Akif Nağı: “Vardanyanın “VoMa” terror təşkilatı və 27 komitəsi ilə əlaqələri və bu cür məsələlər onun həm də terrorçu kimi mühakimə olunması üçün imkanlar açıb”
RubenVardanyanla bağlı Ermənistan tərəf və onların Avropadakı tərəfdaşları, ermənipərəst qüvvələr şoular yaratsa da, onun “süddən çıxmış ağ qaşıq olduğunu” “sübut etməyə” çalışsalar da, amma məhkəmədə üzə çıxan faktlar onun cinayət əməllərini ortaya qoyur.
Vardanyan qanunsuz olaraq Azərbaycan ərazisinə gəldiyi günlərdə bildirilirdi ki, o, terroru maliyyələşdirən əsas donorlardan biridir. Hələ o vaxt onun “VoMa” terror təşkilatı ilə yaxın əməkdaşlığının olduğu deyilirdi. Bu məsələ indi məhkəmədə təsdiqlənir. Belə ki, Ermənistan vətəndaşı olan, Azərbaycan Respublikasının Cinayət Məcəlləsinin sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə ilə bağlı maddələri ilə və digər ağır cinayətlərdə təqsirləndirilən Ruben Vardanyanın barəsində cinayət işi üzrə məhkəmə prosesinin martın 4-də davam etdirilən baxış iclasında ona “VoMa” terror təşkilatının qurucusu Vartanov Vladimir (Vova) Levanoviçlə münasibəti, aralarında vatsap vasitəsilə aparılan yazışmalar və göndərilən səsli mesajlar, təşkilat tərəfindən Ermənistanın nəzarətində olan Qarabağdakı qanunsuz silahlı birləşmələrə təlimlərin keçilməsinin təşkili və maliyyələşdirilməsi, Vladimir Vartanovun Birinci Qarabağ müharibəsində, 2016-cı ilin Aprel döyüşlərində və İkinci Qarabağ müharibəsində Azərbaycan Respublikası ərazisində Silahlı Qüvvələrimizə qarşı hərbi əməliyyatlarda iştirak etməsi, təşkilatın təlimçiləri barədə suallar verilib.
Məhkəmədə R.Vardanyandan həmin təlimlərin keçirilməsinə Ermənistan tərəfindən razılığın verilib-verilməməsi, buna dair şəraitin kim tərəfindən yaradılması, təlimlərə yetkinlik yaşına çatmayan şəxslərin cəlb olunub-olunmaması, o cümlədən R.Vardanyanın bu təlimləri sahibkar və ya qondarma rejimin vəzifəli şəxsi kimi təşkil etməsi və maliyyələşdirməsi də soruşulub.
Daha sonra R.Vardanyana təhlükəsizlik məsələləri üzrə ekspert adı altında fəaliyyət göstərən “27 Komitəsi" hərəkatının təsisçisi və sədri Poqosyan Vladimir Sergeyeviçlə münasibətləri, onunla “Signal” mobil tətbiqi, eləcə də digər mobil tətbiqlər və sosial şəbəkələr vasitəsilə apardığı danışıqlar və yazışmalar, aralarında işbirliyinin olub-olmaması, “düşmən” adlandırdıqları Azərbaycan dövlətini böyük itkilərə məruz qoymaq, hətta zərbə vurmaq məqsədilə “xüsusi əməliyyatlar qüvvələrinin milli mərkəzi”nin yaradılmasının Ermənistan dövlətinin planı olub-olmaması, “böyük itkilər”in nədən ibarət olması, həmin mərkəzin digər üzvləri və maliyyələşmə qaydalarına dair suallar verilib.
Bundan başqa, sözügedən “mərkəz”in qondarma quruma, yoxsa qondarma qurumun “müdafiə nazirliyi”nin faktiki olaraq Ermənistan dövlətinə tabe olduğu kimi, eyni qaydada Ermənistana tabe olub-olmadığına dair suallar soruşulub.
Təqsirləndirilən şəxs Ruben Vardanyan ona verilmiş sualların heç birini cavablandırmayıb.
Qeyd edək ki, Bakı Hərbi Məhkəməsində hakimlər Zeynal Ağayevin sədrliyi ilə, Anar Rzayevdən və Camal Ramazanovdan ibarət tərkibdə keçirilən açıq məhkəmə iclasında təqsirləndirilən şəxs bildiyi dildə, yəni rus dilində tərcüməçi, habelə müdafiəsi üçün özünün seçdiyi vəkillə təmin olunub.
Vardanyanın “VoMa” terror təşkilatı və “27 komitəsi” ilə əlaqələri onun həm də terrorçu kimi, eləcə də Ermənistan hökuməti tərəfindən idarə olunan terrorçu kimi mühakimə olunması yönündə nə kimi perspektivlər açır?
