Faiq Ələkbərli: “Bu muzey dünyanın gözünə pərdə asmaq məqsədilə açılıb, əslində Ermənistan faşizimə xidmət etməkdən imtina etmək istəmir”
Ermənistanın apardığı dövlət siyasətinin mahiyyətini bütün dünya bilir. Neofaşizmin, yəni “yeni faşist” cərəyanının təsiri altında İrəvanın mərkəzində Hitlerin əlaltıları olmuş Qaregin Njdeyə, “Dro” ləqəbli Drastamat Kanayana, eləcə də başqa daşnaklara abidələr qoyan Ermənistan hökuməti indi də özünü İkinci Dünya müharibəsində həlak olan və itkin düşən Sovet əsgərlərinin təəssübkeşi kimi qələmə verir.
Belə ki, Ermənistan Hollandiyada “Sovet Əsgərləri Muzeyi” (“Sovjet Ereveld Experience”) açıb.
Muzeyin Hollandiyada dəfn edilmiş, uzun müddət taleyi naməlum qalan sovet əsgərlərinə həsr olunduğu yazılır. Qeyd olunur ki, Ermənistanın açdığı bu muzey Sovet İttifaqından olan 865 əsgərin dəfn olunduğu “Sovet Şöhrət meydanı” memorial kompleksindən qısa bir məsafədədir.
Ermənistan Hollandiyada İkinci Dünya müharibəsinin 80 illiyi ilə bağlı muzey açıb və özünü “sülhpərvər” göstərməyə çalışır. Halbuki, faşistlərlə əlbir işləyən, Sovet əsgərlərinə qarşı döyüşən, əli minlərlə günahsız insanın qanına batan daşnakların heykəllərini hələ də Ermənistanda saxlayırlar. Njdenin, Dronun heykəlləri göstərir ki, Ermənistan neofaşzimi yayan ölkədir.
Ermənistan nə faşizm ideyalarından əl çəkib Njde kimilərinin heykəllərini söküb atır, nə də Sovet əsgərlərindən, bunu necə anlamaq olar?
Yeri gəlmişkən, SSRİ dağılandan sonra İkinci Dünya müharibəsinə həsr olunan abidələrə qarşı Ermənistanda böyük bir dalğa başladı, heykəllər söküldü, müharibə veteranlarının bütün imtiyazları ləğv olundu, bir sözlə, bu ölkə bütövlükdə İkinci Dünya müharibəsində iştirakını təkzib etməyə çalışdı. Siyasətləri bu şəkildə davam etdi ki, İkinci Dünya müharibəsində Hitlerə qarşı döyüşənlər düşmən elan edildi, Hitlerin əlaltıları, nasist ideologiyasının daşıyıcıları “qəhrəmana” çevrildi, hər yerdə heykəlləri qoyuldu. Hətta Ermənistan uzun müddət Faşizm üzərində qələbəni qeyd etmədi, Moskvada keçirilən rəsmi paradlara qatılmadı. Faşizim üzərində Qələbənin 80 illiyi ərəfəsində Ermənistan birdən-birə Hollandiyada muzey açdı. Bütün bunların arxasında gizlin məqamların durduğu aşkardır.
