Baş verməsindən bir neçə gün keçməsinə baxmayaraq, Ağ Evin Oval kabinetində Zelenski-Tramp debatı hələ də dünya mediasının gündəminin əsas müzakirə mövzularından biridir.
ABŞ-nin dövlət katibi Rubio iddia edib ki, Zelenski Vaşinqtona səfərindən Trampın diplomatik strategiyasına qarşı çıxmaq üçün istifadə edərək qarşıdurmaya səbəb olub.
“Bu saziş beş gün əvvəl imzalana bilərdi, lakin onlar Vaşinqtona gəlməkdə israr etdilər. Buraya gəlib diplomatiyanın necə işləməli olduğunu bizə öyrətməyə başlayacağınız ssenari yaratmayın. Prezident Zelenski bunu bu istiqamətdə apardı və nəticə belə başa çatdı”.
Baş katib daha sonra deyib ki, Ukrayna prezidenti Volodimir Zelenski Oval kabinetdəki gərgin debatdan sonra Donald Trampdan üzr istəməlidir.
Doğrudanmı Zelenski Trampdan üzr istəməlidir?
Əslində Ukraynanı bu oyuna çəkən, sülh sazişi imzalayıb atəşkəsə nail olmaq imkanlarından yayındıran, onun təhlükəsizliyinə 30 il əvvəl zəmanət verən üç ölkədən ikisi ABŞ və Böyük Britaniya olub. Buna görə bu iki ölkə bu gün tək Zelenskidən deyil, Ukrayna xalqından üzr istəməlidir və zərərlərini kompensasiya etməlidir. Amerikanın rəhbəri kim olur-olsun, bu, dövlətin məsuliyyətidir. Zelenski Amerika siyasilərinə bu debatda tarixi dərs verdi və bu mövqeini axıra qədər müdafiə etməlidir. Amerika və Avropa istəsəydi bu müharibənin qarşısını ala bilərdi, amma almadı və milyonların bədbəxtliyinə bais oldu. Bu tarixi məsuliyyət onların boynundadır.
Bu sualla baki-xeber.com saytı bir neçə siyasətçiyə müraciət edib, görək onlar necə düşünür.
Aydın Quliyev: "Burada mən etikadankənar heç nə görmürəm"
"Bakı-Xəbər" Media Qrupunun rəhbəri, politoloq Aydın Quliyev məsələyə münasibətində dedi ki, Zelenski həmin görüşdə sadəcə olaraq ölkəsinin mövqeyini prinsipial şəkildə təsfir etdi: "Burada mən etikadankənar heç nə görmürəm. Hesab edirəm ki, Zelenski heç kimdən üzr istəməməlidir".
Abutalıb Səmədov: "Zelenski bu vəziyyətlə barışmalıdır"
Politoloq Abutalıb Səmədov bu xüsusda deyir ki, vəziyyətdən çıxmağın yeganə yolu Zelenskinin hansısa formada üzr istəməsi və geri dönməsi ola bilər: "Lakin imzalanacaq sülh sazişi artıq Ukraynanın xeyirinə olmayacaq. Zelenski bu vəziyyətlə barışmalıdır. Çünki ABŞ-nin köməyi olmadan Ukraynanın ayaqda qalması qeyri-mümkündür".
Zərdüşt Əlizadə: "Tramp həyasızlıq edir, Zelenski bu həyasızlığı ədəblə dilə gətirəndə tərbiyəsiz olur və Ağ Evdən qovulur?"
Politoloq Zərdüşt Əlizadə bildirdi ki, 1994-cü ildə ABŞ, Böyük Britaniya və Rusiya Ukraynanı dilə tutub "Budapeşt sazişi" ilə bir trilyon dollarlıq nüvə arsenalını Moskvaya verməyə razı saldılar: "Əvəzində isə bu üç ölkə Ukraynaya təhlükəsizlik zəmanəti verdilər. İndi həmin raketlərlə təhlükəsizlik zamini olan Rusiya Ukraynaya təcavüz edir, beş vilayətini işğal və ilhaq edib. Zəmanət verənlərdən biri olan ABŞ Rusiyanı Çindən qoparmaq məqsədilə Zelenskiyə deyir ki, sən Putinə və Rusiyaya təcavuzkar demə, dilini şirin elə və onun şərtləri ilə razılaş! Tramp həyasızlıq edir, Zelenski bu həyasızlığı ədəblə dilə gətirəndə tərbiyəsiz olur və Ağ Evdən qovulur? Hesab ediləm ki, Tramp və ABŞ Ukrayna xalqından üzr istəməlidir, nəinki Zelenski".
Qabil Hüseynli: "Ukraynanın Rusiyaya 30 il əvvəl əvəzsiz verdiyi 5 min nüvə başlığı özüňdə olsaydı..."
Politoloq Qabil Hüseynli bildirdi ki, ABŞ prezidenti Donald Tramp müqavilənin imzalanmasını pozmaq üçün Zelenskini normal şəkildə qarşılamadı, onun paltarına sataşdı, "biz olmasaq siz məhv olardınız" deyə böyük bir xalqı təhqir etdi: "Halbuki, Ukraynanı müdafiə etmək ABŞ-nin öhdəliyidir. Tramp Ukrayna xalqından və Zelenskidən üzr istəməlidir. Çünki onların günahı üzündən 10 milyon ukraynalı xaricə qaçıb. Ukraynanın Rusiyaya 30 il əvvəl verdiyi 5 min nüvə başlığı özündə olsaydı, nəinki Rusiya, heç Amerika da onun qarşısında dayana bilməzdi".
Akif NƏSİRLİ
