Fransa prezidenti Makronun “Rusiya Avropa üçün təhlükədir” sözləri Moskvada sərt reaksiyalara səbəb olub.
Rusiya prezidenti Vladimir Putin fransalı həmkarı Makronun Rusiya əleyhinə söylədiyi fikirlərə cavab olaraq ona Napoleon Bonapartın 1812-ci ildə Moskvaya qarşı hücumun necə bitdiyini xatırladıb.
"Napoleonun işğalı dövründən qalma Smolensk və muzey haqqında bir söhbət vardı. Bəziləri hələ də o günlərə qayıtmağa can atırlar, bunun necə bitdiyini isə unudurlar", - deyə Putin bildirib.
O, Fransanın keçmişdə Rusiyanı fəth edə bilmədiyini və yenə də uğursuz olacağını vurğulayaraq, bunu rus əsgərlərinin müqaviməti ilə əlaqələndirib.
Rusiyanın xarici işlər naziri Sergey Lavrov isə bildirib ki, Rusiya Fransa prezidenti Makronun nüvə ritorikasını Rusiya üçün təhlükə kimi görür. Makronu tənqid edən Lavrov onu Adolf Hitler və Napoleon Bonapartla müqayisə edib.
"Əlbəttə, bu, Rusiya üçün təhdiddir. Əgər bizi təhdid kimi görürsə, Avropa ölkələrinin və İngiltərənin baş qərargah rəislərini görüşə çağırırsa, nüvə silahından istifadənin zəruri olduğunu deyirsə, Rusiyaya qarşı nüvə silahından istifadə etməyə hazırlaşırsa, bu, təbii ki, təhdiddir" deyə Lavrov bildirib.
Lavrov həmçinin qeyd edib ki, Makron rusiyalı həmkarı Putinlə narahatlığını müzakirə etmək fürsəti olub, lakin bunu etməyib: "Makron vaxtaşırı qürurla bəyan edir ki, o, mütləq Putinə zəng edəcək və onunla görüşəcək. Onun belə imkanları var. Heç kim ona mane olmur. Əksinə, prezident daima vurğulayır ki, o, bütün həmkarları ilə təmaslara açıqdır, Rusiyanın Avropa və Fransaya qarşı müharibə hazırlaşdığına dair axmaq iddialara gəlincə, Putin belə fikirləri fantaziya, cəfəngiyat adlandırır”.
Lavrov onu da vurğulayıb ki, hər bir sağlam düşüncəli insan başa düşməlidir ki, Moskvaya Avropa ilə silahlı münaqişə lazım deyil.
Makronun açıqlamalarını Adolf Hitler və Napoleon Bonapartın açıqlamaları ilə müqayisə edən Lavrov deyib ki, özündən əvvəlki liderlər kimi Rusiya ilə döyüşə girən Napoleon və Hitlerdən fərqli olaraq, Makron özünü çox da diplomatik aparmır: Çünki onlar açıq şəkildə dedilər: "Rusiyanı fəth etməliyik, Rusiyanı məğlub etməliyik". Görünür, o da eyni şeyi istəyir, amma nədənsə, Rusiyanın Fransanı məğlub etməməsi üçün onunla mübarizə aparılması gərəkdiyini, Rusiyanın Fransa və Avropa üçün təhlükə yaratdığını deyir.
Qeyd edək ki, xalqa müraciətində Makron Rusiyanın "Fransa və Avropa üçün təhlükəyə" çevrildiyini deyib və Avropa müttəfiqlərini qorumaq üçün nüvə çəkindirmə mövzusunda "strateji müzakirə"nin başladığını elan edib.
TAHİR
