Sahil Kərimli: “Tramp imkan verməyəcək ki, o sənəd icra olunsun və ABŞ sərhədçiləri və gömrükçüləri Ermənistana gəlsin”
Yanvarın 14-də Ermənistanla Amerika Birləşmiş Ştatları (ABŞ) arasında Strateji Tərəfdaşlığa dair Xartiya imzalandı. Bu sənədin imzalanması zamanı ABŞ-ın keçmiş dövlət katibi Entoni Blinken bəyan etdi ki, ABŞ-ın gömrük və sərhəd rəsmilərindən ibarət komandası sərhəd təhlükəsizliyi imkanlarını inkişaf etdirmək, yerli tərəfdaşlarla işləmək üçün yaxın həftələrdə Ermənistana səfər edəcək.
Co Bayden administrasiyası gedəndən və Donald Tramp hakimiyyətə gəldikdən sonra bu sahədə fərqli vəziyyət özünü göstərir.
Qeyd edək ki, o xariyanın maddələrindən və tələblərindən biri bu idi ki, Ermənistana gömrükçülərdən və sərhədçilərdən ibarət iki qrup göndərilsin və onlar Ermənistan sərhədinin təhlükəsizlik məsələsini öyrənsinlər. Bu qrupların gəlməyi təxirə düşüb.
Yəni ehtimal etmək olarmı ki, Tramp Baydenin dövründə Ermənistanla imzalanmış həmin strateji tərəfdaşlıq sazişinin icrasından artıq geri çəkilir? Bu ehtimal varmı?
“Belə olduğu halda bu sənədin heç bir hüquqi və hansısa təsir imkanı olmayacaq, böyük ehtimalla, Ermənistanın planları suya düşəcək, yenə də xəyal qırıqlığına uğrayacaq”
Siyasi ekspert Sahil Kərimli “Bakı-Xəbər”ə bildirdi ki, bu gün Ermənistanın siyasi rəhbərliyi ABŞ-dan çox böyük dividendlər gözləyir: “Onlar hesab edirlər ki, Bayden hakimiyyətinin son saatlarında imzaladıqları strateji tərəfdaşlıq müqaviləsi tezliklə Ermənistanın xeyrinə işləyəcək və Ermənistan ABŞ-ın böyük dəstəyini hiss edəcək. Amma hesab edirəm ki, Ermənistan siyasi rəhbərliyi yanılır və onlar bilə-bilə bu cür yanlış, real olmayan gözləntilərdə bulunurlar. Çünki çox yaxşı bilirik ki, Tramp administrasiyası artıq dünyanın bir çox bölgələrində baş vermiş və Bayden hakimiyyəti dövründə yaradılaraq qızışdırılmış münaqişələrin aradan qaldırılması, müharibələrin dayandırılması istiqamətində çox ciddi addımlar atır. Bu fonda Cənubi Qafqazda da qarşıdakı illərdə ABŞ Ermənistanla Azərbaycan arasındakı bu problemin həlli istiqamətində öz töhfəsini vermiş olacaq”.
S.Kərimli hesab edir ki, bu baxımdan, ABŞ vəziyyətin gərginləşdirilməsinə yox, daha çox vəziyyətin qaydaya salınması, problemin həlli, Cənubi Qafqazda dayanıqlı və daimi sülh əldə olunmasına dəstək istiqamətində addımlar atacaq. “ABŞ-dan sərhədçilər və gömrükçülər qrupunun Ermənistana göndərilməsi ləngidilir. Bu da, təbiidir ki, Ermənistan rəhbərliyində ciddi narahatlıqlar yaradır. Amma paralel olaraq onu da qeyd etməliyik ki, bölgəyə ABŞ sərhədçilərinin və gömrükçülərinin gətirilməsi Ermənistan ərazisində olsa da, bu, Azərbaycanın siyasi və hərbi maraqlarına zidd olan bir addımdır. ABŞ bunu yaxşı anlayır. İnanmıram ki, ABŞ Cənubi Qafqazda əsas tərəfdaşı kimi gördüyü Azərbaycanın maraqlarına xələl gətirəcək bir addım atsın. Bu proseslər zamanı Azərbaycanın da marağı nəzərə alınacaq və bu marağın qorunub saxlanılamsı istiqamətində Amerika öz birmənalı siyasətini həyata keçirəcək”.
S.Kərimlinin fikrincə, ABŞ keçmiş administrasiyanın dövründə imzalanan sözügedən müqavilənin icrasında qətiyyən maraqlı deyil: “Bu sazişin ləğv olunmasından söhbət gedə bilməz, çünki o artıq imzalanıb. Baxmayaraq, Tramp bildirmişdi ki, Baydenin imzaladığı bir çox müqavilələri, sənədləri ləğv edəcək. Amma hər halda Ermənistan hakimiyyəti ilə Bayden administrasiyasının getha-getdə imzaladığı sənəd ləğv olunmasa belə, bu sənədin icrası da mümkün olmayacaq. Tramp imkan verməyəcək ki, o sənəd icra olunsun və ABŞ sərhədçiləri və gömrükçüləri Ermənistana gəlsin. Belə olduğu halda bu sənədin heç bir hüquqi və hansısa bir təsir imkanı olmayacaq, böyük ehtimalla, Ermənistanın planları suya düşəcək, yenə də xəyal qırıqlığına uğrayacaq”.
İradə SARIYEVA
