Qasım Hacıyev: “Aydın universitetinin müəlliminin irəli sürdüyü hər iki iddia da əsassızdır, absurddur, tarixin təhrif edilməsidir”
Tarixi mənbələrdə, dünyanın obyektiv tarixçilərinin yazılarında “qədim erməni dövləti” barədə bəhs edilməyib, edilmir də. Yalnız ermənilər və onlara züy tutanlar qondarma mənbələr quraşdırıb hansısa “qədim erməni krallığından” danışmağa cəhd edirlər.
Türkiyənin Haber Global TV-də İstanbul Aydın Universitetinin müəllimi Ramazan Kürdoğlu debat zamanı bildirib ki, eradan əvvəl VIII əsrdə (e.ə722-ci ildə) Assuriya kralları İudey çarlığına (yəhudi çarlığı) hücum edib bu dövləti ləğv etdilər, yəhudiləri köçürüb Babilsitanda, indiki İraq ərazisində yerləşdirdilər. R.Kürdoğlu iddia edib ki, Assuriya krallarının yəhudilərin üzərinə yürüşündə “erməni krallığı” da iştirak edib. Guya o dövrdə erməni krallığı olub və bunlar Assuriya kralları ilə birgə yəhudilərin üzərinə gediblər.
Burda söhbət 2800 il bundan əvvəldən gedir və həmin dövrdə də bölgədə Midiya, Urartu kimi qədim dövlətlər hökm sürürdü. Həmin çağda erməni krallığı deyilən bir krallıq mövcud olmayıb. O vaxt erməni çarlığı nə gəzirdi ki, Assuriya kralları ilə birləşib yəhudilərin üzərinə yürüş də edəydi, yaxud bu yürüşə qatılaydı?.
Hələ bu azmış kimi, R.Kürdoğlu ikinci bir iddia irəli sürüb. O deyib ki, guya 1345-ci ilə qədər bu bölgədə erməni krallığı (?) yaşayıb. Bu adam Səlcuqlar dövründən - XI, XII əsrlərdən danışır və sonra da deyir ki, “ erməni krallığı” eramızın 1345-ci ilə qədər mövcud olub. Bu da, təbii, tamamilə absurddur.
O, 1500 illik zaman fərqi ilə iki absurd məsələdən danışır, birini eradan əvvəl 722-ci ilə, o birini isə eramızın 1345-ci ilinə bağlayır.
“Bizim eradan əvvəl hansısa bir “erməni krallığının” olduğunu və onun guya eramızın 1345-ci ilinə qədər mövcudluğunu qoruduğunu demək tarixin özünə xəyanətdir”
Professor Qasım Hacıyev “Bakı-Xəbər”ə şərində bildirdi ki, R.Kürdoğlunun “erməni çarlığı” ilə bağlı irəli sürdüyü iddialar absurddur, heç bir tarixi əsası yoxdur. Q.Hacıyev qeyd etdi ki, guya eradan əvvəl erməni krallığının olması, bu “krallığın” 1345-ci ilə qədər yaşaması fikri də cəfəngiyatdan başqa bir şey deyil. Assuriya krallarının dövründə hansısa bir erməni izini axtarmağın özünün də yanlış olduğunu deyən Q.Hacıyevin sözlərinə görə, bu, tarixin təhrif edilməsi və ermənilərin qədim xalqlara süni şəkildə calaq edilmə cəhdidir. Q.Hacıyev qeyd etdi ki, tarixdə Assuriya dövləti olub və assurluların İsrail çarlığına hucumu, onu darmadağın etməsi, əhalisini isə başqa yerlərə köçürməsi faktdır. “Allah Mustafa Kamal Paşaya rəhmət eləsin, deyirdi ki, türkün türkdən başqa dostu yoxdur. Apardığım araşdırmalar, rast gəldiyim məsələlər göstərir ki, təkcə ermənilər özləri deyil, bəzi ermənipərəstlər də belə yalanlar uydurublar. Ən çox rus tarixçiləri bizim tariximizi ermənilərin xeyrinə saxtalaşdırıblar, bundan sonra onlar xristian dövlətlərinin içərisində özlərinə həmfikirlər tapırlar. Yadınıza gəlir, isveç əsilli bir iş adamı bir xəritə çıxarıb ki, onun üzərində Urartu yazısı var, bu Urartu yazısında da guya “Ermənistan” sözü yazılıb. Saxtakarlıq belə yaranır və belə yayılır. Heç şübhəsiz, Kürdoğlu kimiləri də erməni yalanlarının toruna düşüb. Soyadından da göründüyü kimi, o türk deyil. Biz bu fikri söyləməkdə milli ayrıseçkilik salmaq, hansısa xalqı pisləmək məqsədi güdmürük. Amma müxtəlif xalqların içindən elələri çıxır ki, erməni qədər bizə ziyan vurur. Aydın universitetinin müəlliminin qədim “erməni krallığının” olması barədə dedikləri uydurmadır. Bunu hansı məqsədlə söylədyini özü daha yaxşı bilər, amma yalan uydurmaq, cəfəngiyat danışmaq tarixçiyə yaraşmayan bir işdir. Dünya bilir ki, nə eradan əvvəl, nə eramızda qədim erməni krallığı olmayıb, amma Assuriya dövləti də, Urartu dövləti də olub, onlar qədim dövlətlər idilər. Mifik “erməni krallığı” uydurub onu Assuriyya ilə paralel dövlət kimi təqdim etməyin özü ən böyük savadsızlıqdır. Bizim eradan əvvəl hansısa bir “erməni krallığının” olduğunu və onun guya eramızın 1345-ci ilinə qədər mövcudluğunu qoruduğunu demək tarixin özünə xəyanətdir. Belə bir fakt yoxdur”.
Q.Hacıyev bildirdi ki, bəzi tarixçilər Armenia ilə erməniləri bağlamağa cəhd edirlər, Armenia isə dövlət deyildi, coğrafi bir məkan idi. Sadəcə, ermənilər və onların toruna düşənlərin xəyalpərəstliklə, nağılpərəstliklə Armeniadan yapışıb “Böyük Ermənistan” xülyasına düşdüklərini deyən Q.Hacıyev bütün bunları əsassız və cəfəngiyat hesab edir. “Çox təəssüflər olsun ki, bəzi tarixçilər ermənilərə dövlət düzəltmək üçün bu cür yalanlara, saxtakarlıqlara əl atırlar. Bilirsiz ki, onlar Urartu dövlətini “Ermənistan” hesab edirlər. Urartu vardısa Armenia nədir, Armenia vardısa Urartu nədir bəs? Hər şeyi beləcə qarışdırırlar.
Apardığımız tədiqiqatlar nəticəsində deyə bilərik ki, Urartu Cənubi Qafqaza daxil olan dövlət deyil, urartulular ermənilərin babaları olmayıb, Armeniya adlı dövlət yox idi, bu bir ərazi olub. O ərazidə də müxtəlif dövlətlər vardı, ən çox da türklərin yaratdığı dövlətlər olub. İndiyə qədər hamısını silə-silə gəliblər. Bu isə tamamilə yanlışdır.
Aydın universitetinin müəlliminin irəli sürdüyü hər iki iddia da əsassızdır, absurddur, tarixin təhrif edilməsidir. Onun tarixdə mövcud olmayan “erməni krallığı” haqda əfsanə danışması hansı məqsədə qulluq edir? Çox istərdim ki, bu fikirlər həmin adamın diqqətinə çatdırılsın” - deyə Q.Hacıyev bildirdi.
İradə SARIYEVA
