Rauf Zeyni: “Görünür, Vardanyanın lobbiçiliyini edən hansısa bir erməni ona pul təklif edib və o, həmin maddi vəsaitin hesabına...”
İşgəncə, muzdluluq, müharibə qanunlarını və adətlərini pozma, terrorçuluq, terrorçuluğu maliyyələşdirmə və digər maddələri ilə təqsirləndirilən Ruben Vardanyanın Bakı Hərbi Məhkəməsində məhkəməsinin keçirilməsi xaricdəki bəzi qüvvələri ciddi narahat edir.
Bəziləri hələ də onun necə təhlükəli, dəhşətli cinayətlər törətməkdə ittiham edildiyinin fərqinə varmaq istəmir, vaxtilə Vardanyandan aldıqları pulların, rüşvətlərin şirinliyinə dalıb onu “humanist” adlandırmaqdan çəkinmirlər. Beynəlxalq hüquqdan dəm vuran bu adamlar nədənsə dərk etmirlər ki, Vardanyanı müdafiə etməklə və onu azadlığa çıxarmaq üçün dəridən-qabıqdan çıxmaqla əslində beynəlxalq hüququn prinsiplərini pozurlar, başqa ölkənin, özü də müstəqil hakimiyyət olan məhkəmənin işinə müdaxilə edirlər. Vardanyanın puluna şirnikib, çirkli pullarına tamahlanıb onu müdafiə edənlərin içində təəssüf ki, özünü müsəlman adlandıran(lar) da tapılır.
“Ruben Vardanyanın işi üzrə məhkəmə iclaslarında iştirak etmək üçün Bakıya getməyə qərar verdim”. Bu barədə pakistanlı hüquq müdafiəçisi və 2016-cı il Aurora mükafatına namizəd Səidə Qulam Fatimə X-dəki mikrobloqunda yazıb.
Səidə Qulam Fatimə haqqı-ədaləti danıb, dindaşlarının faciəsinə səbəb olan bir kəsi müdafiə etməklə, əslində özünün qeyri-obyektivliyini, ədalətsizliyə şərik olduğunu göstərir. Bu adam reallığın fərqinə varmaq istəmir və Vardanyanı müdafiə etmək üçün Bakıya gəlmək istəyir, bu azmış kimi, başqalarını da ona qoşulmağa çağırır. Deyir ki, “istənilən şəkildə həmrəyliyinizi göstərmək üçün mənə qoşulun”. Bunu pakistanlı hüquq müdafiəçisi bildirir. O adam Xocalı qətlimında susub, Azərbaycanın torpaqları işğal altında olanda, məscidlərimiz viran qoyulanda, donuzxanaya çevriləndə bir kəlmə də olsun danışmayıb, Ermənistana çağırış etməyib ki, bu vandallığa, bu barbarlığa son qoy. O, bir dəfə də olsun ədaləti müdafiə etməyib, Vardanyana gələndə isə dili açılıb və onun müdafiəsinə qalxıb, həqiqəti dəstəkləməyə cəsarəti çatmayan “hüquq müdafiəsçi” Vardanyanın çirkli pullarına susayıb yalanı, şəri dəstəkləyib.
Erməni mediasının yaydığı fotodan lap açıq görsənir ki, Fatimə ilə Vardanyan yaxın dost olublar və təbii, onları hansısa çirkin fəaliyyət birləşdirib. Fatimə də Vardanyanın pulla satın aldığı “hüquq müdafiəçilərindən” biridir. Yoxsa bu adam niyə çığır-bağır salsın ki? Niyə başqa vaxt Bakıya gəlmək istəməyib? Azərbaycan vətəndaşları 30 ilə yaxın öz yurd-yuvalarından uzaq salındılar, didərgin, qaçqın həyataı yaşadılar, onda nə üçün bu “hüquq müdafiəçisi” bizim tərəflərdə görsənmədi, qaçqın-köçkünlərimizin halını sormadı? Niyə bir dəfə demədi ki, Ermənistan Azərbaycanın torpaqlarını işğal edib 1 milyona yaxın vətəndaşını öz torpağında qaçqına çevirib? Nə üçün demədi ki, Ermənistan dövləti azərbaycanlıları öz doğma evlərindən deportasiya edib, Qərbi azərbaycanlılar geri qayıtmalıdır? Çünki bu onun kimilərinin fəaliyyət sferasına aid deyil, belələri heç zaman haqqın-ədalətin yanında ola bilməz.
“Bu işin kökündə maddi maraq dayanır, başqa bir anlam görmürəm”
Müstəqil ekspert Rauf Zeyni “Bakı-Xəbər”ə şərhində bildirdi ki, pakistanlı hüquq müdafiəçisinin Vardanyanı müdafiə etməsi təəssüf doğurur. Bununla belə, R.Zeyni qeyd etdi ki, hər bir vəkil, hüquq müdafiəçisi bu məsələyə reaksiya verə bilər, ancaq bunun əsası olmalıdır. “Səidə Qulam Fatimə pakistanlı olsa da görünür ki, Azərbaycan həqiqətlərini ona lazımı şəkildə çatdıran olmayıb, o gerçəyi bilmir. Ruben Vardanyanı da düz-əməlli tanımır, bilmir ki, o kimdir. Görünür, Vardanyanın lobbiçiliyini edən hansısa bir erməni ona pul təklif edib və o, həmin maddi vəsaitin hesabına Vardanyanı müdafiə etmək istəyir. Bu işin kökündə maddi maraq dayanır və başqa bir anlam görmürəm.
Bu adam vəkildirsə, hüquqşünasdırsa, maraqlanmalıdır ki, müdafiə etdiyi şəxs kimdir və gəlib hansı səviyyədə onu müdafiə etsin. Azərbaycanın Pakistanla münasibətləri qardaşlıq münasibətidir və biz bir-birimizə sıx bağlıyıq. Həmin şəxs bir pakistanlı kimi Pakistanın dövlət siyasətini bilmir. Maraqlanmalıdır ki, onun ölkəsi hansı ölkə ilə dostdur, qardaşdır. O bilməlidir ki, qardaş ölkəyə Ermənistan hansı zərbələri vurub, Bakıda mühakiməsi gedən ermənilər hansı cinayətlər işləyiblər. Onları bilsə, mənə elə gəlir ki, o, vəkillikdən, Vardanyanı müdafiə etməkdən dərhal imtina edər”.
R.Zeyni hesab edir ki, Səidə Qulam Fatimənin bu addımı atmasının bir səbəbi, ola bilsin, onun məlumatsız olmasıdır. R.Zeyninin fikrincə, bu üzdən də o belə bir səhvə yol verir.
Müsahibimiz qeyd etdi ki, saxta erməni təbliğatı ilə məşğul olanlar məlumatsız şəxslərdən istifadə edirlər.
İradə SARIYEVA
