Azər Həsrət: "Qərb dövlətləri arasındakı münasibətlərin kəskinləşməsi fonunda TDT Orta Asiyada yerləşən türk dövlətlərinə inteqrasiyanın sürətləndirilməsi zərurətini reallaşdıra bilər"
Prezident İlham Əliyev martın 5-də Türkiyə Prezidenti Rəcəb Tayyib Ərdoğanın dəvəti ilə Ankaraya işgüzar səfər edib. Ankaranın Esenboğa Hava Limanında Azərbaycan Prezidentinin şərəfi şərəfinə fəxri qarovul dəstəsi düzülüb.
Dövlət başçısını Türkiyənin maliyyə naziri Mehmet Şimşek və digər rəsmi şəxslər qarşılayıb.
Prezdent Türkiyəyə səfəri çərçivəsində İğdırdan Naxçıvana yeni çəkilən qaz kəmərinin açılış mərasimində iştirak edib. Prezident İlham Əliyev mərasimdə çıxışı zamanı deyib ki, bu gün Türkiyə-Azərbaycan dostluq, qardaşlıq tarixində önəmli bir gündür: "Bu gün Azərbaycandan Türkiyə ərazisinə gedən qaz bir çox ölkələrin enerji təhlükəsizliyini təmin edir. Bu gün açılışında iştirak etdiyimiz layihə Naxçıvanın enerji təhlükəsizliyini təmin edəcək. Çünki Azərbaycandan gələn qaz Türkiyə ərazisindən Naxçıvana ötürülərək artıq Naxçıvanı da bu problemdən xilas etmiş olacaq".
Azərbaycan prezidentinin Türkiyəyə səfərinə məhz indiki beynəlxalq münasibətlər şəraitində nə kimi zərurət var idi?
Baki-xeber.com saytının sualına cavabında siyasi şərhçi Azər Həsrət bildirdi ki, Azərbaycan prezidenti İlham Əliyevin qardaş Türkiyəyə səfərinin məhz bu gündə - qlobal müstəvidəki gərginliklər fonunda həyata keçirilməsi yerinə düşür: "Bu baxımdan ki, Azərbaycanla Türkiyə birlikdə olduqlarını hər an, hər yerdə göstərməlidirlər və indiki məqamda belə bir göstərişə ehtiyac yaranmışdı. Çünki ABŞ-nin Ukrayna və Rusiya ilə münasibətləri, dəyişən qlobal trendlər fonunda Azərbaycanın özünü toparlanasına ciddi ehtiyac var və bu istiqamətdə qardaş Türkiyə prezidenti Rəcəb Tayyib Ərdoğanla müəyyən məsələlər müzakirə edilməli idi. Ümumiyyətlə, indiki dövrdə Azərbaycan və Türkiyə ikitərəfli deyil, Türk Dövlətlər Təşkilatı çərçivəsində, obrazlı desək, bir əzələ nümayiş etdirməlidir. Ona görə ki, dünyada trendlər və yanaşmalar dəyişir. Təbiidir ki, yeni güclərin meydana çıxması zərurəti yaranır. Belə güclərdən biri, hətta bir çox hallarda birincisi bizim bölgəmiz üçün Türk Dövlətləri Təşkilatıdır (TDT). Bəlkə də Azərbaycan prezidenti Türkiyə cumhurbaşqanı ilə TDT ilə bağlı ictimaiyyətə açıqlanmayan müzakirələr aparacaq. Mümkündür ki, bu il Azərbaycanda keçirilməsi nəzərdə tutulan TDT zirvə görüşünun tarixi bir qədər önə çəkilsin, daha erkən keçirilsin. Çünki buna çox ciddi zərurət yaranıb. Ümumiyyətlə, indiki şəraitdə TDT qlobal oyunçu olduğunu göstərməlidir. Məsələn, TDT Ukrayna ilə Rusiya arasında vasitəçılık təşəbbüsü irəli sürə bilər. Bununla yanaşı, Qərb dövlətləri arasındakı münasibətlərin kəskinləşməsi fonunda TDT Orta Asiyada yerləşən türk dövlətlərinə inteqrasiyanın sürətləndirilməsi zərurətini reallaşdıra bilər. Yəni bu çox vacib məsələdir. Yoxsa biz belə "tısbağa yerişi" ilə TDT-ni irəlilətmək istəsək zamanı qabaqlaya bilməyəcəyik, çətinliklər ortaya çıxa bilər. Bir də gözümüzü açacağıq ki, başqaları bizi vurub keçiblər. Ona görə də daha sürətli və daha operativ hərəkət etməliyik. Bu baxımdan düşünürəm ki, Prezident İlham Əliyevin qardaş ölkəyə səfəri vacib şərt idi.
Prezidentin səfəri zamanı İğdır-Naxçıvan qaz kəmərinin açlışı mərasimi də artıq baş tutdu. Bu, Naxçıvan üçün tarixi bir açılış oldu.
Bununla yanaşı, bildiyimiz kimi, Türkiyə ilə Azərbaycan Süriyada gedən proseslərdə bərabər iştirak edir. Bu istiqamətdə də hadisələr çox sürətlə inkişaf edir. Bununla bağlı da ciddi müzakirəyə, aydınlaşmaya ehtiyac var. Düşünürəm ki, müzakirə mövzularından biri də bu ola bilər.
İndiki mərhələdə ABŞ-ın regiona yönəlik siyasəti də hələ tam bəlli deyil. Tramp hələ ki, əsasən Rusiya-Ukrayna müharibəsinə köklənib. Amma yəqin ki, Tramp adminstrasiyası öz Cənubi Qafqaz siyasətini də formalaşdırır. Türkiyə isə Amerikanın regionda ən yaxın tərəfdaşıdır. Ola bilsin ki, ABŞ-nin Cənubi Qafqaza yönəlik siyasətinin formalaşmasına Türkiyənin təsir imkanları da müzəkirə mövzularından biridir.
Mən calışdım ki, daha çox cəmiyyətə açıqlanması gözlənilməyən məsələlərə diqqət yetirim".
Dəniz NƏSİRLİ