“Yaxşı olardı ki, o susmasın, suallara cavab versin və hər şeyi etiraf etsin”
Azad Vətən Partiyasının sədri Akif Nağı “Bakı-Xəbər”ə şərhində bildirdi ki, müxtəlif cinayətlərdə təqsirləndirilən erməni əsilli şəxslərin Bakıda keçirilən məhkəməsində bir sıra məsələlərə aydınlıq gətirilir və indən sonra da gətiriləcək. “Çünki təqsirləndirilən şəxslərin ifadələrindən də görünür ki, özləri bir-birinə qarşı dayanırlar, istər-istəməz bu və digər faktları açmalı olurlar. Aydındır ki, Vardanyan regiona elə-belə gəlməmişdi. Çoxşaxəli antiazərbaycan fəaliyyəti, o cümlədən də terroru dəstəkləmək, maliyyələşdirmək, terrorda iştirak etməklə bağlı faktlar ortadadır. Bu barədə ona suallar verilir, ancaq bu suallara cavab vermir. Bu suallar ona verilirsə, demək buna əsas var, bu səbəbdən də ona suallar ünvanlanır. Böyük ehtimalla, məhkəmə materiallarında Vardanyanın “VoMa” ilə əlaqələri, bu kimi terror təşkilatlarını dəstəkləməsi, maliyyələşdirməsi ilə bağlı faktlar yer alıb. İstər “VoMa” terror təşkilatı, istərsə də “27 komitəsi” olsun, o qurumlarda iştirakı ilə əlaqədar yəqin ki, istintaqda artıq müəyyən materaillar mövcuddur, bunları təsdiqləmək üçün Vardanyana suallar verilir. O özü də başa düşür ki, artıq onun bu faktları gizlətmək imkanı yoxdur. Yəqin onun o terror təşkilatları ilə əlaqələri müxtəlif mənbələrdə öz təsdini tapır. Böyük ehtimalla, vəkilinin tapşırığı ilə suallara cavab verməkdən imtina edir. Çünki suallara cavab verdikcə özünü daha çox dolaşdıra, yaxud sərt suallar qarşısında qala bilər. Məsələnin mahiyyəti bundan ibarətdir”.
A.Nağı qeyd etdi ki, Vardanyanın “VoMa” terror təşkilatı və “27 komitəsi” ilə əlaqələri onun həm də terrorçu kimi, eləcə də Ermənistan hökuməti tərəfindən idarə olunan terrorçu kimi mühakimə olunması yönündə perspektivlər açır: “Vardanyanın “VoMa” terror təşkilatı və “27 komitəsi” ilə əlaqələri və sair məsələlər onun həm də terrorçu kimi mühakimə olunması üçün imkanlar açıb. O, bu əməlinə görə mühakimə olunmalı və dünya onun terror təşkilatları ilə əlaqələri barədə faktlarla tanış olmalıdır. Bu elə-belə məsələ deyil, olduqca ciddi ittihamdır və Vardanyan buna görə də ayrıca cavab verməli olacaq. Yaxşı olardı ki, o susmasın, suallara cavab versin və hər şeyi etiraf etsin. Onsuz da məhkəmə onun terror cinayətinin izinə düşüb”.
A.Nağının fikrincə, bundan sonra məhkəmənin yeni istiqamətləri yarana bilər. O qeyd etdi ki, ola bilsin, məhkəmənin bir istiqaməti də ittiham olunan şəxslərin hansı terror aktlarında iştirak etmələri, hansı terror təşkilatları ilə sıx əlaqədə olmaları məsələlərinin araşdırılması olsun. Vardanyanın bu əməlləri ilə bağlı məlumatların olduğunu deyən A.Nağının sözlərinə görə, məhkəmənin bu mərhələsi bitəndən sonra bir çox digər mərhələlərdə, istiqamətində də ayrıca məhkəmə prosesləri davam etdirilə bilər, məhkəmə praktikasında belə yanaşma var. “Məhkəmənin gedişində digər məsələlər ortaya çıxır və ona görə də onların ətrafında yeni təhqiqata ehtiyac olur, iş əlavə istintaqa göndərilir. Ona görə də, böyük ehtimalla, mümükündür ki, proseslər o şəkildə getsin, Vardanyan və digərləri üzərində terror qrupları ilə bağlı məsələlər də ortaya gəlsin. Bu, beynəlxalq ictimaiyyətin məlumatlandırılması, beynəlxalq ictimaiyyətə müəyyən məsələlərin çatdırılması baxımından əhəmiyyətlidir. Təbii ki, Azərbaycan o mərhələyə keçəcəksə dünyada terrora qarşı mübarizə aparan mərkəzlər var, İnterpol var, hüquq-mühafizə orqanları var, onlarla birgə işlər aparılması mümkündür. Onlar da bu prosesə cəlb olunsunlar. Dünya bu gün terror təşkilatlarına, terror yuvalarına qarşı mübarizə aparır, onların ifşa olunmasında, onlara qarşı addımların arılmasında maraqlıdır.
Azərbaycanın əlində kifayət qədər faktlar var. Bu adamlar Azərbaycana qarşı daha çox hərbi cinayətlər törətməkdə ittiham olunurlar, onlarla bağlı kifayət qədər faktlar var. Ermənistanın keçmiş və indiki rəhbərliyi terroru bu dövlətin dövlət siyasətinə çeviriblər. İndi də o mövqedə qalırlar. Ermənistanın baş naziri Paşinyan və digərləri həmin proseslərin içində olublar. Onlar da terror qruplarının təşkil olunması, terror təşkilatlarının yönəldilməsi, silah-sursatla təmin edilməsi məsələsinə görə məsuliyyət daşıyırlar. Məhkəmə zalında itiham olunan şəxslərin özləri, digərləri etiraf edəcəklər ki, Paşinyan başda olmaqla hökumət üzvləri terrorda iştirak ediblər. Növbəti mərhələdə proses davam edəcəksə, bunların bir hədəfi də Paşinyan və onun komandası olacaq. Ermənistanın ovaxtkı müdafiə naziri, baş qərargah rəisi, digər rəhbər şəxslər cavab verməli olacaq. Müxtəlif istiqamətlərdə bu məhkəmə prosesinin davamı gözlənilir, getdikcə də dünyanı, beynəlxalq aləmi dəhşətə gətirən faktlar ortaya çıxacaq. O istiqamətdə Azərbaycan işlərini davam etdirməlidir ki, dünya bunların hansı cinayətlərlə, Azərbaycana qarşı terror qruplarının təşkili və terror törədilməsi ilə məşğul olduğunu görsün. Bu ən vacib istiqamətlərdir” - deyə A.Nağı bildirdi.
İradə SARIYEVA
