Şəmsəddin Əliyev: “Bəzi beynəlxalq təşkilatlar bu canilərə utanmadan havadarlıq da edirlər”
BMT-nin İnsan Hüquqları üzrə Ali Komissarı Volker Türk Cenevrədə İnsan Haqları Şurasının 58-ci sessiyasında təqdim etdiyi hesabatda Azərbaycanda məhkəməsi keçirilən ermənilərdən danışıb. Ali komissar törətdikləri ağır cinayətlərə görə Azərbaycan Dövləti tərəfindən mühakimə olunan ermənilərə azadlıq tələb edib.
“Onlar dərhal azad edilməli və ədalətli mühakimə hüquqlarına tam hörmət edilməlidir”, - deyən komissarın səsini torpaqlarımız işğal altında olduğu illərdə eşitmirdik. Ermənilərin törətdiyi vəhşiliklər, təbiətimizin məhv edilməsi və dini-mədəni irsimizin dağıdılması kimi cinayətlər nədənsə Volker Türkün diqqətini çəkmirdi. Heç ərazilərimizin minalanması və onların partlaması nəticəsində onlarla azərbaycanlının həlak olması kimi hadisələr də həmin bu komissar üçün heç vaxt maraqlı olmayıb. Volker haradan və nədən o qənaətə gəldi ki, ermənilərin ədalətli mühakimə hüquqları pozulur?
“Bu gün Volkerin timsalında separatçılar üçün yaxasını cıranlar o zaman ermənilərin törətdiyi cinayətlərə etiraz etmədilər...”
Sözügedən məsələni “Bakı-Xəbər”ə şərh edən hüquqşünas Şəmsəddin Əliyevin fikrincə, Azərbaycan xalqına qarşı cinayət törədən separatçılar törətdikləri əməllərə görə üzr istəmək əvəzinə, müstəsna həyasızlıq göstərirlər: “Bütün bunlar azmış kimi, bəzi beynəlxalq təşkilatlar bu canilərə utanmadan havadarlıq da edirlər. Volker Türkün diqqətinə çatdırmaq istəyirəm ki, 1948-ci il dekabrın 10-da BMT-nin insan hüquqları haqqında ümumi bəyannaməsində hansı dəyərlərə üstünlük verilməsi öz əksini tapıb. Ondan sonra 1966-cı ilin dekabrında BMT-nin Mülki və Siyasi Hüquqlar haqqında Paktı qəbul edilib. Yaxşı olardı ki, onlara da diqqət yetirsin. Ən nəhayət, Volker Türk 1993-cü ildə BMT Təhlükəsizlik Şurasının Azərbaycanın ərazi bütövlüyü ilə bağlı qəbul etdiyi 4 qətnamənin icra edilməməsinə diqqət etsin. Heç olmasa bütün bunlara bir ekskursiya etsin. O zaman hər şey bəlli olacaq. Ermənistan işğal dövründə bütün beynəlxalq hüquq normalarına tüpürdü. Ancaq bu gün Volkerin timsalında separatçılar üçün yaxasını cıranlar o zaman bir dəfə buna etiraz etmədilər. Azərbaycan nə qəbahət işlədib? Azərbaycan beynəlxalq hüquqa dayanaraq öz ərazi bütövlüyünü və suverenliyini təmin edib. Azərbaycan beynəlxalq hüquqa dayanaraq cinayət törədən separatçıları mühakimə edir. Qarabağ və ətraf 7 rayon işğal edildikdən sonra orada bir nəfər azərbaycanlı qalmadı. Yüz minlərlə məcburi köçkün olmazın çətinliklərlə üzləşdi, ağır şəraitdə yaşadılar. Bəs o zaman BMT-nin İnsan Hüquqları üzrə Ali Komissarı bütün bunları niyə görməzdən gəlirdi? Axı hamılıqla tanınan beynəlxalq hüquq normaları var. Hamıya bəlli olan faktların sübuta ehtiyacı yoxdur. O cümlədən, Qarabağda ermənilərin törətdiyi soyqırım faktlarla sübut edilib. Bununla bağlı zərərçəkənlərin ifadələri var, videogörüntülər beynəlxalq aləmə təqdim edilib. Əlləri Azərbaycan xalqının qanına batmış bu müqəssirlər verilən sualları cavablandırmaqdan imtina edirlər. Vəsatət qaldırırlar ki, cinayət işi materialları ilə tanış olaq. Onların vəsatəti təmin edilir, amma onlar özlərini bu cinayətlərdə nə qismən, nə də tamamilə təqsirli bilmirlər. Ona görə də, kimin nə deməsindən asılı olmayaraq, biz öz işimizi görməliyik. Əli Azərbaycan xalqının qanına batmış cinayətkarlar cəzasını almalıdır”.
Vidadi ORDAHALLI
