Elyar İslamoğlu: “Bəzi nazirlərin çox sayda müşavirinin olması çox ziyanlı bir tendensiyadır”
Son illər nazirliklərin işində müşahidə etdiyimiz hallardan biri müşavir ştatlarının yaradılması və nazirlərin özlərinə bir deyil, bir neçə müşavir götürməsi məsələsidir.
Bu, çoxlarımızın tez-tez rast gəldiyimiz hallardan biridir. Adətən rəsmi və qeyri-rəsmi tədbirlərdə, ictimai yığıncaqlarda görürük ki, orda nazir müavinlərindən çox müşavirlər iştirak edir.
Belə bir tendensiya yaranıb ki, kimsə işdən çıxarılırsa onu müəyyən nazirliklərə müşavir vəzifəsinə göndərirlər. Nəticədə də nazirliklərdə müşavir vəzifəsi ştatı get-gedə artır, “şişir”.
Günün birində eşidirsən ki, filankəs filan nazirin müşaviri vəzifəsinə təyin edilib. Elə bil nazirlərin müşavir vəzifələri “çölə atılmış” bir vəzifəyə çevrilib. Nazirlərə bu qədər müşavir nəyə lazımdır? Bir halda ki, nazirlərin əlinin altında çoxlu sayda şöbələr, idarələr, mərkəzlər, rayon təşkilatları, regional idarələr, özünün aparatı var, onda onlara müşavir niyə lazımdır ki? Müşavir vəzifəsini niyə belə artırıblar?
“Müşavir ştatlarının “şişirdilməsi” nəticəsində dövlət büdcəsindən izafi pullar xərclənir”
Fəlsəfə doktoru, ictimai fəal Elyar İslamoğlu “Bakı-Xəbər”ə bildirdi ki, həqiqətən də bu məsələ normal qəbul olunmur. “Biz tez-tez mətbuatda vəzifədən çıxarılan bir qisim məmurların hansısa nazirlərin müşaviri vəzifəsinə təyin edildiyini oxuyuruq. Artıq elə nazirlər var ki, bir neçə müşaviri var. Sanki qəsdən müşavir ştatları açırlar ki, işdən çıxarılan məmurları ora təyin etsinlər. Həmin məmurlar keçmişdə yüksək vəzifələrdə çalışırdılar və vəzifədə olduqları müddətdə adları ya korrupsiyada hallanıb, ya da xalqa doğru-dürüst xidmət etməyiblər, barələrində çoxlu şikayətlər olub və vəzifələrini itiriblər. Deyək ki, xalq həmin məmurun cəzalandırılacağını gözlədiyi halda onu hansısa bir nazir özünə müşavir götürür. Düşünürəm ki, bu müşavirlər həmin nazirlərin sərəncamlarındakı çoxlu maliyyə mənbələrini əllərində saxlaması üçündür. Onsuz da müşavir vəzifəsinə təyin edilən məmurların nə dövlət, nə də xalq üçün hər hansı bir faydalı addım atdığının şahidi olmuruq”.
E.İslamoğlu hesab edir ki, bu ziyanlı tendensiyadır, eyni zamanda büdcədən əlavə vəsaitin xərclənməsinə yol açan amildir. “Bəzi nazirlərin çox sayda müşavirinin olması çox ziyanlı bir tendensiyadır. Müşavir ştatlarının “şişirdilməsi” nəticəsində dövlət büdcəsindən izafi pullar xərclənir. Bir vəzifənin ki, dövlətə, xalqa xeyri yoxdur, o ştatın saxlanılmasına ehtiyac duyulmur. Elə adamlar var ki, indiyə qədər işi o nazirin, bu nazirin yanında müşavirlik etməkdir. Heç bir faydası da yoxdur. Mənə elə gəlir ki, bu məsələyə yenidən baxılmalıdır”-deyə E.İslamoğlu bildirdi.
İradə SARIYEVA
