Əli Mustafa: “Ola bilsin ki, bu məsələdə Tramp hələ gözləmə mövqeyindədir”
Məlum olduğu kimi, ABŞ prezidenti Donald Tramp 1saat 40 dəqiqə Konqresdə çıxış edib. Tramp bildirib ki, onun administrasiyası 43 gün ərzində əksər administrasiyaların əldə etdiyindən daha çox nailiyyət əldə edib: “Və bu, hələ başlanğıcdır”.
İndiyə qədər Tramp 76 icra sərəncamı imzalayıb. Bu sərəncamlardan bir neçəsi məhkəmədə mübahisələndirilir. ABŞ Prezidenti çıxışında ölkə iqtisadiyyatına toxunaraq, Bayden administrasiyası dövründə müşahidə olunan inflyasiyanın son 48 ilin ən bərbad inflyasiyası olduğunu bildirib: “Prezident olaraq, mən hər gün bu zərəri aradan qaldırmaq və Amerikada iqtisadi əlçatanlığı bərpa etmək üçün mübarizə aparacağam”.
Göründüyü kimi, Tramp çıxışı zamanı çoxsaylı məsələlərə toxunub, tək Ukraynaya hərbi yardımı dayandırdığını demədi. Bu barədə bir kəlmə belə işlətmədi. Maraqlıdır, niyə? Unutdu? Zelenskinin məktubunu oxumağı unutmadı, bunu unutdu?
“Düşünür ki, bəlkə Zelenski fikrini dəyişər”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafanın fikrincə, Trampın Rusiya-Ukrayna müharibəsinə münasibəti mənfidir: “Hətta kim birinci onun hədəfinə gələcəkdisə, ona qarşı da mənfi olacaqdı. Bu baxımdan sanki Ukrayna prezidenti ilk hədəfə gələn oldu. Ehtimal ki, məhz buna görə bu baradə heç nə danışmadı. Ancaq başqa bir maraqlı məsələ də var. Məsələ ondadır ki, hərbi yardımların dayandırılması ilə bağlı qərardan sonra ABŞ kəşfiyyat məlumatlarının verilməməsi barədə bir qərar qəbul etdi. Yəni burada sanki əvvəldən düşünülmüş bir qərar təəssüratı yaranır. Düzdür, Zelenskinin məktubunun olduğunu dedi, razılaşmanın olacağını qeyd etdi, amma hərbi yardımlarla bağlı bir söz demədi. Ola bilsin, bu məsələdə Tramp hələ gözləmə mövqeyindədir. Düşünür ki, bəlkə Zelenski fikrini dəyişər. Hiss olunur ki, Trampda bununla bağlı müəyyən gözləntilər var. Trampın əsas məqsədi odur ki, ilkin mərhələdə atəşkəs olsun. Bu səbəbə görə də silahlanma məsələsinə toxunmaya bilər. Onu da istisna etmək olmaz ki, doğrudan da Tramp bu məsələyə isti yanaşmır. Bir formada sanki Ukraynaya yardımı dayandırmaq, hakimiyyəti sıxışdırmaq istəyirdi. Bununla bağlı əlinə fürsət düşdü. Zatən bununla bağlı bir təəssürat var, hətta ABŞ-ın özündə. Konqresmenlərdə, ekspertlərdə belə bir fikir var ki, Tramp Rusiya ilə yaxınlaşır və Ukraynanı özündən uzaqlaşdırır. Burada hətta hansısa məqsədyönlü siyasətin olması barədə ehtimallar var. Hər halda, yaxın günlərdə əsl həqiqətin nə olduğu ortaya çıxacaq. Məlum olacaq ki, Trampın qərarları atəşkəslə bağlıdır, yoxsa Ukrayna hakimiyyətinə olan qərəzli münasibətlə. Fikrimcə, bütün bunlar yaxın günlərdə tam aydınlaşacaq”.
Vidadi ORDAHALLI
