Əli Orucov: “Bu o deməkdir ki, Moskva KTMT ilə bağlı İrəvana təzyiqləri artıracaq”
Ermənistan 2025-ci ilin sonunadək Kollektiv Təhlükəsizlik Müqaviləsi Təşkilatının (KTMT) büdcəsinə üzvlük haqqını ödəmədiyi təqdirdə, təşkilata üzv ölkələr müxtəlif ssenarilərə baxa bilərlər.
Bu barədə Rusiya xarici işlər nazirinin müavini Aleksandr Pankin bildirib.
Onun sözlərinə görə, bu halda KTMT üzvünün artıq iki ildir ki, üzvlük haqqını ödəmədiyi vəziyyət yaranacaq: “Güman ki, heç kim heç kimi qovmayacaq, heç kim avtomatik olaraq getməyəcək. Lakin yəqin ki, ölkələr arasında gələcək əməkdaşlığın modallığı məsələsinə baxmaq olar. Bunu onlar özləri gedəcək və ya onları qovacaqlar kimi qəbul etmək lazım deyil, çünki mən müxtəlif şəxslərin fikirlərini oxuyuram”.
Madam Ermənistan qovulmayacaq, o zaman Pankin “müxtəlif ssenarilərə baxa bilərlər” deyərkən nəyi nəzərdə tutur? Bayden administrasiyası dövründə Rusiya KTMT ilə bağlı Ermənistana ciddi təzyiq etməyib. Bu dəfə həqiqətən hansısa cəza olacaqmı? Çünki artıq ABŞ-ın prezidenti Bayden yox, Trampdır.
“Son vaxtlar Ermənistanda Rusiyaya bağlı revanşist qüvvələrin nəzərəçarpacaq dərəcədə fəallaşması təsadüf deyil”
Sözügedən məsələni “Bakı-Xəbər”ə şərh edən AMİP funksioneri Əli Orucovun fikrincə, bu o deməkdir ki, Moskva KTMT ilə bağlı İrəvana təzyiqləri artıracaq: “Təzyiqlər də müxtəlif formada olacaq. Əvvəla, Ermənistanı KTMT-də fəaliyyətini dondurduğuna və vəsait ödəmədiyinə görə təşkilatdan uzaqlaşdırmaq Rusiyanın mənafeyinə uyğun deyil. Əksinə, belə bir qərar Paşinyanın maraqlarına uyğun olacaq. Yəni Paşinyanın etməli olduğu işi Rusiya edəcək. O da bundan maksimum istifadə edərək Fransa və digər ölkələrlə hərbi müttəfiqlik haqqında müqavilə imzalayacaq. Onsuz da Avropa İttifaqının Ermənistanda artan hərbi mövcudluğu kiməsə sirr deyil. Ona görə də Rusiya belə bir əsası Ermənistan hakimiyyətinə verməz. Əvəzində Paşinyan hakimiyyətinə müxtəlif təzyiqləri artıracaq. Artıq bunun əlamətləri ortadadır. Son vaxtlar Ermənistanda Rusiyaya bağlı revanşist qüvvələr nəzərəçarpacaq dərəcədə fəallaşıb. Hesab edirəm ki, bu, əsla təsadüfi deyil. Rusiya yaxşı bilir ki, Birləşmiş Ştatlar əvvəlki kimi Paşinyanı müdafiə etməyəcək. Avroittifaq isə ABŞ-ı əvəzləmək gücündə deyil. Üstəlik, son vaxtlar Ermənistan rəsmiləri Rusiyaya yönəlik manevrlər etməyə başlayıblar. Digər tərəfdən, Rusiyanın Ermənistana iqtisadi təsir rıçaqları genişdir. Təkcə Ermənistan istehsalı olan məhsulların idxalına məhdudiyyətin qoyulması və qazın qiymətini artırmaq kifayətdir ki, İrəvan geri addım atsın. O baxımdan hesab edirəm ki, Rusiya Ermənistan barədə o qədər də narahat görünmür”.
Vidadi ORDAHALLI
