Azər Həsrət: “Birləşmiş Ştatların yeni administrasiyasını məlumatlandırmağa ehtiyac var”
“Azərbaycanlı jurnalistlərin, vətəndaş cəmiyyəti fəallarının, hüquq müdafiəçilərinin və müxalif fiqurların həbslərinin davam etməsi dərin narahatlıq doğurur”. ABŞ Dövlət Departamentinin rəsmisi Vaşinqton müxbiri Aleks Raufoğlunun suallarına cavabda deyib.
Daha sonra Birləşmiş Ştatların vitse-prezidenti Vensə istinad edən Departament sözçüsü fikrinə belə davam edib: “Vitse-prezident Vensin də vurğuladığı kimi, “biz ifadə azadlığını dəstəkləməli, senzuranı durdurmalı və müxalifətin təqibini rədd etməliyik”. Və biz Azərbaycan hökumətindən bu mesajı ciddi qəbul etməsini gözləyirik” deyə Departamentin adının çəkilməsini istəməyən rəsmisi fikrini yekunlaşdırıb.
Belə bir açıqlamanın fonunda güman etmək olarmı ki, Birləşmiş Ştatlar administrasiyasında köhnədən qalan qüvvələr bu məsələləri çözələyirlər? Köhnə mənbələrə, məlumatlara söykənirlər. Yəni Azərbaycanla bağlı belə ittihamçı, qara, qərəzli siyasət aparmağı Tramp administrasiyasının xətti kimi qəbul etmək olarmı? Böyük ehtimal var ki, Departament rəsmisinin məlum fikirləri ABŞ administrasiyasında o köhnədən qalmış qüvvələrin təsiri nəticəsində ortaya çıxmış olan fikirlər və bəyanatlardır.
Sözügedən məsələni baki-xeber.com-a şərh edən siyasi şərhçi Azər Həsrət hesab edir ki, Birləşmiş Ştatların yeni administrasiyasını məlumatlandırmağa ehtiyac var: “Çünki həqiqətən də onlar əllərinin altında olan informasiyalara əsaslanıb fikirlər səsləndirirlər. Əvvəlki informasiyalar da ermənipərəst Bayden administrasiyasının məhsuludur. Əlbəttə ki, yeni administrasiya hələ tam şəkildə dünyanın hər yerində nələrin baş verdiyini müəyyən edib aydınlaşdırmayıb. Yeri gəlmişkən qeyd edim ki, bu, Azərbaycanla bağlı administrasiyanın ikinci dəfə diqqət çəkməsidir. Çünki Donald Tramp yanvarın 20-də prezidentliyə and içərkən özünün çıxışında dünyanın hər tərəfindəki məsələlər barəsində danışsa da, Cənubi Qafqazın adını belə çəkməmişdi. Prezidentlik vəzifəsini icra etməyə başlayandan sonra etdiyi çıxışlarda da heç bir fikir səsləndirməyib. Yalnız ABŞ dövlət katibi Marko Rubio qardaş Türkiyənin xarici işlər naziri Hakan Fidanla görüşərkən Cənubi Qafqazda təhlükəsizlik məsələləri barədə danışıb. Bu da ikinci hadisədir ki, Azərbaycanla bağlı məsələyə toxunulur. Özü də göründüyü kimi, burada məsələnin üzərinə gedilməsi ABŞ-ın təşəbbüsü deyil. Azərbaycan əsilli jurnalistin sualına qarşılıq olaraq verilmiş ümumiləşdirilmiş bir cavabdır. Diqqət edəndə görürük ki, Departament rəsmisi cavabında ayrıntılara varmır. Çünki birincisi ayrıntılardan heç xəbərləri yoxdur. İkincisi, ümumiyyətlə, bizim bölgə ilə bağlı yetərincə məlumatlı deyillər. Üçüncü bir tərəfdən də ilk gündən bunu deyirəm ki, Tramp administrasiyasının Cənubi Qafqaz adında bir dərdi yoxdur. Onlar burada istər Ermənistan, istər Azərbaycanla bağlı, yaxud da Gürcüstanla bağlı nəsə ciddi planlara sahib deyirlər. Ən azından indilikdə. Çünki Tramp administrasiyası bizim regionu Türkiyənin təsir dairəsi hesab edir və burada görmək istədiyi işlərdə Ankaranı önə verəcək. O baxımdan narahatlıq üçün əsas yoxdur. Sadəcə Azərbaycan müvafiq dövlət qurumlarının Tramp administrasiyası ilə bu yöndə işləməsinə zərurət var. Əminəm ki, işləyirlər də. İndi informasiyalardır bəzən həddən artıq çox olur, diqqət yetirmək çətin olur. Üstəlik, anidən bir sual verəndə ona da adam hazırlıqsız çıxanda ümumi cavab verməklə yaxasını qurtarmaq istəyir. Hər halda biz Tramp administrasiyası ilə işləsək bu cür məsələləri uyğun bir şəkildə həm izah edə biləcəyik, həm də gərəksiz mübahisələrə səbəb yaratmayacağıq”.
Vidadi ORDAHALLI
