Təbriz Musayev: “Səfir Kopırkinin ölü Minsk Qrupunu diriltmək cəhdi təsadüfi deyil”
Rusiya Azərbaycanın ATƏT-in Minsk Qrupuna olan mənfi münasibətini bilə-bilə, bu məsələni son vaxtlar gündəmə gətirməyə çalışır.
Rusiyanın Ermənistandakı səfiri Sergey Kopırkin bununla bağlı məsələləri yenidən qabardıb: “Minsk Qrupu ətrafında vəziyyət dəyişib”.
Diplomat xatırladıb ki, MQ-nin qərbli həmsədrləri (ABŞ və Fransa) rusiyalı həmkarı ilə işləməkdən imtina edib. Lakin səfirin sözlərinə görə, “format indi müzakirə oluna bilər, baxmayaraq ki, bir həmsədr (Fransa) rusofob mövqe tutur, ikincisi (ABŞ) isə Rusiyaya qarşı siyasətini yenidən nəzərdən keçirir”.
Halbuki Rusiya XİN-in başçısı Sergey Lavrov, eləcə də onun sözçüsü Mariya Zaxarova ötən il və ondan qabaqkı dönəmlərdə dəfələrlə MQ-nin artıq mövcud olmadığını bəyan ediblər. Zaxarova üstəlik, yeganə çıxış yolu kimi Bakı və İrəvanı qrupun rəsmi ləğvi üçün ATƏT-ə birgə müraciət etməyə çağırıb. Yaxşı bəs indi nə baş verir? Rusiyanın MQ ilə bağlı mövqeyini dəyişməsində məqsədi nədir?
Sözügedən məsələ ilə bağlı fikirlərini baki-xeber.com-la bölüşən İrəvan Azadlıq Təşkilatının sədri Təbriz Musayev hesab edir ki, bu, Rusiyanın əsl imperiya xislətini ortaya qoyur: “Əvvəla, Qarabağ məsələsi yeganə hal idi ki, burada Minsk Qrupunun həmsədrləri ortaq mövqedən çıxış edirlər. Halbuki, Rusiya ilə digər həmsədr ölkələr arasında kifayət qədər bəzi məsələlərə münasibətdə ziddiyətlər mövcuddur. Ancaq mövzu Qarabağ olanda bütün həmsədr ölkələr ermənilərin manafeyindən çıxış edirdilər. Son iki ildə Rusiyanın Minsk Qrupu məsələsinə passiv mövqedən yanaşması heç də Azərbaycana olan xoş münasibətdən irəli gəlmirdi. Bu, Ukraynaya hücumla bağlı Qərblə Rusiya arasında yaşanan kəskin münasibətlərlə əlaqədar idi. Çünki Qərb bütün məsələlərdə, o cümlədən, Azərbaycan-Ermənistan münasibətlərinin tənzimlənməsində Rusiya ilə əməkdaşlığı dayandırmışdı. Yoxsa Zaxarovanın dedikləri o demək deyildi ki, Rusiya Minsk Qrupunun buraxılmasını istəyir. Səfir Kopırkinin ölü Minsk Qrupunu diriltmək cəhdi təsadüfi deyil. Məhz Moskvadan təlimat gəldiyi üçün o, belə bir açıqlama ilə çıxış edib. Nəzərə almaq lazımdır ki, təyyarəmiz vurulandan sonra Rusiya-Azərbaycan münasibətlərində bir soyuqluq var. Donald Trampın, prezident olandan sonra Ukraynaya ABŞ-ın münasibətinin kordinal şəkildə dəyişməsi, Kiyevi təslimçi sülhə sövq etməsi, Vaşinqton-Moskva təmaslarının bərpa olunması yeni vəziyyət yaradır. Ermənistanda Rusiyaya bağlı revanşist qüvvələr yenidən aktivləşib. Revanşistləri gücləndirmək üçün Rusiya müxtəlif alətlərdən istifadə edir. Onlardan biri də ATƏT-in Minsk Qrupu ətrafında spekulyasiyalar qurmaqdır. Çünki istəsək də, istəməsək də Minsk Qrupunun mövcudluğuna rəsmən xitam verilməyib. Bir sözlə, Rusiya Cənubi Qafqazda təsirini gücləndirmək üçün Minsk Qrupundan bir vasitə kimi istifadə etmək istəyir”.
Vidadi ORDAHALLI