“Dünya ictimaiyyəti Ermənistandan faşist əlaltılarının abidələrini sökməyi tələb etməlidir”
Fəlsəfə doktoru, siyasi şərhçi Faiq Ələkbərli “Bakı-Xəbər”ə bildirdi ki, Ermənistanın çoxprofilli siyasət yürütməsi bu günün işi deyil, onlar bütün istiqamətdə öz siyasətlərini yeritmək üçün çalışırlar. “Ermənistanın bir tərəfdən özünü faşizmin əleyhdarı kimi qələmə verməsi, digər tərəfdən də faşist əlaltılarını geniş təbliğ etməsi onun riyakarlığını, necə təhlükəli olduğunu ortaya qoyur. Bu, erməni xislətidir, erməni siyasətidir və buna da təbii baxmaq lazımdır. Yəni burda təəccüblü heç nə yoxdur. Erməni siyasətində hər şəraitə uyğunlaşma var. Haylar (ermənilər) belə hesab edirlər ki, bütün ideyalardan özləri üçün istifadə edə bilərlər, o üzdən, gah faşizm, gah liberalizm, gah demokratiya donuna bürünürlər. Məqsəd də bütün bunlardan ermənizm üçün istifadə etməkdir. Ermənistanın Hollandiyada Sovet əsgərlərinin xatirəsinə muzey açmasında qeyri-adi bir hal yoxdur. Demək indi onlara özlərini faşizmin əleydarı kimi qələmə vermək lazımdır, bununla özlərinə dəstək qazanmaq istəyirlər, özlərini bu şəkildə tanıtmağa nail olmaq məqsədi güdürlər. Bununla göstərmək istəyirlər ki, guya faşizmin əlehinə olublar, faşizim üzərində qələbədə guya ermənilərin də payı olub. Bu, məsələnin bir tərəfi. Digər tərəfdən, Ermənistanda Njdenin, Dronun abidələri var, bunu başqa cür yozurlar, guya erməni xalqına xidmət kimi qələmə verirlər. Ermənistan İkinci Dünya müharibəsində ermənilərin faşistlərin yanında dayanmasını xüsusi şəkildə təbliğ edir. Görün, nə qədər ziddiyyətli yanaşmadır”.
F.Ələkbərli hesab edir ki, ermənilərin çoxüzlü, məkrli siyasətini bütün dünyada ifşa etmək lazımdır. Erməniçiliyin necə dəhşətli, təhlükəli bir məsələ olduğunu deyən F.Ələkbərli bildirdi ki, biz onların iç üzünü açıb ortaya qoyuruq. Siyasi şərhçi qeyd etdi ki, əslində dünya xalqları ermənilərin əsl mahiyyətini bilir, sadəcə ayrı-ayrı dövlətlər onlardan öz məqsədləri üçün alət kimi istifadə edir. “Bu muzey dünyanın gözünə pərdə asmaq məqsədilə açılıb, əslində Ermənistan faşizimə xidmət etməkdən imtina etmək istəmir. Çünki faşizm ideyası ilə daşnak ideyası bir-birini tamamlayır. Bu gün Ermənistanda alovlanan revanşizm ocağı bunun göstəricisidir. Dünya ictimaiyyəti Ermənistandan faşist əlaltılarının abidələrini sökməyi tələb etməlidir. Holandiyada “Sovet Əsgərləri Muzeyi” açıb özünü antifaşist kimi qələmə verən Ermənistan əslində neofaşizmin əsas ünvanlarından biridir. Bu baxımdan, dünya bu ünvanın birdəfəlik silinməsini tələb etməlidir. Ermənistanın bu çoxbaşlı oyunlarına son qoyulmasa, erməni faşizmi nəinki bölgə, elə Avropanın, dünyanın başqa qitələrinin də bəlasına çevriləcək”.
F.Ələkbərli bildirdi ki, Azərbaycan Ermənistandan fərqli olaraq birüzlü siyasət yürüdüb, həmişə getdiyi yolla irəliləyib, insanlıq, ədalət, bəşəriyyət uğrunda fəaliyyət göstərib, sülhün, ədalətin təmin edilməsi istiqamətində öz sözünü deyib.
F.Ələkbərlinin fikrincə, biz öz addımlarımızla bizi əsassız ittiham edənlərə layiqli cavab veririk ki, bizim yolumuz bu olub, ancaq bizə qarşı təbliat aparanların, başqa cür qələmə verənlərin əsl mahiyyəti budur, onlar yeri gələndə antifaşist, yeri gələndə isə Hitlerçi olurlar, gündə bir dona düşürlər. “Ermənistan yeri gələndə neofaşist, nasist, yeri gələndə isə antifaşist olmağı bacarır, hər cür dona girir, bu isə dünyanın diqqətindən yayınmamalıdır” - deyə F.Ələkbərli vurğuladı.
İradə SARIYEVA
