Şakir Ağayev: “Trampın maliyyəsini kəsdiyi media qurumları onun siyasətinə qarşı fəaliyyətlərini davam etdirirlər”
“Reuters” agentliyi ABŞ prezidenti Donald Tramp administrasiyasının Birləşmiş Ştatlara sığınan azı 240 min ukraynalının qaçqın statusunu ləğv etməyi planlaşdırdığı barədə məlumat yayıb. AĞ Evin mətbuat katibi Kerolayn Livittin isə bunu təkzib edib, bildirib ki, bu məlumat həqiqətə uyğun deyil.
Ağ Evin mətbuat katibi bu məsələni təkzib etsə də, "Politico" da müəyyən məsələlərlə bağlı məlumatlar yayır. "Politico" adlarının çəkilməsini istəməyən üç ukraynalı deputat və Respublikaçılar Partiyasının xarici siyasət üzrə ekspertinə istinadla xəbər yayıb ki, Trampın yaxın çevrəsindən olan dörd yüksəkvəzifəli şəxs Ukrayna müxalifəti ilə prezident seçkiləri ilə bağlı gizli danışıqlar aparıb. Nəşrin məlumatına görə, Ukraynanın keçmiş baş naziri Yuliya Timoşenko ilə Ukraynanın keçmiş prezidenti Petro Poroşenkonun tərəfdaşları arasında söhbətlər olub. Vurğulanır ki, danışıqların əsas mövzusu Ukraynada atəşkəs razılaşmasından sonra, lakin sülh danışıqları başlamazdan əvvəl prezident seçkilərinin keçirilməsidir. Ukraynanın müxalif "Strana" nəşri, öz növbəsində, iddia edir ki, ABŞ nümayəndələri Kiyevin meri Vitali Kliçko, Baş Kəşfiyyat İdarəsinin (QRU) rəhbəri Kirill Budanov və "Xalqın xidmətçisi" fraksiyasının rəhbəri David Araxamiya da daxil olmaqla, digər ukraynalı siyasətçilərlə də əlaqə saxlayırlar.
Tramp hakimiyyətə gələndən sonra USAİD-lə bağlı araşdırma aparması ilə paralel olaraq bir sıra media orqanlarına maliyyə yardımlarının ayrılmasını da dayandırdı. O cümlədən də, “Reuters” agentliyinin, “The New York Times”, “The Washington Post“, "Politico" nəşrlərinə maliyyə dəstəyinə son qoyuldu.
Trampla bu media orqanları arasında müharibə mövcuddur. Tramp birinci prezidentlik dövründən bu media orqanları ilə döyüş içindədir. Hakimiyyətə gələn kimi də bunların hamısının dövlət orqanlarından aldıqları pulları kəsdi. O cümlədən də “Reuters” agentliyinin. “Reuters” agentliyinin yaydığı bu yanlış məlumat Trampa qarşı qisas cəhdi ola bilərmi? Bəlkə “Reuters”də əvvəlcədən bunun yanlış olduğunu bilirdi, amma bu cür nüanslarla Trampı qəbul etmədiklərini, onun siyasətindən qisas almaq istədiklərini ortaya qoya bilərlərmi? Çünki “Reuters” agentliyi, "Politico" nəşrləri Trampın qəzəbinə düçar olmus ABŞ media orqanlarındandırlar.
“Tramp bu nəşrlərə qarşı intiqam və qisasçılıq hissi ilə mübarizə aparır, onlar da analoji davranış sərgiləyirlər, onun daxili və xarici siyasətilə bağlı feyk məlumatlar yayırlar”
“Novoye vremya” qəzetinin baş redaktoru Şakir Ağayev “Bakı-Xəbər”ə şərhində bildirdi ki, istər “Reuters” agentliyi, istər “Politico” nəşri, istərsə də bir sıra ABŞ və Avropa media qurumları olsun, onların əksəriyyəti feyk məlumatlar yaymaqla, dezinformasiyalarla məşğuldurlar, həqiqətə uyğun olmayan məlumatlar tirajlayırlar. “ Konkret olaraq ABŞ-a məxsus “Reuters” agentliyinə, “Politico”ya və başqa mətbu orqanlara qarşı Tramp ona görə müharibə elan edib ki, bunlar ABŞ prezidentinin apardığı siyasətə əks siyasət həyata keçirirlər. Bu media qurumları bir növ Trampın əks-təbliğatı ilə məşğuldular. Tramp da belə yanaşmaları qəbul etməyən birisi olaraq, istər birinci, istərsə də ikinci prezident seçkilərində bu mətbu orqanlara qarşı ciddi mübarizə aparmağı qarşısına qoyub. Hesab edirəm ki, feyk xəbər, yalan informasiya yayan mətbuat orqanları cəzalandırılmalıdır. Bu bir növ də ABŞ-ın daxili işidir. Trampa qarşı təkcə indi yox, 2020-ci ildə keçirilən seçkilər dövründə də bu KİV-lər kəskin mövqe tutdular. Bu mətbuat qurumlarından mütəmadi olaraq Trampın əleyhinə istifadə olunurdu. Sözsüz ki, Tramp bunları yaddan çıxarmayıb və bugünkü durumu da nəzərə alıb, əlinə keçən səbəbdən bunlara qarşı qisas almaq məqsədilə istifadə edir. Tramp bu nəşrlərə qarşı intiqam və qisasçılıq hissi ilə mübarizə aparır, onlar da anoloji davranış sərgiləyirlər, onun daxili və xarici siyasətilə bağlı feyk məlumatlar yayırlar.
Əslinə qalsa, feyk nyusa, qərəzli yazılara, yalan məlumata qarşı təkcə adamın özü zərbə alanda vuruşmalı deyil, hər zaman mübarizə aparmaq lazımdır.
Trampın maliyyəsini kəsdiyi media qurumları onun siyasətinə qarşı fəaliyyətlərini davam etdirirlər”
Həmin KİV-lərin yalan və qərəzli məlumatlarla başqa dövlətləri də hədəfə aldığını deyən Ş.Ağayevin sözlərinə görə, dəfələrlə Azərbaycana qarşı bu və digər mətbu orqanlarda belə feyk xəbərlər, həqiqətə uyğun olmayan məlumatlar yayımlanıb. Ş.Ağayev bildirdi ki, Azərbaycan bu məsələni dəfələrlə qaldırsa da, çox təəssüf, bununla bağlı heç kim tədbir görmək istəmədi: “Amma artıq zərbəni özləri alanda mübarizə aparmağa başlayırlar, özlərinə zərbə dəyəndə onlarla bağlı feyk xəbərlər yayan KİV-lərə qarşı müharibə elan edirlər. Belə hallara qarşı mübarizə ardıcıl olaraq qlobal səviyyədə aparılmalıdır ki, bu dövlətlərə, liderlərə qarşı qarayaxma kampaniyası aparıla bilməsin. Hesab edirəm ki, mətbuat qurumları məhz Trampın həm daxili, həm də xarici siyasətinə qarşı təhlükə yaratdığına görə ABŞ prezidenti bu addımları atır, onlarla bağlı önləyici tədbirlər görür”.
İradə SARIYEVA
