Hüseyn İbrahimov: “Paşinyan yaxşı bilir ki, Tramp administrasiyası Bayden qədər onu himayə etməyəcək”
Erməni mediasında yayılmış məlumatlara görə, Ermənistanın müxtəlif dövlət orqanlarına Rusiya ilə yeni yumşaq münasibətlər qurmaq üçün sakit addımlar atmaq barədə göstəriş verilib. Baxmayaraq ki, dövlət rəhbərliyi bunu inkar edir. Ancaq hər halda bu, ciddi məlumata oxşayır.
Ən azı, Donald Tramp prezident olandan sonra ABŞ-ın Rusiyaya münasibətinin dəyişməsi bunu deməyə əsas verir. Çünki məhz bütün bunlardan sonra Ermənistanın siyasi kursunda bəzi məqamlar diqqəti cəlb edir.
Bu arada, Ermənistan parlamenti Avropa İttifaqına daxil olmaq prosesinin başlanması haqqında qanun layihəsinin ikinci oxunuşda qəbulunu 2 ay müddətinə uzadıb. Layihənin ümumiyyətlə təxirə salındığı haqda da məlumatlar var. Parlamentin Avropaya inteqrasiya komitəsi hökumətin təkliflərini qapalı formatda müzakirə etmək qərarı verib, sonra layihənin qəbul edilməsi təxirə salınıb.
“Ona görə də yavaş-yavaş Rusiyaya doğru yumşaq manevrlər edirlər”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, prinsipcə, Ermənistanın Rusiyaya doğru dönüş edəcəyi ehtimalı var: “Çünki bir sıra faktorlar bunu şərtləndirir. Məsələ ondadır ki, ötən il ABŞ-da prezident seçkiləri və ondan sonra yaranan yeni reallıqlar Ermənistana təsirsiz ötüşməyib. Xüsusən də Demokratlar Partiyası namizədi Kamala Harrisin seçkilərdə məğlub olması Ermənistan rəhbərliyini məyus edib. Çünki seçki kampaniyası dönəmində erməni lobbisi Demokratların namizədinə səs verdi. Bütün bunları Tramp yaxşı bildiyindən, bunu onlara bağışlamayacaq. Çünki ermənilər 2020-ci ildə keçirilən seçkilərdə də Baydenə səs veriblər. Elə bunun nəticəsi idi ki, Ermənistan baş naziri Nikol Paşinyan bu günlərdə ABŞ-da dinlə bağlı keçirilən tədbirdə iştirak etsə də, prezident Donald Trampla görüşə bilmədi. Daha doğrusu, Tramp Paşinyanla görüşmədi. Nikolun vitse-prezident Cey Di Venslə görüşü olsa da, bu, nəyisə dəyişmədi. Paşinyan yaxşı bilir ki, Tramp administrasiyası Bayden qədər onu himayə etməyəcək. Bütün mənalarda Birləşmiş Ştatların timsalında Ermənistana əvvəlki diqqət olmayacaq. Üstəlik, Ukrayna məsələsi ilə bağlı Trampın sərgilədiyi mövqe, bütün dünya mediası qarşısında Zelenskini aşağılaması Paşinyan hakimiyyətinin gözünü qorxudub. Ona görə də yavaş-yavaş Rusiyaya doğru yumşaq manevrlər edirlər. Parlament spikeri Alen Simonyan Rusiyanın ünvanına sərt fikirlər səsləndirmir. Ermənilərin tarixən tez-tez mövqe dəyişdiklərini nəzərə alsaq, onlar üçün bu adi bir şeydir. Ancaq düşünmürəm ki, bu, ümumilikdə Paşinyanı xilas edəcək. Uyğun məqamda Rusiya Ermənistanda Paşinyan hakimiyyətini devirəcək”.
Vidadi ORDAHALLI
