Ceyhun Məmmədov: “Təqsirləndirilən erməni əsilli şəxslər də etiraf edirlər ki, əslində reallıq Azərbaycanın dediyi kimi olub”
Bakı Hərbi Məhkəməsində keçirilən məhkəmə prosesində təqsirləndirilən şəxslər ayrı-ayrı məsələlərlə bağlı etiraflar edirlər. Onların bu etiraflarında kifayət qədər diqqət çəkən məqamlar var. Təqsirləndirilən şəxs Arkadi Qukasyan dövlət ittihamçılarının suallarını cavablandırarkən bildirib ki, 1992-ci ildə Qarabağ ərazisində 30 mindən az erməniəsilli sakin yaşayırdı.
O deyib ki, sonradan həmin şəxslərin bir qismi Qarabağda qaldı, bir qismi Ermənistana, digər qismi Rusiyaya köçdü.
Qukasyan açıq etiraf edib ki, 1992-ci ildə Qarabağ ərazisində 30 mindən az erməni əsilli sakin yaşayırdı. Bundan başqa, 44 günlük müharibədən sonra erməni mediasına açıqlamasında Araik Arutyunyan deyirdi ki, Birinci Qarabağ müharibəsində Ağdərə rayonunu tərk edən ermənilərin çoxu 1994-cü ilin 12 mayında əldə edilən atəşkəsdən sonra geri qayıtmadı.
Məlumat üçün qeyd edək ki, Agdərə əhalisinə və ərazisinə görə keçmiş “DQMV-nin” ən böyük rayonu idi. Bütün bu faktlar onu sübut edir ki, 44 günlük müharibəyə qədər Qarabağda nəinki 145 min, heç 70 min erməni yaşamayıb.
Məhkəmədə açıq şəkildə bildirilib ki, Qarabağda Ermənistanın iddia etdiyi kimi 120 min erməni yaşamırmış və onların sayı qat-qat aşağı olub. Qukasyan Ermənistanın və onların havadarlarının bu yalanlarını ifşa edir. O da aydın olur ki, 1994-cü ilin mayında Ağdərədən gedən ermənilər bir daha geri qayıtmayıb. Bu etiraflardan tam aydın olur ki, ermənilər hələ o vaxtdan onlara aid olmayan ərazidən könüllü olaraq bir daha qayıtmamaq şərtilə köçüb gediblər. Beləliklə, gedən ermənilərin yerini saxta rəqəmlərlə doldurmağa çalışan Ermənistanın süni şəkildə yaratdığı demoqrafiya mənzərəsi tamamilə yalanları, qeyri-reallığı əks etdirib.
“...Özləri özlərini ifşa edirlər”
Millət vəkili Ceyhun Məmmədov “Bakı-Xəbər”ə “Dəfələrlə Azərbaycan tərəfin deməsinə baxmayaraq ki, ermənilər Qarabağda yaşayan əhalinin sayını dəfələrlə şişirdirlər, amma erməni tərəf Qarabağda guya 100 mindən artıq erməni yaşadığını israr edirdi. Hətta 130 min erməni yaşadığı iddiasını da ortaya atmışdılar. Hesab edirəm ki, bu açıqlama erməniləri növbəti dəfə ifşa etmiş oldu. Göstərdi ki, heç də məsələ Ermənistanın dediyi kimi deyil, Qarabağda 100 min erməninin yaşaması barədə ermənilərin iddiası tamamilə əsassızdır. Burda maksimum dərəcədə cəmi 30 min əhali yaşayıb” - deyə bildirdi.
C.Məmmədovun sözlərinə görə, bu əhalinin bir qismi də sonradan Qarabağa köçürülüb gətirilən ermənilər olub. “Təəssüflə qeyd etmək lazımdır ki, Ermənistanın bu yalan təbliğatını bir sıra Qərb dövlətləri və Qərb mediası da dəstəkləyirdi, zaman-zaman Azərbaycan əleyinə bir çox ittihamlar və fikirlər səsləndirirdilər. İddia edirdilər ki, Qarabağda yaşayan ermənilərin sayı ilə bağlı guya Azərbaycan tərəfi düzgün olmayan məlumatlar verir. Amma proses onu göstərdi ki, heç də elə deyil. Bu gün təqsirləndirilən erməni əsilli şəxslər də etiraf edirlər ki, əslində reallıq Azərbaycanın dediyi kimi olub. Sadəcə, ermənilər bu rəqəmləri məqsədli şəkildə şişirdiblər, davamlı olaraq dünyada belə bir təbliğat aparıblar ki, guya Qarabağda yaşayan ermənilərə qarşı Azərbaycan addımlar atıb, hansısa tədbirlər həyata keçirib. Ancaq baş verənlər bir daha onu göstərdi ki, bu iddiaların heç bir əsası yoxdur və Azərbaycanın dedikləri faktdır. Bunu hətta orda yaşayan ermənilər özləri də məqsədli şəkildə həyata keçirirdilər ki, bu cür yalanları yaymaqla dünya ictimaiyyətinin fikrini çaşdırsınlar. Belə bir fikir yaratsınlar ki, guya vəziyyət ermənilərin dediyi kimidir. Artıq o cinayətkarlar həbs olunub. Ölkə rəhbərliyinin prinsipiallığı, qətiyyəti nəticəsində bunlar tam ifşa olunub. Bu məhkəmə prosesində özləri özlərini ifşa edirlər. Azərbaycanın uzun illər səsləndirdiyi həqiqətləri bir daha onlar özləri də təsdiq edirlər ki, əslində real vəziyyət necədir, real vəziyyət nədən ibarətdir. Baş verən faktlar bir daha onu göstərir və təsdiqləyir” - deyə C.Məmmədov qeyd etdi.
İradə SARIYEVA
