Arzuxan Əlizadə: “Ermənistan Qərblə Rusiya arasında “kölgə iqtisadiyyatının” əsas ruporudur”
Ötən il Rusiya qonşu ölkələrlə ticarət dövriyyəsini 15,5% artaraq rekord həddə - 66,3 milyard dollara çatdırıb. Qazaxıstan Rusiyanın qonşu ölkələr arasında əsas ticarət tərəfdaşı olaraq qalır və ticarət dövriyyəsi il ərzində 2,8% artaraq 27,8 milyard dollara çatıb.
Ötən il Ermənistan Rusiyanın regionda ikinci ən böyük tərəfdaşına çevrilib. Rusiya-Ermənistan ticarət dövriyyəsi ötən il 1,7 dəfə artaraq 12,6 milyard dollar təşkil edib. Rusiyanın Özbəkistanla ticarət dövriyyəsi cəmi 17,2% artaraq 11,6 milyard dollara çatıb. Sonrakı yerdə Azərbaycan gəlir, ötən il ticarət dövriyyəsi təxminən 10% artaraq 4,8 milyard dollara çatıb.
Çox qəribədir, 10 milyondan çox əhalisi və böyük iqtisadi imkanlara malik olan Azərbaycanın Rusiya ilə olan ticarət dövriyyəsinin həcmi 4,8 milyard dollar, 3 milyon əhalisi və zəif iqtisadiyyata malik Ermənistanın bu ölkə ilə ticarət dövriyyəsi 12,6 milyard dollar. Bu necə olur?
“Kimsə düşünməsin ki, Qərbin bütün bunlardan xəbəri yoxdur, bu, razılaşdırılmış oyundur”
Sözügedən məsələni “Bakı-Xəbər”ə şərh edən AMİP sədri, millət vəkili Arzuxan Əlizadə hesab edir ki, Ermənistanla Rusiya arasında ticarət dövriyyəsinin bu dərəcədə artmasının yeganə səbəbi Ukraynada müharibə və onun haylar üçün yaratdığı imkanlardır: “Məsələ ondadır ki, Ukrayna-Rusiya müharibəsi başlayandan Qərbin Moskvaya qarşı tətbiq etdiyi sərt sanksiyalar bu ölkənin iqtisadi fəaliyyətini məhdudlaşdırsa da, bəzi üçüncü ölkələr üçün yeni imkanlar yaradıb. Belə ölkələrin də başında Ermənistan gəlir. Yəni bu “fürsətdən” ən çox yararlanan, faydalanan Ermənistandır. Ermənistan Qərblə Rusiya arasında “kölgə iqtisadiyyatının” əsas ruporudur. Ukrayna müharibəsi başlayan kimi Ermənistanla Rusiya arasında ticarət dövriyyəsi sürətlə artmağa başladı. Çox vaxt deyirlər ki, Qərbin Rusiyaya qarşı sanksiyaları o qədər də effekt vermir. Əgər Qərb Ermənistan üzərindən Rusiya ilə ticarət qurursa, hansı səmərədən söhbət gedə bilər? Qərb, Ukrayna telekanalları Türkiyənin, Gürcüstanın, Qazaxıstanın sanksiyalardan yayınmaqda Rusiyaya yardım etdiyini yeri gəldi-gəlmədi hallandırsalar da, Ermənistan barədə bunlar deyilmir. Halbuki, statistik rəqəmlər ortadadır. Ermənistan öz məhsulları ilə deyil, Qərbdən aldığı və ya müxtəlif mənbələrdən əldə etdiyi malları Rusiyaya ötürməklə iqtisadi dividendlər qazanır. Hətta Ermənistan rəsmiləri belə, bunu etiraf etməkdən çəkinmirlər. Sanksiyalar fonunda Rusiyanın iqtisadi oyun qaydaları dəyişsə də, Ermənistan kimi ölkələr bu boşluğu doldurmağa can atır. Bu təkcə ticarətlə məhdudlaşmır. Müharibə başlayandan bəri Rusiyadan Ermənistana kapital axını intensivləşib. Rusiya biznesmenləri bizneslərini Ermənistana köçürüb. Bu, o deməkdir ki, Ermənistan Qərbin sanksiyalarına əməl etməklə bağlı verdiyi bəyanatlar sadəcə boş sözdür. Ermənistan Rusiyaya gizli qapı rolunu oynayır. Bunu Qərb də gözəl bilir. Yəni kimsə düşünməsin ki, Qərbin bütün bunlardan xəbəri yoxdur, bu, razılaşdırılmış oyundur. Əgər bu səbəbdən Azərbaycanla Rusiya arasında ticarət dövriyyəsi kəskin artsaydı, o zaman ölkəmizə qarşı sanksiya belə tətbiq edərdilər. Ermənistana gəldikdə isə, bütün bu biabırçılıqları görməzdən gəlirlər. Çünki bu prosesin içindədilər”.
Vidadi ORDAHALLI
