Bəhruz Quliyev: “USAİD-in terror dövləti olan Ermənistanla dərin işbirliyi qurması təsadüfi deyil”
ABŞ Beynəlxalq İnkişaf Agentliyi (USAİD) bağlanmazdan əvvəl Ermənistana vəd edilmiş 250 milyon dolların, demək olar ki, yarısını köçürə bilib. Bu barədə Ermənistan Xarici İşlər Nazirliyi məlumat yayıb.
Məlum olub ki, 2024-cü ildə ölkə USAİD ilə ümumi qrant sazişi paketindən 110 milyon dollar alıb: “Ümumi məbləğin təxminən 60 milyon dolları "iqtisadi təhlükəsizliyin möhkəmləndirilməsi"nə, 18,9 milyon dollar "səmərəli idarəetmə" üçün dövlət aparatına, 13,6 milyon dollar vətəndaş cəmiyyəti və mediaya yönəldiləcək. Eyni zamanda, humanitar yardıma 1 milyon dollar ayrılır”.
Ötən il USAİD-də Ermənistana 250 milyon dollar yardım edilməsi barədə qərar qəbul edilərkən bunun 5 il ərzində həyata keçirilməsi qeyd edilmişdi. Ancaq indi məlum olur ki, Bayden seçkilərdə məğlub olduğu üçün USAİD rəhbəri Samanta Pauer tez-bazar pulun yarısını Ermənistana ötürüb.
“Tramp bu Agentliyin fəaliyyətinə son qoyduğu kimi, xərclənən milyardların taleyinə də biganə qalmayacaq”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, terror şəbəkəsinin başında duran USAİD-in aqibəti bizə hər şeyi deyir: “Əvvəla ondan başlayım ki, bəzi beynəlxalq təşkilatlar müxtəlif adlar, layihələr, humanitar yardım pərdəsi altında dünyada qaranlıq işlər görməklə məşğuldurlar. Bu gün bəziləri adlarını, digərləri isə fəaliyyət istiqamətlərini dəyişsələr də, mahiyyətcə heç dəyişməyiblər. Bu gün dünyada şər yuvası, terror şəbəkəsinin başında duran USAİD adlı Beynəlxalq İnkişaf Agentliyinin aqibəti bizə hər şeyi deyir. Bu təşkilat fəaliyyət istiqamətindən o qədər sapmışdı ki, hətta onu yaradan, dünya ölkələrində ona bütün qapıları açmaq imkanı verən, toxunulmazlıq immuniteti qazandıran ABŞ hökuməti ondan imtina etdi. Tramp hakimiyyət kreslosuna oturar-oturmaz, ilk sərəncamlarından biri USAİD-in ləğvi barədə oldu. Ötən əsrin yetmişinci illərindən əsası qoyulan, on milyardlarla dollar büdcəyə sahib olan Agentlik dövlət içində dövlət idi, dünyanın əksər ölkəsində fəaliyyət göstərən büroları vasitəsilə öz adından kənar bütün işlərlə məşğul olurdu. Dövlət çevrilişləri, rəngli inqilablar, məşhur “ərəb baharı” iğtişaşları, əksər ölkələrdə “cəmiyyət institutları” adı altında agentura şəbəkələrinin formalaşdırılması, QHT və media qurumlarının qanunsuz maliyyələşdirilməsi məhz USAİD-in əl işlərindəndir”.
Politoloq B.Quliyevin fikrincə, USAİD-in terror dövləti olan Ermənistanla dərin işbirliyi qurması təsadüfi deyil: “Bu təşkilatın fəaliyyət izlərini Qarabağın işğalının ilk günlərindən hiss etsək də, münaqişənin silahlı qarşıdurmaya çevrilməsindən əvvəl məhz bu Agentliyin erməni terrorçularına hərtərəfli yardımları sayəsində iki postsovet ölkəsi, qonşu xalqlar bir-biri ilə düşmən oldular. Əlbəttə, USAİD-in tarixi türk-erməni ədavətindən yararlandığını da unutmaq olmaz. Yəni fikir ayrılığının qarşıdurmaya, münaqişənin müharibəyə çevrilməsində adıçəkilən Agentliyin xüsusi xidmətləri olub. 2018-ci ildə “Sorosun uşağı” adlandırılan Paşinyanın hakimiyyətə gəlməsi, Qarabağ ətrafında hadisələrin kəskinləşməsi, Ermənistan rəhbərliyinin açıq şəkildə Qarabağı Ermənistan torpağı kimi təqdim etməsi və sonunda 44 günlük müharibənin başlamasında katalizator rolunu oynayan vasitəçilik institutunun fəaliyyətsizliyindən istifadə edən beynəlxalq təşkilatlar, o cümlədən USAİD oldu. Beynəlxalq İnkişaf Agentliyi fəaliyyətini dayandırsa da, təxribatçı addımlarının səsi hələ də gəlməkdədir. Ermənistan Xarici İşlər Nazirliyinin verdiyi məlumata görə, USAID bağlanmazdan əvvəl Ermənistana vəd edilmiş 250 milyon dolların, demək olar ki, yarısını köçürə bilib. Deməli, 2024-cü ildə USAİD Ermənistana 250 milyon dollar yardım edilməsi barədə qərar qəbul edib. Və xüsusi olaraq qeyd edilib ki, bu vəsait 5 il ərzində hissə-hissə Ermənistana veriləcək. USAİD Baydenin seçkilərdə məğlub olacağını, Trampın isə USAİD-i “qara siyahı”ya saldığını anlayınca tələm-tələsik Ermənistana ümumi qrant sazişi paketindən 110 milyon dollar ayırıb. USAİD-in rəhbəri Samanta Pauerin bu addımı hər kəsdə çaşqınlıq yaradıb. Görəsən Agentliyin taleyi tükdən asılı olduğu bir vaxtda bu qədər vəsait Ermənistana niyə ötürülsün? Əlbəttə, bütün bu müəmmaları USAİD-in fəaliyyətində, qaranlıq işlərində axtarmaq lazımdır. İnanıram ki, Tramp bu Agentliyin fəaliyyətinə son qoyduğu kimi, xərclənən milyardların taleyinə də biganə qalmayacaq. Ermənistana ötürülən milyonlar xərclənmədən geri qaytarıla bilər”.
Vidadi ORDAHALLI
