 1987-ci ildən 2024-ci ilə qədər Azərbaycanın əhalisinə, ərazisinə, milli-mənəvi irsimizə qarşı törədilən təkzibolunmaz faktıar irəli sürur. Bu səbəbdən də Arkadi Qukasyanın fikirləri çox vacibdir. Həmin ifadələr Azərbaycan ərazisində separatizmin necə yarandığını və bir çox məsələləri açıq şəkildə ictimaiyyətə nümayiş etdirir. Həmçinin, Qukasyanın açıqlamaları pərdə arxasında qalanları da üzə çıxarır. Bu məhkəmənin əhəmiyyəti həm də ondan ibarətdir ki, Azərbaycan tarixçiləri və hüquq-mühafizə orqanları məlum araşdırmanı aparıb və dünya birliyinə sübutlar təqdim edib. Lakin bu sübutlar dəyər görmürdü, görməzdən gəlirdilər. Ancaq indi inkar edə bilmirlər. Çünki təqsirləndirilən şəxslər hərbi cinayətləri etiraf edir, hətta Azərbaycan tərəfinə məlum olmayanları da səsləndirirlər”.
Günel CƏLİLOVA
