Əli Orucov: "... Azərbaycan Sarkisyan, Koçaryan, Ohanyan və digərlərini də şüşə qəfəsdə hakim qarşısına çıxarmağa tam haqlıdır"
Ermənistan Respublikası Milli Assambleyasının “Hayastan” müxalifət fraksiyası ATƏT PA-nın sədrinə, insan haqları, eləcə də Cənubi Qafqaz üzrə məruzəçilərinə məktublar göndərərək, Bakıda erməni hərbi əsirlərin və "artsax" hərbi liderlərinin məhkəmə prosesini izləmək üçün faktaraşdırıcı missiyanın təşkili üçün təcili tədbirlərin görülməsini tələb ediblər.
Bu barədə Milli Assambleyanın “Hayastan” fraksiyasının rəhbəri Seyran Ohanyan “Facebook” səhifəsində yazıb.
Ermənistan parlamentinin müxalifət fraksiyası və digər müxalif siyasətçilərin Bakıda davam edən məlum məhkəmə prosesinə beynəlxalq diqqətin cəlb ediməsi istiqamətində cəhdləri iflasa uğradı. Ermənilər sübut etməyə çalışdılar ki, Ruben Vardanyanı həbsxanada incidirlər, ac saxlayırlar, hüquqlarını pozurlar və s. Qırmızı Xaç nümayəndələri gəlib yoxladılar ki, bu iddiaların hamısı yalandır. İndi də ATƏT-in Parlament Assambleyasını bu işə cəlb etmək istəyirlər. Bu nə dərəcədə perespektivli cəhd ola bilər?
Baki-xeber.com-a bu xüsusda danışan politoloq Əli Orucov bildirdi ki, ermənilərin Bakıda mühakimə olunan hərbi və separatçı canilər haqqında yalandan hay-həşir qaldırmasının heç bir mənası yoxdur: "Ermənistanın cinayətkarları rəsmi şəkildə müdafiə etmək cəhdləri necə fiaskoya uğradısa, "Hayastan" müxalifət fraksiyasının canfəşanlığı da uğursuzluğa düçar olacaq. Əvvəla ona görə ki, ermənilərin həbs olunanlar barədə etdikləri iddiaların heç bir əsası yoxdur. Mühakimə olunan lider quldurlarla Beynəlxalq Qızıl Xaç Komitəsi mütəmadi monitorinqlər aparır, onlara baş çəkir. Azərbaycan da həbsdə saxlanılanlarla beynəlxalq və yerli qanunvericiliyin tələbləri çərçivəsində davranır.
Mən, hətta Azərbaycan dövlətinə və xalqına qarşı ən ağır və qəddar cinayətlər törətdiyi mötəbər, təkzibedilməz sübut və faktlarla, həmçinin çoxsaylı şahid ifadələri ilə təsdiqini tapan canilərə Bakının aşırı humanizmindən təəccüb edirəm. Halbuki, ermənilər tərəfindən günahsız soydaşlarımıza ağılasığmaz şiddətli işgəncə və insanlığı alçaldan rəftar göstərilib.
R.Vardanyanın "müdafiəsinə" qalxan Ermənistan müxalifəti görünür onun milyonlarından faydalanmağa və marginal maraqlarını reallaşdırmağa çalışır. Açıq və şəffaf keçirilən məhkəməyə şübhə etmək, hansısa Qərb institutlarının diqqətini çəkməyə cəhd göstərməklə heç nəyə nail ola bilməyəcəklərini özləri də yaxşı anlayırlar. Bunun perspektivi yoxdur. Qərb də, bütün dünya ictimaiyyəti də görür ki, Azərbaycan obyektivliyi, bütün hüquq normalarını qoruyaraq məhkəmə prosesində müttəhimlər üçün hər cür şərait yaradıb. Onların saxlanma şəraiti də beynəlxalq standartlara uyğun həyata keçirilir. Digər tərəfdən, Qərbin dərin və vacib qayğılarının olduğu indiki dönəmdə erməni müxalifətinin ağılsız cəhdləri heç nəyə yaramır. Məncə, Azərbaycan Sarkisyan, Koçaryan, Ohanyan və digərlərini də şüşə qəfəsdə hakim qarşısına çıxarmağa tam haqlıdır. Gec-tez bunun baş verəcəyinə şübhə etmirəm".
Deniz NƏSİRLİ
