Ceyhun Məmmədov: “O zaman erməni tərəfi istənilən məsələdə kompromissiz mövqe sərgiləyirdi”
“Bunu məndən Ermənistanın baş naziri deyil, prezidenti xahiş etdi”. Bunu geniş müsahibəsində İranın keçmiş xarici işlər naziri, strataeji məsələlər üzrə vitse-prezident Məhəmməd Cavad Zərif deyib.
O, Ermənistan prezidentinin bir xahişini yerinə yetirməli olduğunu xatırlayıb: “İkinci Qarabağ müharibəsindən sonra İrəvanda olarkən məndən xahiş edildi ki, bir ismarışı Azərbaycan prezidentinə çatdırım. Mesaj da bu idi ki, “26 il əvvəl biz (ermənilər) güclü idik, siz isə zəif. Biz Qarabağı işğal etdik, sizi təhqir etdik, alçaltdıq və sizinlə danışıqlar aparmadıq. İndi vəziyyətimiz məlumdir, siz bizim səhvimizi təkrarlamayın”.
Zərif əlavə edib: “Bunu məndən Ermənistanın baş naziri deyil, prezidenti xahiş etdi. Mən də həmin ismarışı Azərbaycan prezidentinə çatdırdım. Dedi ki: “Güclü olan vaxtı bunu düşünməli, danışıqlar aparmalıydılar”. Əslində, Əliyevin fikri məntiqli idi”.
“Cənab Prezident doğru olaraq qeyd edib ki, bütün bunları Ermənistan güclü olanda düşünməli idi”
Sözügedən məsələni “Bakı-Xəbər”ə şərh edən millət vəkili Ceyhun Məmmədovun fikrincə, bütün bunlar bir daha onu göstərir ki, xəbərdarlıqlara baxmayaraq, Ermənistan Azərbaycana qarşı cinayətləri və eyni təxribatları törətməyə davam etdi: “Bu, ümumilikdə bölgəmizdə gərginliyin davamlı olaraq artmasına və davam etməsinə səbəb oldu. Həm Ulu Öndər Heydər Əliyev, həm cənab Prezident bütün çıxışlarında hər zaman qeyd edirdilər ki, Azərbaycan heç vaxt bu işğalla barışmayacaq. Dəfələrlə biz bu açıqlamaların şahidi olmuşuq ki, Azərbaycan prinsipial olaraq bu məsələdə mövqeyini hər zaman ortaya qoyub. Ermənistan torpaqlarımızı işğal etsə də, bilirdi ki, nə zamansa Azərbaycan ərazilərini geri qaytarmaq üçün müharibəyə başlayacaq. Çünki bu açıqlamalar davamlı və sistemli olaraq verilirdi. Bəli, Birinci Qarabağ müharibəsində ərazilərimizi işğal edən Ermənistan istənilən məsələdə kompromissiz mövqe sərgiləyirdi. Əsir və girovlarımıza olmazın işgəncələr verdilər. Bir qarış torpağımızı belə, sülh yolu ilə geri qaytarmadılar. Həm müharibə dövründə, həm də atəşkəs dövründə özlərini namərdcəsinə aparırdılar. Erməni tərəfi elə hesab edirdi ki, zamanla Azərbaycan işğalla barışacaq. Sonra görəndə ki, Azərbaycan ərazilərini geri almaqda israrlıdır, bu zaman qərb dövlətlərini prosesə cəlb edərək Azərbaycana təzyiq göstərməyə başladılar. Cənab Prezident doğru olaraq qeyd edib ki, bütün bunları Ermənistan güclü olanda düşünməli idi. Anlamalıydılar ki, Azərbaycan heç vaxt işğalla barışmayacaq. Ancaq erməni tərəfi maksimalist mövqe sərgiləyərək bir addım belə geri çəkilmədi. O baxımdan bu açıqlama Prezident Əliyevin əzmkarlığının, prinsipiallığının, qətiyyətinin həm də bir göstəricisidir. Prezident hər zaman bu kimi məsələlərdə prinsipial mövqe sərgiləyib və qətiyətli yanaşmasını ortaya qoyub. Son proses bir daha onu göstərdi ki, Azərbaycanın lideri öz fikrinə sadiqdir. Hər zaman Azərbaycanın maraqlarını müdafiə edir”.
Vidadi ORDAHALLI
