Ukrayna ordusu ələ keçirdiyi Rusiyanın Kursk vilayətindən yaxın iki həftə ərzində çəkilə bilər. Belə bir iddia ilə “New York Post” çıxış edib.
Qeyd edilir ki, ukraynalı əsgərlər bu bölgədəki əməliyyatlarının siyasi əhəmiyyətli olmasına baxmayaraq, son vaxtlar ciddi itkilər veriblər. Bundan başqa, əməliyyat Ukraynanın əsas hərbi resurslarını da tükəndirir, Rusiya isə digər cəbhələrdə irəliləməyə davam edir.
Son məlumatlara görə, Rusiya qoşunları Sumı vilayətinin sərhədini keçərək, Ukraynanın nəzarətində olan Kursk vilayətinin strateji əhəmiyyətli Suca şəhərinə doğru irəliləyir. Britaniyanın “The Telegraph” qəzetinin yazdığına görə, fevralın ortalarında başlayan əməliyyat nəticəsində bölgədəki təxminən 10 min Ukrayna əsgərinin dörddə üçü mühasirəyə düşmək təhlükəsi ilə üzləşib. Ukraynalı bir zabit qəzetə deyib ki, “mühasirə təhlükəsi realdır” və ordu itkisiz qoşunlarını geri çəkmək üçün Kursk vilayətindən çəkilməyi düşünür.
Bildirilir ki, Rusiya ordusu iki fərqli nöqtədən irəliləyir və Ukrayna qüvvələri üçün həyati əhəmiyyət kəsb edən təchizat dəhlizlərini təhdid edir. Regionda qalan Ukrayna qoşunları ilə əlaqə yalnız dar dəhlizlə təmin edilir ki, burada Rusiya pilotsuz təyyarələrinin nəzarəti altındadır. Qeyd olunub ki, ABŞ martın əvvəlində Ukraynaya silah göndərməyi və kəşfiyyat məlumatlarını paylaşmağı dayandırdıqdan sonra Ukrayna ordusu çətin vəziyyətə düşüb və cəbhə xəttində əsgərlərin mənəvi-psixoloji durumu ciddi şəkildə aşağı düşüb.
Qeyd edək ki, Kursk vilayəti Kiyevdə sülh razılaşmasından sonra ərazi mübadiləsi üçün ən böyük “kozır” kimi görülürdü.
TAHİR
