Aydın Hüseynov: “D-8 ölkələri yeni çağırışlar fonunda əməkdaşlığı daha da dərinləşdirməyi hədəfləyiblər, bu məqsədlə...”
Məlum olduğu kimi, ötən ilin sonunda Misirin paytaxtı Qahirə şəhərində İnkişaf etməkdə olan səkkiz ölkənin İqtisadi Əməkdaşlıq Təşkilatının (D-8) XI Sammiti zamanı Azərbaycan Respublikası yekdilliklə D-8 təşkilatının üzvü seçilib.
Qeyd edək ki, təşkilat 15 iyun 1997-ci il tarixində yaradılıb. D-8 yarandığı gündən bəri ilk dəfə sıralarının genişlənməsi haqqında qərar verib.
D-8 İqtisadi Əməkdaşlıq Təşkilatının Baş katibi İsiaka Abdulqadir İmamı ölkəmizə səfər edib. Ölkə başçısı İlham Əliyev D-8 İqtisadi Əməkdaşlıq Təşkilatının Baş katibini qəbul edib. Maraqlıdır, D-8 İqtisadi Əməkdaşlıq Təşkilatının Baş katibinin ölkəmizə səfəri nədən xəbər verir?
“D-8-in dünyada 1,2 milyard əhalisi olan üzv dövlətləri əhatə edən böyük iqtisadi və ticari potensiala malik təsisat kimi inkişafına Azərbaycanın verəcəyi töhfə də böyükdür”
Milli Məclisin deputatı Aydın Hüseynov “Bakı-Xəbər”ə açıqlamasında qeyd etdi ki, müstəqil Azərbaycan üzv olduğu əksər beynəlxalq təşkilatlarla səmərəli əməkdaşlıq əlaqələri qurmağa nail olub. Bu əlaqələr bir qayda olaraq qarşılıqlı maraqlar çərçivəsində inkişaf etdirilir: “Ölkəmizin yeni üzv qəbul olunduğu beynəlxalq təsisatlardan biri D-8 İqtisadi Əməkdaşlıq Təşkilatıdır. Prezident İlham Əliyev bu günlərdə qurumun Baş katibi İsiaka Abdulqadir İmamı qəbul edib və görüşdə Azərbaycanın bu təşkilatdakı rolu yüksək dəyərləndirilib”.
Millət vəkilinin sözlərinə görə, D-8 İqtisadi Əməkdaşlıq Təşkilatı səkkiz müsəlman ölkəsini birləşdirir. Təşkilat regionda qarşılıqlı faydalı əməkdaşlığın formalaşması, iqtisadi və ticarət, nəqliyyat, kommunikasiya və bir sıra digər vacib istiqamətlərdə əlaqələrin inkişafında mühüm əhəmiyyət kəsb edir. Həmçinin, Şərqlə Qərb arasında iqtisadi-ticari körpü, nəqliyyat və kommunikasiyaların vəhdətində bu qurumun təsiretmə imkanları böyükdür: “Üç qitəni əhatə edən, 4 trilyon ABŞ dollardan artıq ÜDM-ə malik, 130 milyard dollar həcmində ticarət dövriyyəsi həyata keçirən, üzvlərinin əhalisinin sayı ümumilikdə dünya müsəlmanlarının 60 faizini təşkil edən, dünyada İslam səkkizliyi kimi tanınan D-8 təsisatında Azərbaycanın yer alması mühüm siyasi-iqtisadi hadisədir və ölkəmizin nüfuzünu göstərir. Bu, həm də Azərbaycanın yürütdüyü unikal diplomatiyanın növbəti uğuru kimi səciyyələndirilə bilər. Bu, eyni zamanda, regional və qlobal təşkilatlarda ardıcıl olaraq öz layiqli yerini tutan respublikamıza tərəfdaş ölkələrin dərin etimad və etibarının təzahürüdür”.
A.Hüseynov qeyd etdi ki, D-8 ölkələri yeni çağırışlar fonunda əməkdaşlığı daha da dərinləşdirməyi hədəfləyiblər. Bu məqsəd qəbul olunan qərarlarda da öz əksini tapıb. Təşkilatın dövlət və hökumət başçılarının X sammitində “2020-2030 D-8 10 illik Yol Xəritəsi” adlı sənəd qəbul edilib. Bu sənəd təşkilatın güclənməsi və inkişafını hədəfləyir. Sənəd 2020-2022-ci, 2023-2027-ci və 2028-2030-cu illəri əhatə etməklə üç mərhələli inkişaf strategiyasını nəzərdə tutur. Dünyadakı yeni reallıqlara və çağırışlara uyğun islahatların aparılması İslam səkkizliyinin qarşısına bir vəzifə kimi qoyulub. D-8-in dünyada 1,2 milyard əhalisi olan üzv dövlətləri əhatə edən böyük iqtisadi və ticari potensiala malik təsisat kimi inkişafına Azərbaycanın verəcəyi töhfə də böyükdür. Azərbaycanın qoşulmasından sonra D-8-in iqtisadiyyatının dəyəri ən azı 100 milyard dollar, ticari mübadilənin həcmi 50 milyard dollar artmış olacaq. Eyni zamanda, sərmayələrdə və regional yük daşınmalarında, logistika mübadilələrində də əhəmiyyətli dinamika yaranacaq.
Günel CƏLİLOVA
