Məhəmməd Əsədullazadə: “Aİ-nin məqsədi Ermənistanı silahlandırmaq və onu yeni münaqişəyə sövq etməkdir”
Avropa İttifaqı (Aİ) Ermənistanı dəstəkləməkdə davam edir. Belə ki, Aİ müttəfiqlərin müdafiəsini dəstəkləmək üçün nəzərdə tutulan Avropa Sülh Fondundan Ermənistana əlavə 10 milyon avro “qeyri-hücum” yardımı ayırmağı düşünür.
Brüssel mənbələrindən “Azadlıq radiosuna ” bildiriblər ki, Aİ-nin Xarici İşlər və Təhlükəsizlik Siyasəti üzrə Ali Nümayəndəsi Kaja Kallas bu təklifi yaxın həftələrdə müzakirə olunmaq üçün Aİ Şurasına təqdim edib. Lakin müzakirənin dəqiq tarixi hələ müəyyən edilməyib. Təklif Aİ-yə üzv olan 27 ölkənin hamısı təsdiqlədiyi təqdirdə qüvvəyə minəcək.
Qeyd olunur ki, bu məsələdə fikir ayrılığı var və ötən il Macarıstan bu yardımın verilməsinə imkan verməyib.
Qeyd olunur iki, ötən il Ermənistan ilk dəfə olaraq Aİ Sülh Fondundan 10 milyon avro alıb. Diplomatik sənədlərə görə, bu yardımın məqsədi “Ermənistan silahlı qüvvələrinin dayanıqlığını və sabitləşdirmə imkanlarını artırmaq, böhran və fövqəladə hallarda mülki əhalinin daha effektiv müdafiəsini təmin etməkdir”.
Ermənistan keçən il Avropa Birliyindən 10 milyon avro yardım almışdı, indi Avropa Sülh Fondu vasitəsilə daha 10 milyon məsələsini qaldırıblar. Adını da qeyri-hücum xarakterli yardım qoyublar. Bu müzakirə olunmayıb, deyirlər ki, olunacaq.
Belə bir şəraitdə Avropa Birliyinin etdiyi bu yardımın arxasında nə dayanır?
“Ayrılması nəzərdə tutulan növbəti 10 milyon bu məqsədə xidmət edir”
Politoloq Məhəmməd Əsədullazadə “Bakı-Xəbər”ə şərhində bildirdi ki, Avropa Birliyinin Avropa Sülh Fondunun xətti ilə növbəti dəfə Ermənistana 10 milyon yardım ayırması bu ölkəyə militarist dəstəyin göstəricisidir. “Ilk növbədə Avropa Birliyinin başı Rusiya-Ukrayna müharibəsinə qarışıb. Avropanın təhlükəsizliyi məhz Rusiya tərəfindən pozulur. Amma yenə Aİ Cənubi Qafqazla bağlı sülh adı ilə Ermənistana maliyyə yardımı edir. Əlbəttə ki, bu, Aİ-nin hazırkı siyasəti ilə ziddiyyət təşkil edir. Düşünürəm ki, belə bir addım atmaq onun ilk növbədə özünün regional geosiyasi mövqeyinin zəifləməsinə gətirub çıxaracaq. Çünki regionun əsas dövləti Azərbaycandır və Azərbaycanla əməkdaşlıq istiqamətində addımlar atılmalıdır”.
M.Əsədullazadə qeyd etdi ki, Ermənistanla Azərbaycan arasında münasibətlər sülh müqaviləsinin imzalanması istiqamətində davam edir, ikitərəfli danışıqlara heç bir ölkə qarışmamalıdır.”Tərəflər müəyyən istiqamətdə irəliləyişlər əldə edir. Amma göründüyü kimi, Aİ Sülh Fondundan adını “sülh” qoyub Ermənistanın silahlanması üçün pul ayırmaq istəyir. Əgər regionda ekskalasiya olarsa bunda Aİ məsuliyyət daşıyacaq”.
M.Əsədullazadə qeyd etdi ki, Aİ-nin Ermənistana yenidən 10 milıyon dollar ayırmaq niyyətinin arxasında məkrli məqsədlər dayanır. “Aİ-nin məqsədi Ermənistanı silahlandırmaq və onu yeni münaqişəyə sövq etməkdir. Yəni Ermənistana ayrılması nəzərdə tutulan növbəti 10 milyon bu məqsədə xidmət edir” - deyə M.Əsədullazadə qeyd etdi.
İradə SARIYEVA
