Ağ Evdə kameralar qarşısında Ukrayna lideri Vladimir Zelenski ilə ABŞ prezidenti Donald Tramp arasında mübahisədən sonra Zelenskiyə qucaq açan Avropa Birliyi (AB) liderləri Trampı qəzəbləndirib.
“The Telegraph” qəzeti yazır ki, Tramp ABŞ-la AB arasında son vaxtlar onsuzda gərgin olan münasibətləri daha da pisləşdirəcək addım atmağa hazırlaşır. Qəzetin iddiasına görə, Tramp Almaniyadakı təxminən 35 min ABŞ əsgərini geri çəkməyi planlaşdırır.
İllərdir silahlı qüvvələri üçün kadr tapmaqda çətinlik çəkən və Rusiya-Ukrayna müharibəsindən sonra müdafiəsini gücləndirməyə çalışan Almaniyaya bir zərbəni də Tramp vuracaq. Administrasiyaya yaxın mənbələr “The Telegraph” qəzetinə bildiriblər ki, Avropanın müdafiə qabiliyyətinə daha çox töhfə verməli olduğu barədə dəfələrlə xəbərdarlıq edən ABŞ prezidenti qitənin “müharibə təkanlarından” getdikcə daha da məyus olub. Ağ Evə yaxın mənbə, Trampın Avropanın müharibə tərəfdarı kimi görünməsindən qəzəbləndiyini deyib.
Bu addım ABŞ-ın Avropadakı hərbi mövcudluğunun yenidən qurulması prosesinin bir hissəsi kimi qiymətləndirilir. Məsələ ilə bağlı açıqlama verən ABŞ-ın milli təhlükəsizlik sözçüsü Brian Hughes də deyib ki, ABŞ ordusu ölkənin maraqlarına qarşı mövcud təhdidləri aradan qaldırmaq üçün bütün dünyada qoşunların yenidən yerləşdirilməsini həmişə nəzərdən keçirir.
İddialara görə, Tramp Almaniyadakı ABŞ qoşunlarını Rusiya ilə yaxın əlaqələri olan Macarıstana yönəldəcək. Bu arada, Aİ-nin Brüsseldə keçirilən fövqəladə sammitində Macarıstanın baş naziri Viktor Orban bütün digər üzv dövlətlərin imzaladığı Ukraynaya dəstək vədinə veto qoyub.
Məlumata görə, Tramp müdafiə xərclərini artıran NATO ölkələrinə diqqət yetirmək üçün Avropadakı bəzi ABŞ qoşunlarını yenidən yerləşdirməyi düşünür və bununla bağlı plan hazırlanır.
TAHİR
