Ceyhun Məmmədov: “Paşinyanın təqdim etdiyi bu variant qəbuledilməzdir”
Ermənistanın baş naziri Nikol Paşinyan Azərbaycanla Ermənistan arasında kommunikaiyaların açılmasını ləngitmək məqsədilə gündə bir bəhanə tapır. “Zəngəzur dəhlizinin” açılmasını hər vasitə ilə əngəlləməyə çalışan Paşinyan ona alternativ kimi təqdim etdiyi uğursuz “Sülh kəsişməsi” layihəsinin baş tutmayacağını görüb, yeni bir fantastik təklifdə bulunub.
N.Paşinyan “Armenpress” informasiya agentliyində dərc edilən “Ermənistanla Azərbaycan arasında əlaqə kanalları haqqında” adlı məqaləsində kommunikasiyaların açılması barədə utopik təklif irəli sürüb. “İndi isə uzunmüddətli münaqişə ilə əlaqədar Azərbaycan vətəndaşlarının Ermənistan Respublikasının sərhəd və gömrük nəzarətindən yayınacaqları barədə Azərbaycanın bəyanatını nəzərə alaraq, hazırkı mərhələdə Zəngilan-Mehri-Ordubad və əks istiqamətdə, eləcə də Yerasx (Arazdəyən)-Ordubad-Mehri və əks istiqamətdə dəmir yolu yükdaşımaları ilə əlaqənin açılmasını təklif etmişik.
Eyni zamanda biz yazılı şəkildə heç bir tərəfin suverenliyinə, yurisdiksiyasına və ərazi bütövlüyünə xələl gətirməyən variant təklif etmişik. Əgər Bakı Naxçıvandan-Naxçıvana yüklərin etibarlı daşınmasının təmin olunmasının qayğısına qalsa, o zaman bu məsələ öz həllini tapır. Azərbaycanın yalnız “hə” deməsi qalır.
Ermənistan Respublikası ərazisində Nrnadzor (Nüvədi)-Karçevan (Kərçivan) dəmir yolunun tikintisi bir qədər vaxt aparacaq. Yerasx (Arazdəyən)-Naxçıvan hissəsində də dəmir yolunun qısa hissəsi çəkilməlidir. Lakin bu, Ermənistandan-Ermənistan və Azərbaycan-Türkiyə dəmir yolu əlaqələri üçün lazımdır və bu işi qısa müddətdə başa çatdırmaq olar.
...Mənim əminliyim tamamilə aydındır: Bütün regional iqtisadi və nəqliyyat kommunikasiyalarının, o cümlədən Ermənistan Respublikasının ərazisindən keçməklə Qərbi Azərbaycandan Naxçıvan Muxtar Respublikasına və əks istiqamətdə, Azərbaycan ərazisindən (Naxçıvan Muxtar Respublikası) keçməklə Mehridən Ermənistan Respublikasının Yerasxa (Arazdəyən) və əks istiqamətdə bütün regional iqtisadi və nəqliyyat kommunikasiyalarının açılması tamamilə hazırdır və onun həyata keçirilməsi üçün yalnız Azərbaycanın razılığı lazımdır”, - deyə Paşinyan bildirib.
Paşiyanın bu məqaləsində iki diqqət çəkən məqam var. Paşinyan tez-tez Qərbi Azərbaycandan Naxçıvana yol barədə danışıb, belə bir yola işarə edib. Təbii ki, Azərbaycan Zəngilan olan hissəni Qərbi Azərbaycan adlandırmır, bizim nəzərimizdə Qərbi Azərbaycan başqa deyimdi, başqa bir ərazini ifadə edir. Biz Zəngilan, Cəbrayılı Azərbaycanın şimal-qərb rayonları adlandırırıq. Paşinyan isə qəsdən bir neçə yerdə Qərbi Azərbaycan ifadəsi işlədib. Bununla o, beynəlxalq leksikonda Qərbi Azərbaycan ifadəsinin Azərbaycanın nöqteyi-nəzərindən məzmununu diqqətdən yayındırmaq istəyir. Guya Qərbi Azərbaycan Azərbaycanın Zəngilan, Cəbrayıl və sair rayonlarıdır. İkincisi, o təklif edir ki, Azərbaycan Laçın-Kornidzor yolu ilə Ermənistan üzərindən Ermənistandan Türkiyə ərazisinə, sərhədində kimi yükdaşıma ilə məşğul olsun. Bu iki məsələyə necə yanaşmaq olar?
“Burda hədəf və məqsəd beynəlxalq ictimaiyyəti çaşdırmaq, yanlış istiqamətə yönləndirməkdir”
Millət vəkili Ceyhun Məmmədov “Bakı-Xəbər”ə şərhində “Təəssüflə qeyd etmək lazımdır ki, ilk dəfə deyil Paşinyan belə açıqlama verir və ictimai rəyi çaşdırmağa çalışır. Əslində, Qərbi Azərbaycan bizim üçün hazırkı Ermənistan ərazisidir. Azərbaycan dəfələrlə o məsələyə toxunub və o məsələni qaldırıb. Burda növbəti dəfə Paşinyanın həqiqətləri təhrif etməyə çalışdığını görürük. Burda hədəf və məqsəd beynəlxalq ictimaiyyəti çaşdırmaq, yanlış istiqamətə yönləndirməkdir. Bu da birmənalı olaraq Azərbaycan tərəfindən qəbul edilməyən yanaşmadır”-deyə bildirdi.
C.Məmmədovun sözlərinə görə, ikincisi, Azərbaycanın şərti ondan ibarətdir ki, Azərbaycan vətəndaşları rahat şəkildə gedib-gəlmək imkanları əldə etməlidirlər, yol açıq olmalıdır və burda heç bir nəzarətdən söhbət getməməlidir. “Yəni Azərbaycanın, orda yaşayan azərbaycanlıların buna haqqı var. Ermənistanın təklif etdiyi variant isə tamamilə fərqli bir variantdır. Bizim təklifimiz, yəni Ağbənddən, Ermənistan ərazisindən Naxçıvana və Türkiyəyə keçməkdir. O anlamda Paşinyan isə Azərbaycan Laçın-Kornidzor yolu Ermənistandan ta Türkiyəyə kimi yükdaşıma ilə məşğul olmağı təklif edir. Azərbaycan bu fikirlə razı deyil. Əvvəlki dövrdə də Ermənistan dəfələrlə Azərbaycana təklif verdi. Yenə də qeyd edirik ki, bizim yanaşmamız Naxçıvana, oradan da Türkiyəyə, xüsusilə Naxçıvana rahat gediş-gəlişdi. Yəni Naxçıvan əhalisi yükləri, pasportu yoxlanmadan sərbəst şəkildə Naxçıvana, ordan da Türkiyəyə getmək imkanına malik olmalıdır. Ermənistanın təklif etdiyi model isə bu deyil, o mənada Azərbaycanın bununla razılaşması mümkünsüzdür. Paşinyanın təqdim etdiyi bu variant qəbuledilməzdir” - deyə C.Məmmədov bildirdi.
İradə SARIYEVA
