Sədrəddin Soltan: "Nikol Paşinyan İran hakimiyyətinin media vasitəsilə Azərbaycana qarşı ənənəvi təbliğatının alətinə çevrilib"
Paşinyan İran televiziyasına müsahibədə praktik şəkildə təzə heç nə demir. İndiyə kimi dediklərini təkrar edir - Naxçıvana yol, Zəngəzur dəhlizi, İranla əbədi dost olacağıq və sair.
Paşinyan deyib ki, İran və Ermənistan arasında qarşılıqlı səmimiyyət var və ermənilər İranda, iranlılar isə Ermənistanda özlərini sərbəst hiss edirlər. Qarşılıqlı etimadın nəticəsində yaranan münasibətlərin bundan sonra da davam edəcəyi vurğulanıb. Jurnalistin bölgədəki durumla bağlı sualını cavablandıran Ermənistanın baş naziri bu işdə də İrandan razı olduğunu vurğulayıb. O deyib ki, bu yöndə siyasət yenə davam edərək yeni reallıqda daim bir-birinə dəstəkçi olmağa xidmət edən əsas prinsipə çevriləcək. Emənistanda olan Avropa İtifaqı "sülhməramlı missiyasının" İran üçün heç bir mənfi təsiri olmadığını xatırladan baş nazir əmindir ki, İrandan daim hörmət və dəstək görəcəkdir. Hansı ki, bu məsələdə də yeni heç nə yoxdur.
Onun bu arada məhz İran televiziyasına müsahibəsi nə deməkdir və bu müsahibəni verməkdə hədəfi nədir?
Baki-xeber.com saytına açıqlamasında Orta Doğu Araşdırmalar Mərkəzinin rəhbəri, siyasi sərhçi Sədrəddin Soltan bildirdi ki, Ermənistanın baş naziri Nikol Paşinyanın İran televiziyasına verdiyi müsahibənin səbəbləri ikitərəflidir: "Hər iki tərəfin - İranın və Ermənistanın bu müsahibədə səsləndirilən fikirlərdə məqsədi Azərbaycana təzyiq etmək, ona qarşı təbliğat aparmaqdır. Tehran hakimiyyəti KİV-də, eləcə də sosial şəbəkələrdə, o cümlədən Teleqram kanallarında davamlı olaraq Azərbaycana qarşı təbliğat aparır. Bu müsahibə ilə isə həmin təbliğat Ermənistanın baş naziri səviyyəsində aparılır. Torpaqlarımız işğal altında olanda da, ərazilərimiz düşmən tapdağından təmizlənəndən sonra da Ermənistanın müxtəlif siyasi şərhçiləri İran televiziya kanallarına çıxarılır və onlar da Azərbaycanın ərazi bütövlüyünə qarşı təhdidlərlə və müharibə ilə bağlı müxtəlif şaiyələr yayırdılar, əsası olmayan fikirlər səsləndirirdilər.
Nikol Paşinyan da İran hakimiyyətinin media vasitəsilə Azərbaycana qarşı ənənəvi təbliğatının alətinə çevrilib. Bir növ bu müsahibə həmin təbliğatın davamıdır. Yəni bu dəfə Tehran hakimiyyətinin qurduğu təbliğat tamaşasında baş rolu Nikol Paşinyan oynadı.
Nikol Paşinyanın öz hədəfi isə İran televiziyasından qonşu dövlətin televizyası kimi istifadə edərək, oradakı İran vətəndaşı olan ermənilərə rəhbərlik etdiyi dövlətin mövqeyini çatdırmaqdır. Eyni zamanda Paşinyan bu imkandan istifadə edərək öz dövlətinin xeyrinə təbliğat aparır. O, müsahibəsində belə təqdim edir ki, guya Ermənistan sülhsevər dövlətdir, Ermənistan bütün şərtlərə əməl edir, kommunikasiyaların açılmasına belə razılıq verir, Azərbaycan tərəfi isə müharibə etmək istəyir, təcavüzkardır, erməni torpaqlarına iddialıdır və s. Bu müsahibənin əsas məqsədi budur - hər iki tərəfin işınə yarayan - Azərbaycana qarşı təbliğat aparmaq".
Dəniz NƏSİRLİ
